Tuai raban bansa Dayak nyakal sereta nyima

SIBU: Tuai raban bansa Dayak sitak tu balat nyakal sekeda ari palan karaoke tauka pub ti ngena leka jaku ke tau ngeruga sereta ngemaruhka bansa Dayak.

Temenggong Sir Adrian Ringgau madah, diatu ba sitak Sibu udah bisi palan karaoke tauka pub ngena nama ‘Dayak Heaven Karaoke Music’.

Ku iya, nama tu tampak bendar mandangka deka ngemaruh tikas bansa Dayak.

“Enti deka ngena nama Dayak, nya nadai salah tang enti madahka pub tu ‘heaven’ Dayak, tu salah bendar.

“Kitai enggai bansa Dayak dikumbai orang rindu ke pub laban enti nama iya pub persepsyen mensia mayuh endang enda manah,” pia ku iya maya dikerandau pengarang berita, kemari.

Ku iya, sida ti beempu pub patut bejimat agi ngaga nama pub sida laban enti salah tau ngasuh orang bukai ringat.

“Giga mih nama ke badas sereta engkeman agi. Kitai enda nagang sida bisi pub tang anang enda ngira baka ni asai ati orang bukai,” ku iya madah.

Ukai semina nya aja, ku Adrian, diatu mega mayuh pub berambaika leka jaku ‘Keling enggau Kumang’.

“Ba kitai bansa, ‘Keling’ tauka ‘Kumang’ tu petara kitai.

“Nya alai, enti dikena ngaga nama pub, nama tu enda tau dikena,” pia ku iya madahka baru.

Ku iya, agi mayuh leka jaku bukai ti engkeman dikena ngaga nama pub tang ukai leka jaku ti tau ngenyaika bansa orang bukai.

Baka penemu iya Pemancha Kunsilor Stanley Gramong madah, pub ti ngena nama ‘Dayak Heaven’ nya aruh lengkas nukar leka jaku nya ngambika mensia mayuh lebih agi bansa Dayak enda nyima.

“Ukai semina bansa Iban aja ringat meda pekara tu tang aku pechaya bansa Dayak ke bukai bela enda setuju nama tu dikena.

“Kitai ngarap sida tu ulih beratika pekara tu enggau nyemetak agi laban kitai enggai pekara tu ngenyaika bansa Dayak,” pia ku iya madah.

Bekenangka pub ti ngena nama ‘Keling enggau Kumang’, ku iya, pekara tu mega tau ngemaruhka adat bansa Dayak.

“Nama tu dikangau kitai Iban maya bisi miring tauka Gawai besai.

“Nya alai, ba penemu aku, nama ‘Keling enggau Kumang’ kelalu tinggi enti dikena ngaga nama pub,” ku iya madahka baru.

Penghulu Enyang Menchol mega mantaika penemu diri ningkah pub ke ngena nama ‘Dayak Heaven’ laban kenu ku iya, pekara tu ukai semina nejuka bansa bukai ba menua tu aja ngembuan penemu ke enda manah meda bansa Dayak tang mega bala temuai ari menua tasik.

“Enti dikena ba pengawa daja bukai ti manah agi enda ga ngawa ngena sepil tauka jaku ti bekaul enggau Dayak.

“Tang enti dikena ba palan ke enda nyengala manah ba runding mensia mayuh baka pub tauka palan karaoke, nya tau mayuh ngenataika penusah bukai,” pia ku penemu iya.

Ba senentang dagang temuai, pekara baka tu kenu ku Enyang tau ngelabuhka tikas temuai ari menua tasik nemuai ngagai nengeri tu lebih agi diatu bansa Dayak baka Iban bisi numbuhka program nyemilik.

“Tu ti dikenangika bansa Dayak. Kitai enggai bala temuai ari menua tasik ngembuan peragam ke enda manah ba bansa Dayak,” ku iya nandu baru.

Kenu ku iya, nama enda tetentu mai besai reti ba pengawa dagang tang penguntung bepun ari baka ni servis narit mensia mayuh.

Nyadi ba penemu Penghulu Jeffery Sut Anggan, ulah pub ti ngena nama nya baka ti mandangka bansa Dayak ngembuan ulah ti enda manah.

“Dah ga bisi bansa bukai nyebut kitai tu pengirup nambahka agi pub tu ngena jaku ‘Dayak Heaven’.

“Nya alai, kitai ngarika kitai bansa ngasuh pub tu nukar nama nya enggau engkeman agi.

“Nadai salah ti sida ngena nama ‘Heaven’ pub tauka karaoke tang enda manah enti ngena ‘Dayak Heaven’,” ku iya nandu baru.

Bela bisi datai maya tu iya nya Penghulu Richard Ampi enggau Penghulu Philip Kayak. -UB