Ketegal ti ransing sereta chakah ngangkatka jaku Iban, sekali agi ex-DJ RTM
bagi Iban, Casper Kayong Umping nulis bup bacha ke digelar ‘Raja Singalang
Burung’.
Kayong, 62, ti mega siku ari kaban Sarawak Iban Writers Association
(SIWA) madahka bup ke dikarang iya nya balat agi ngemeratka adat enggau main asal bansa
Iban.
“Bup tu ngembuan 153 lambar lalu dikeluarka SIWA lalu diatu benung
dijual ba kedai bup serata nengeri,” pia ku iya berandau enggau pengarang
berita, kemari.
Iya nulis bup serak tu laban ngasaika diri bisi tanggung pengawa
bekunsika penemu bekaul adat enggau main asal Iban ngagai nembiak rebak baru
kemaya hari tu.
“Bup tu ulih nyadika malin bala nembiak baik nya ba sekula sekondari
tauka palan pelajar tinggi tang bala ke bukai mega tau macha bup tu laban iya bisi
ngundan pekara ke bekaul enggau pengarap, adat sereta main asal aki ini kitai
kelia.
“Nembiak ke bisi ngambi pelajar jaku Iban mega engkeman bendar ngembuan
bup baka tu nyadika malin pelajar sida,” ku iya nerangka.
Bekenangka pengawa iya nulis bup nya, ku Kayong, iya berengkah nugungka
jerita tauka main enggau adat asal Iban sepengelama 31 taun sekumbang gawa
enggau RTM suba.
Jerita ke ditulis iya nya bepelasarka jerita baka ke dipadah beberapa
iku lemambang ngagai iya.
“Tu mih reta kita. Nya alai tu mega sebengkah ari tanggung pengawa kitai
ngentanka pengaya ‘reta’ aki ini kitai menya,” ku iya nandu.
Bup Raja Singalang Burung iya tu berega RM39 siti.
Sekeda ari tibak bup tu baka Adat Pemati, Tusun Gawai Burung, Adat
Ngetas Ulit, Adat Tusun Tebalu enggau mayuh jerita sereta pengarap Iban ke
bukai.
(Diambi sereta dibali ari Utusan
Borneo)
Tiada ulasan:
Catat Ulasan