‘Ngiling bidai,’ ukai ‘Ngiling tikai’

SIBU: Jaku ‘ngiling tikai’ (nutup Gawai) ke suah dikena tauka disebut sekeda raban bansa di menua tu dipadahka enda entu betul.

Nitihku siku Kaban Komiti Gerempung Penulis Iban Sarawak (SIWA) Casper Kayong Umping (gambar), bekenaka leka jaku ‘ngiling tikai’ ti ngelaika pengawa nutup Gawai ulih ngelenyauka identiti bansa Iban.

“Raban bansa Iban dulu menya enda kala ngena leka jaku ‘tikai’ ke dianchau ba ruai rumah panjai lebuh Gawai. Kitai ngena ‘bidai’ sereta dianchau jadika selap tikai endur pengabang duduk.

“Kitai ngena ‘tikai’ ninting hari selama aja ngambika bisi dianchau ba ruai tang ukai maya Gawai. Enti maya Hari Gawai nyau deka datai, kitai nganchau ‘bidai’ kelai berengkah nyadi Gawai. Enti ‘bidai’ digiling, nya kelai Gawai badu diintu lalu ‘tikai’ mega berengkah dianchau di ruai sepengudah tutup Gawai. ‘Bidai’ enda ulih dianchau sengapa enti ukai maya ngintu Hari Gawai.

“Aku mantah bendar enti bisi sekeda raban ngena nama ‘Pengerami Ngiling Tikai’ laban nama ‘Pengerami Ngiling Bidai’ endang dipeturun aki ini kitai dulu menya. Aku berasai sinu enti sema nama nya ditukar ngagai ‘Pengerami Ngiling Tikai’,” ku iya madah ngagai Utusan Borneo, lemai kemari.

Kayong ke ngembuan peneleba mayuh dalam adat asal sereta pechayaka adat asal bansa Iban nengah bup ke dikarang iya ‘Raja Singalang Burung’ nerangka salah guna jaku nya tau nyaruka penemu nembiak rebak baru.

“Sebedau nyadi pengarang, aku suba kala gawa nyadi pengerembai program ba Radio Televisyen Malaysia (RTM) dalam jaku Iban di RTM Sibu. Berindik ari pengawa ke dipangku aku nya, aku suah ngelawa menua bukai jauh di ulu entigis betanya bekaul enggau pekara nya.

“’Pengerami Ngiling Bidai’ sigi dikena kitai tang ukai jaku bukai maya nutup pengerami Gawai. Aku bisi penerang ke tegap nama kebuah orang tuai ngena laka jaku nya,” ku iya.

Enti bisi orang ngena nama ‘Pengerami Ngiling Tikai,’ ku Kayong, nya mandangka raban bansa Iban deka lenyau identiti iya kelebih agi ‘bidai’ ditukar enggau ‘tikai’ ke dipeda ukai barang ti berega tauka beguna maya nyambut Gawai.

Tandu iya, ‘bidai’ tu tau dikumbai permaidani ke berega  dipandang sereta endur duduk raban pengabang maya Gawai.

“Taja pan kereban maya ‘Pengerami Ngiling Bidai’ tu dipenyadika Tuai Pengabang ngena ‘tikai’ tang nya agi dikumbai ‘Pengerami Ngiling Bidai’ taja enda ngubah ‘ngiling tikai’.

“Enda ngira nama bansa kereban ba pengerami nya, leka jaku ‘Pengerami Ngiling Bidai’ mengkang dikena ngambika ulih ngetanka adat ke diturun aki ini kitai,” ku tandu iya.

Iya madah, ‘Pengerami Ngiling Tikai’ tu majak tebilang dikena mansia mayuh bepun sepuluh taun ke udah lalu tu ngujungka nembiak rebak baru saru lalu enda nemu mida pengerami nutup Gawai nya.

“Bidai agi bisi dikena kitai, iya nya bansa anyam ke digaga besai, panjai sereta berat. Iya agi bisi dijual ba sekeda endur lalu jarang bendar dikena ba rumah panjai ke diatu.

“Sekeda rumah panjai agi bisi ngena bidai. (Enti) tikai, semua rumah panjai bisi ngena lalu nembiak rebak baru mega ngelala.

“Diatu aku enggau bebendar ngansak ngagai raban ke bekaul nyadung penerang tu  ngambika ngena jaku ‘Pengerami Ngiling Bidai’ dikena ngetanka adat pesaka bansa Iban lalu biar mati anak tetapi jangan mati adat munyi ku sempama jaku Melayu.” ku iya. –Dibali ari Utusan Borneo