Pelajar pom enam deka diaturka baru: Muhyiddin

YOGYAKARTA: Tan Sri Muhyiddin Yassin madahka pelajar pom enam deka diaturka baru dikena ngangkatka imej iya setipak enggau sistem pelajar pra universiti baka di kolej matrikulasi enggau palan asasi sains. 

Sapit Menteri Besai madahka, entara langkah ti dipejalaika nya nyengkaum nyeraraka nembiak pom enam ari sekula selama lalu nempatka sida ba palan pelajar ti endang diungkupka nembiak pom enam.

"Kami benung berunding  ngelumu nembiak pom enam, ngena pekayan ti bebida, taga jam belajar ti enda sebaka, pengajar ke enda  sama lalu  kategori ke  lain mimit enti dibandingka enggau sekula selama," ku iya madah ke pengarang Malaysia ditu sehari tu. 

Muhyiddin, ke mega Menteri Pelajar bisi datai ditu kenyau ari kemari laban ke ngulu aum Menteri-menteri Pelajar ASEAN enggau aum bukai ke bisi kaul enggau pekara nya. 

Dikena ngemujurka tuduh penemu nya, Sapit Menteri Besai nya madah, nembiak pom enam patut digelumuka ba palan kediri laban penyampau sida diatu bisi ngachir serata menua dalam satu tauka dua kelas ba sekeda sekula. 

Taun tu, bisi  83,000 iku nembiak pom enam sereta 26,000 nembiak matrikulasi di serata menua.

Langkah ti deka nyerarakka nembiak pom enam ari sekula selama nya mega setipak enggau penuduk sida ke dikumbai nembiak pra universiti. 

Mensia mayuh kemaya hari tu meratika pelajar pom enam nya pengawa nampungka pelajar ari pom lima tang ke bendar sida tu bebida agi  ari sukut kategori sereta tuai agi bulu ari segi runding, ku iya. 

Muhyiddin madahka pengawa ke ngaturka baru nya endang patut dipejalaika laban pom enam nya  sigi pelajar pra universiti ti setipak enggau tikas kolej matrikulasi Opis Menteri Pelajar sereta enggau palan asasi sains ti dipejalaika universiti perintah. 

Kemaya hari tu mensia mayuh ngembuan peragam ati ke madahka pelajar ba kolej matrikulasi nya manah agi ari pom enam, tang iya ti bendar sida pom enam mega pas sereta bisi ngembuan kelayakan ti sama dikena sida besemekih tama ke universiti perintah. 

Mensia mayuh kenu ku iya, enda patut madahka pelajar matrikulasi ngembuan pengelebih laban ari sukut jam nya , pengulih nembiak pom enam nya lati agi ari nembiak matrikulasi. 

Besenutuk enggau nya, nembiak ke udah pas SPM patut meratika pelajar pom enam nya mega antara tempat  ke manah ti patut diperundingka  ungkup pelajar pra universiti. 

Sapit Menteri Besai madahka ubah dalam sistem pelajar pom enam udah berengkah dipejalaika  dalam taun tu nengah sistem belajar tiga semester taja pan nembiak matrikulasi nembuka pelajar sida dulu enam bulan. 

Lebuh ke diasuh meri penemu senentang pengelama pelajar pom enam ke deka dipandakka ngagai enam bulan tumu ari biasa sereta  sebaka enggau timpuh belajar di kolej matrikulasi, iya madahka pekara deka dipansikka Opis Menteri Pelajar. - BERNAMA