10 pasar pemakai pengabis manah di dunya

Tiga buah tempat ba Asia Tenggara bisi diangkatka ba penuduk ke pengabis atas dalam ranking 10 pasar pemakai pengabis manah di dunya. Bangkok, Thailand nyadi pasar ke pengabis manah di dunya ketegal ke ngembuan mayuh bansa pemakai sereta mayuh alai milih.

Chara milih pasar tu dipejalaika nengah laman siber. Raban editor ngelawa laman web VirtualTourist.com. Sida tu mih ke ngeletakka indu nengeri Thai nya teulihka mark ke tinggi ketegal iya ngembuan mayuh bansa pemakai baka pad Thai, salad gadung rungan, asi pulut mango sereta manuk kari gadung.

VirtualTourist.com nya laman dikena temuai ba dunya ngelawa menua nengah chara internet lalu iya sebagi ari TripAdvisor Media Group ke udah berengkah dikena kenyau ari taun 2008. Iya ngembuan 1.2 juta raban ke udah ngerejista kediri ari 220 buah menua di serata dunya.

Raban temuai tu udah nuduhka penemu Soi Rambuttri nyadi pasar ke tebilang lalu Soi 38 ke semak Sukumvit nya pasar makai lemai ti dibuka nyentuk ke jam tiga pagi.

Penuduk kedua nya Singapore ketegal bisi ngembuan mayuh bansa pemakai ari pemakai bansa China, Melayu, India enggau Peranakan. Kelimpah ari nya mega pasar pemakai ba Singapore nya beresi sereta likun.

Pemakai ti tau diuji di Singapore nya nyengkaum Hainanese chicken rice – asi ke bisi beringkat baka agar-agar enggau asi, entimun, lia tutuk besereta enggau sambal pedas. Laksa  nya pemakai orang Peranakan   mega entara pemakai ke patut diuji bala temuai.

Ba penuduk ketiga nya Pulau Pinang ke ngembuan pemakai pupu raban bansa. Baka Singapore mega, pemakai ba Pulau Pinang asal ari pemakai Melayu, China enggau India. Pemakai ke patut diuji empa ditu nyengkaum char kway teow, assam laksa enggau satay dagin sapi, manuk tauka babi.

Kelimpah ari nya, malin temuai Frommer mega ngenamaka Bangkok, Tel Aviv enggau Istanbul nya pasar ke ngembuan penuduk ke tinggi ti patut ditapatka bala temuai.

Di baruh tu 10 pasar pemakai ke pengabis tebilang di dunya belalauka VirtualTourist.com:

Ø  Bangkok, Thailand

Ø  Singapore

Ø  Penang, Malaysia

Ø  Marrkech, Mahgribi

Ø  Palermo, Sepanyol

Ø  Ho Chi Minh City, Vietnam

Ø  Istanbul, Turkey

Ø  Mexico, Mexico

Ø  Brussels, Belgium

Ø  Beachside Ceviche, Belize

(Dibali ari The Sun)