BCF penyungkak dagang temuai S’wak

SIBU: Adat enggau main asal pupu raban bansa ke dibantai nyerumba Pengerami Mantaika Main Asal Borneo (BDCF) ditu nyadi pengering dagang temuai menua tu.

Pengelebih tu diaku temuai ari menua Australia enggau New Zealand ke bisi rembus nemuai nyerumba BCF ketungkah diatur 6 Julai tu tadi.

Chad Leggett ke nemuai ngagai menua tu begulai enggau bini iya Kelli Davis ari Australia madah, Sarawak sebengkah ari nengeri ba Malaysia ti kaya enggau adat sereta main asal.

“Siti ari kebuah kami nemuai ngagai Sarawak laban tekait ati meda adat enggau main asal pupu raban bansa ditu,” pia ku iya maya dikerandau pengarang berita lebuh seduai melaki bini benung rindang meda main asal ke benung dibantai ba panggau Pengerami Mantaika Main Asal Dayak Borneo (BDCF) ditu, malam ensana.

Ukai semina rindang meda main enggau adat asal ke dibantai malam nya, ku iya seduai melaki bini rinduka pemakai asal pupu raban bansa ditu.

“Ditu kami baru nemu nama ke dikumbai pansuh, penganan, jala enggau tuak.

“Pelaba aku tu mih pengering dagang temuai menua Sarawak,” ku iya madah.

Ku Leggett nambah, iya enggau temuai ari menua tasik ke bukai mega enda nangi lebuh maya nemuai ngagai Malaysia.

“Kitai jarang ninga menua tu dituntung penusah ke tau ngeruga pengelikun. Nya alai, kami ngasaika nengeri tu sebengkah ari menua ba Asia ke likun alai nemuai,” pia ku iya madahka baru.

Sepenemu enggau Legget, Steve Penwarden enggau bini iya Mary Marning ari New Zealand bela muji pengawa ke bisi dibantai pupu raban bansa asal nengeri tu lebih agi ba panggau BDCF malam nya.

Ku iya, seduai melaki bini balat tekait ati enggau kajat ke bisi dibantai raban bansa Iban maya nya.

“Tu keterubah iya kenduai nemuai ngagai Sarawak. Kami suah meda ba internet pengawa ngajat enggau miring tang tu keterubah aku meda pengawa nya ba mua diri empu,” ku iya madah.

Penwarden mega madahka seduai temegah ati meda penyerakup rayat ditu ke bela besaup ngatur pengerami baka nya.

“Pengawa ke ngatur pengerami baka tu ti bekenaka saup pupu raban bansa ukai lantang digaga. Tang kitai alit ati sida (rayat Sarawak) ti ngembuan raban bansa ke enda sama jalai pengarap ulih begulai enggau pangan diri ngatur BCF.

“Sarawak tauka Malaysia patut nyadika chunto menua besai ke bukai,” pia ku iya.

Seduai melaki bini malam nya mega enda muai awak bebelika pemakai baka pansuh manuk enggau kereban asal raban bansa menua tu.

Dibali ari: http://www.theborneopost.com/