SALAH GUNA LAMAN SOSIAL

PEMANSANG dunya teknologi kemaya hari tu nyau majak regas-seregas  kelebih agi ba bidang media sosial baka facebook, twitter enggau blog.

Taja pia, mayuh orang kemaya hari tu nyalahguna laman sosial nya datai ke ngepunka penanggul  sosial ti enda disangka-sangka. 

Laman sosial ti keterubah iya ditengkebangka endang ngembuan tuju ti manah tang diatu nyau betukar nyadi pengawa ke tau ngepunka penanggul ngagai diri empu tauka orang bukai. 

Ambika banding, laman sosial nya suah bendar alai orang ngemaluka siku-siku individu lalu mega alai mantaika mayuh macham pengasai ati baka penyinu, penyima ati, begedi, muras enggau ke bukai. Balat agi jai empas iya enti mayuh orang meri komen baik nya manah tauka jai.

Ukai pekara ti bula enti mayuh orang ke rindu ke laman sosial mega rindu bekunsi lalu mantaika asai ati diri ngagai orang bukai.

Bisi mega maya iya ke meri penemu endang nyangka ukai tuju deka ngemaruhka  imej siku-siku, ukai mega deka ngemalu tauka ngiga chara mutarka penanggul tang semina deka mantaika pengasai ati diri. 

Tang nasit enda manah, lebuh ke enda sedar nya tetap ngujungka iya ngaga ulah negatif ti bukai ke tau mai penyai datai ke ulih ngelabuhka imej orang bukai lalu ngujungka sida bemunsuh tauka begedi ke pangan diri. 

Ukai semina nya aja, laman sosial nya mega nyadi ‘pintu’ alai orang ngerusakka pengelikun enggau maruah orang indu. 

Nyangka udah nyadi pemaiada, orang indu endang ngembuan pengingin ati deka dipeda bajik sereta dipuji ngujungka sida lalu gagit munggahka gambar sida ke enggau penuh gaya sereta linguk tubuh ke mayuh macham ngagai laman sosial. 

Tu ngujungka mayuh orang lelaki lalu mali sereta ngelalaika diri nyadi orang indu ngambika sida ulih bepangan sereta bulih penerang ke patut dipelalaika senentang orang indu nya. 

Bisi sekeda lelaki ke ringat laban enda diterima nyadi tawing mega enggau ngeruhka situasyen mali diri sechara belalai nyadi penempa ti sama. Tu ngujungka penerang ke deka dipelalaika tetap ditemu sida. 

Iya ti balat agi ngerusakka imej diri nya lebuh gambar dalam gaya tebuka nyau dipeda orang mayuh. 

Iya ke bendar, mayuh penyai laman sosial ti patut diperatika taja pan pemanah laman sosial nya endang bisi sereta setimbang enggau penyai. 

Iya ulih nyadika pun ngulihka pekara ti manah enti diguna enggau menyana tang iya mega tau ngerusakka pengidup enti iya disalah guna. 

Nya alai, tempapka dulu dada diri lalu tanyaka asai ati baka ni kitai ulih bulih pemanah ari laman sosial nya laban munyi ku sempama jaku tuai; telanjur perau ulih diundur tang telanjur jaku pemedis mih datai.