Pemuka Jaku

Pemuka Jaku
Niat ati penulis nengkebang siti blog ngena jaku Iban ngambika jaku tu enda lenyau mabun laya nitihka aki ini kitai ke Serawai Mandai Betangga Tunggang lalu pia mega awakka iya tau nyadika pesaka sida Titik Nasan Pantau Ajan Panjai Lengan, Tuai Sebayan ba Bedega Lintang Takang. Laman tu ukai semina ngenang pasal pemansang jaku Iban di sekula enggau budaya bansa Iban tang mega ngenang pekara pasal pengerindu diau begulai sejalai sereta bekunsi tuju pengidup enggau mayuh pupu raban bansa ba Malaysia. Kepenudi bendar, laman tu dikarapka ulih nyadika penyanding penemu ngagai bala nembiak ke agi belajarka jaku Iban baikka iya di tikas sekula, institut pematih pengajar tauka universiti.
"Dikelala Buah ari Langgu, Dikelala Basa ari Penyiru, Dikelala Bansa ari Jaku"

Isnin, 30 April 2012

Rega sebaka manah ungkup rayat ba menua pesisir


KUALA LUMPUR : Program Rega Sebaka (PPH) ti dipejalaika Opis Menteri Dagang Dalam Negeri, Koperasi enggau Pengguna dipeda badas bendar sereta tau mai penguntung ngagai rayat kelebih agi ngagai sida ke diau ba menua pesisir di Sarawak enggau Sabah.

Sapit Menteri Dagang Dalam Negeri, Koperasi enggau Pengguna Datuk Tan Lian Hoe madah, beduduk ari program tu, rayat ke diau ba menua pesisir di Sabah enggau Sarawak ulih ngasaika barang subsidi ti sebaka enggau orang di Semenanjung.

"Nyentuk ke diatu, perintah agi benung bejalaika program tu.  Awakka  semua rega barang ke dijaga sebaka magang ba serata menua," ku iya madah lebuh ke nyaut tanya ari Senator Yunus Kurus lebuh sidang Dewan Negara, empai lama ti udah.

Tan madah, chunto iya ngelama tu di Bario, Sarawak, rega petrol RON95 enggau diesel semak RM5 seliter, udah nya gas petroleum belaie (LPG) semak RM110 setong (14 kilogram) tang pengudah program tu dikemujur, orang di Bario semina meli petrol RON95 berega RM1.90 seliter enggau LPG ke berega RM26.60 setong.

Iya madah, enti sebedau tu rega semua utai tu endang mar amat ketegal gaya menua ke bebukit ngujungka kos pejalai nyau tinggi tang pengudah program tu mujur mensia mayuh ulih bebelika barang tu enggau rega ke mudah. Iya mega madah, nengah program ke bansa tu, perintah udah maduka bala pengudar barang ulih mai barang baka berau, gula, tepung gandum, minyak makai, LPG, petrol enggau diesel ngagai menua pesisir.

"Kelimpah ari barang subsidi tu, perintah mega udah netapka barang bukai nitihka peminta mensia mayuh ba endur ke dianjung barang," ku iya.

Tan madahka, opis menteri iya udah seruran meresa sereta ngasuh bala pengudar mesti mai 60 peratus barang  subdisi enggau 40 peratus barang Coop 1Malaysia ngagai menua pesisir di Sabah enggau Sarawak.

"Produk Coop 1Malaysia udah dijual ba Sabah enggau Sarawak ngena rega ke sebaka enggau ba Semenanjung lalu tau mega dikumbai 1Malaysia 1Harga," ku iya. Semina barang subsidi aja ke sebaka rega ba serata menua Malaysia, tang rega barang servis agi mengkang baka selama, ku Tan.- Berita Menua
Posted by at
Labels:

Tiada ulasan:

Catat Ulasan

Langgan: Catat Ulasan (Atom)