Raya dalam jaku Iban

Enda lama agi raban bansa Melayu Malaysia enggau sida ke bepengarap Islam deka ngintu pengerami Hari Raya Aidilfitri. Nyadi kenang ke sekali tu ukai pasal Hari Raya lalu ukai mega pasal raban bansa Melayu.

Kenang pengarang sekali tu nguji ngenang leka jaku raya  ke suah mega dikena dalam jaku Iban. Kebuah ke ngenang leka jaku tu laban kala suba bala pangan betalat enggau aku laban aku ngena leka jaku nya lebuh bejaku dalam jaku Iban. Kadang-kadang kitai enda nimbal ukai kitai nadai penemu tauka alah tang ketegal enggai nyimaka ati pangan diri enti penemu kitai bisi ngelui mimit ari sida. Tang mega munyi prinsip China, undur ukai reti kitai alah.

Dalam teori linguistik sereta dalam Sistem Jaku Iban di Sekula, jaku Iban endang ngembuan prinsip jaku seperugan. Ambika chunto, utai tumbuh ke tau dipasuk dalam kategori seperugan nya baka pisang enggau buluh. Baka nya mega jaku seperugan nya mai reti jaku ke datai ari pun ke sama baka jaku Melayu enggau jaku Iban. Bisi orang linguistik madahka jaku Iban tu sebagi ari jaku Melayu. Aku ditu ukai deka betalatka jaku Iban nya sebagi ari jaku Melayu laban pekara nya tau dikerandauka ba karang ke bukai. Mayuh leka jaku Iban endang sebaka enggau jaku Melayu ukai ketegal kitai nginjau leka jaku nya ari Melayu lalu ukai mega ketegal kitai udah lama begulai idup enggau raban bansa Melayu tang bisi leka jaku nya endang sama diempu baik raban bansa Iban tauka Melayu. Pekara ti baka tu mih ke bedau dipansik orang ke landik dalam bidang linguistik.

Leka jaku raya  munyi ke udah disebut endang lama udah bisi sereta dikena dalam jaku Iban. Uji beratika gaya leka jaku tu dikena dalam sekeda konteks.

Dalam bup ke nerangka reti leka jaku, leka jaku raya nya mai reti besai tauka pugu. Iya mega tau mai reti balat, udu tauka serius.

Buah raya nya reti iya musin buah ke mayuh. Buah raya enti suba suah bendar nyadi maya ujung taun tang ketegal ubah gaya hari buah raya mega suah nyadi maya bulan bukai.

Pasang raya nya ai pasang maya bulan pernama tauka maya bulan penuh. Maya pasang raya ai pasang besai. Tengah hari raya nya mai reti tengah hari nemban.

Tabin raya nya tabin ke balat tauka udu, tau bendar dibai ke kelinik enggai enda ulih diubat agi.

Enti leka jaku ngerayaka nya ngasuh besai tauka ngasuh balat lalu leka jaku pengeraya nya mai reti besai, balat tauka serius. Chunto – Naka ga pengeraya orang indu nya bejalai.

Ke penudi nya pasal jalai raya. Bisi bala pangan aku enda setuju aku ngena leka jaku jalai raya dalam ayat jaku Iban. Ambika chunto – Mayuh amai kerita ba jalai raya sehari tu. Jalai raya nya jalai besai ke udah dibelangkin. Bisi bala pangan madah leka jaku jalai raya bisi bebau leka jaku Melayu lalu ukai asal jaku Iban. Munyi ke udah diterang di atas tadi raya nya endang bisi dalam jaku Iban lalu nadai kebuah kitai enggai ngena iya dalam jaku surat. Nama dih bida jalai raya  enggau jalai alun? Jalai raya nya udah diterangka tadi. Nyadi rambai jaku jalai alun  nya jalai tinggi ketegal ditimbuk enggau tanah, batas baka jalai ban. Jalai ke suah sereta patut dikumbai jalai alun nya ke ba menua pesisir, jalai nuju genturung menua tauka rumah panjai. Enda patut ga semua jalai baka lebuh raya, denai, lebuh/street, jalan pasar  nya semua dikategori kitai enggau siti rambai jaku – jalan alun?