AURORA, Colorado - Lelaki ke
disangka nimbak mati 12 iku orang lebuh maya mandang filem baru Batman di
negeri Colorado, James Holmes suah dipeda kundang-mansang ari endur diau iya
sambil mai senyata api.
Holmes, 24, mega
dikumbai orang ke baka bunsu bubut laban enda kala begulai orang bukai ba genturung
alai iya diau.
Iya ngerejister diri nyadi
nembiak ba bidang kedoktoran jurusan sains saraf di Universiti Colorado kenyau
ari taun 2011 tang diripotka benung dalam proses ngetuka diri ngambi program
Ph.D nya.
"Nembiak tu suah dipeda
ngena tanchut becheloreng soldadu enggau betupi," ku siku indu bansa
Mexico, Gabriel Macias ke bekereja di sebuah kilang daging ditu.
Nitihka indu nya, iya suah
meda Holmes pulai-mansang ari apartmen iya sambil mai senyata enggau sarung senyata.
"Kami enda ngelala Holmes
laban iya enda kala bejaku enggau orang. Iya rindu ngurung diri di apartmen iya,"
ku Macias.
Polis madah ngagai
pengarang berita suspek nya nadai ngembuan rekod jenayah lama tang semina kala disaman
dalam taun 2011 ketegal deriba laju.
Tuai Polis Aurora, Dan
Oates madahka, nembiak tu bisi meli lebih 6,000 igi peluru nengah internet kenyau ari dua bulan ti udah.
Nitihka iya, penyampau nya
nyengkaum 3,000 igi peluru raifal, 3,000 igi peluru pistol Glock sereta 300 igi
peluru senapang patah.
Ku Oates, semua nya nyerakum empat
puchuk senyata api ke dibeli Holmes ba beberapa buah kedai senyata ditu kenyau
ari 60 hari ke udah endang nitihka atur undang-undang.
Iya madahka 70 iku orang
bisi bebadi dalam insiden nya nyengkaum tiga iku rayat Indonesia.
"Nyau deka semua orang
ditimbak maya nya," ku iya.
Lebuh pekara nya nyadi kemari,
Holmes ditangkap lepas iya nimbak seraban orang ke benung meda wayang
filem Batman: The Dark Knight Rises maya tengah malam di panggung wayang
Century 16.
Pekara bedarah nya nyadi ba sebuah pusat bebeli-utai ditu.
Polis diatu benung ngiga
siku agi lelaki besenyata ke bisi kaul kes bebunuh bebala mayuh nya.
Bandar tu kira-kira 32 kilometer ari endur kes bunuh
bebala mayuh di Sekolah Tinggi Columbine dalam taun 1999.
Dalam insiden nya, dua iku
nembiak nimbak mati 13 iku orang sebedau iya munuh diri. - Agensi
Tiada ulasan:
Catat Ulasan