‘Asai telih digerami garam’, ku Jimbun

KUCHING: Leka jaku ke tau ngasuh sesebengkah bansa ensiban tauka nyima enda patut sengapa dikena, pia ku Penolong Pemesai Pemansik Pengawa Rama, Opis Kunsil Penyimpan enggau Penusun Adat Asal Menua Sarawak (MAIS), Jimbun Tawai.

“Aku besetuju enggau penemu mensia mayuh ti ngenggaika sekeda palan karaoke tauka pub ngena leka jaku ke bangat ngemaruhka bansa diri.

Seraya madahka ulah ti enda bebasaka bansa bukai sepekara ti balat sensitif, iya mega nangkan sebarang pengawa bekaul enggau daya idup sesebengkah bansa enda patut sengapa dipejelah laban nya tau ngeruga kaul.

Ngelansa mimit berita ke ayan ba sebengkah surat kabar menua tu, Jimbun enda lantang ati laban pengawa meri nama palan nya balat ngemaruhka bansa Dayak.

“Senentang ngena nama ti tuchi ke bekaul enggau adat tauka Petara: baka Keling, Kumang, Panggau Libau, Telaga Kumang enggau sekeda nama ke bukai endang enda patut.

Utai ke baka tu patut bendar diperunding lebih kitai bansa Iban.

Beserak enggau penemu ketuai raban bansa kitai Iban bukai, iya mega irau, utai ke baka nya enti enda dikemerat tau nyarut penemu.

“Baka kami ke tuai, enti meda utai ke nyadi sereta ngemaruhka bansa kitai ‘Asai telih digerami garam’,” ku iya lebuh dikerandau Utusan Borneo kemari.

Taja pan asai ati telih, tang pekara nya enda tentu ulih ditagang laban sida (orang dagang) nya ngiga penatai pemisi.

Iya meri penemu nya lebuh dipinta meri timbal pasal berita ba surat khabar kemari ti madah, ketuai raban bansa Dayak pelilih Sibu balat nyakal sekeda ari palan karaoke tauka pub ti ngena leka jaku ke tau ngenyima sereta ngemaruhka bansa Dayak.

Temenggung Sir Adrian Ringgau madah, diatu ba sitak Sibu udah bisi palan karaoke tauka pub ngena nama ‘Dayak Heaven Karaoke Music’.

Ku iya, nama nya tampak bendar mandangka deka ngemaruhka tikas bansa Dayak.

“Enti deka ngena nama Dayak, nya nadai salah tang enti madahka pub tu ‘Heaven Dayak’, tu salah bendar.

“Kitai enggai bansa Dayak dikumbai orang rindu ke pub laban enti nama iya pub persepsyen mensia mayuh endang enda manah,” ku iya lebuh dikerandau Utusan Borneo, ensana. -UB