Kena pengeraja asal Dayak enggau manah

SIBU: Indu bansa Dayak ba menua pesisir ditangkan ngambika landik ngena semua pengawa asal Dayak ke bisi dikena ngangkatka penatai pemisi ruang bilik.

Chairman Sarakup Indu Dayak Sarawak (SIDS) Pampang Sibu Alice Jawan madah, pengawa asal Dayak ke ulih ngangkatka penatai pemisi iya nya asil pengelandik jari baka nganyam tikai, perengka marik, kain tenun enggau utai bukai.

“Indu Dayak ke diau di menua pesisir tauka ulu entigis aruh landik ngambi awak tu kena ngerembaika pengelandik sida.

“Kelimpah ari belajar ngaga pengawa asal baka pengelandik jari, kita mega ulih ngerembaika asil ngagai makit.

“Tu laban pengelandik jari Dayak bisi peluang dijual ba makit antarabansa enti digaga enggau mayuh,” ku iya.

Iya bejaku munyi nya lebuh nguluka raban SIDS Sibu nemuai ngagai Rumah Jalak Kusau di Tanjung Penasu, ditu bedau lama tu tadi.

Tuju ngatur program nya laban deka nemuai ngagai kaban SIDS ti diau ba menua pesisir seraya meri licha bekaul enggau tuju, juluk enggau objektif sarakup kelebih agi ngagai raban indu.

Urung 100 iku peranak rumah panjai nya enggau sekeda ari rumah bukai bisi datai ngulu program nya.

Sama bisi datai iya nya Tuai Rumah Jalak Kusau enggau Tuai SIDS Pelilih Penasu Regina Emu.

Alice madahka semua orang indu Dayak enda ibuh nangi enti sema nadai puku enti deka ngemansangka asil pengelandik jari ngena chara dagang laban mayuh bansa bantu bisi disediaka perintah ke bekaul.

Tandu iya, enti semua orang indu bisi ngembuan pengelandik ba bidang pengelandik jari, nguna meh pengelandik nya ngena chara dagang laban peluang endang bisi dikena ngerembaika pengawa nya.

“Iya ke beguna bendar, kita aruh muka mata sereta landik ngambi awak. Anang ketegal ke diau di menua ulu nyadika penanggul kita ngiga tauka nambahka penatai pemisi diri,” ku iya.

Nyerumba enggau nya, ngagai raban indu Dayak ke bedau nyadi kaban SIDS ngambika ngerejister diri masuk nyadi kaban enggau sarakup nya.

Nengah chara begempung, indu Dayak deka didinga lalu mayuh penguntung diulih ari nya.

“SIDS palan endur ngangkatka indu Dayak ngambika ulih ngemansangka diri ari segi ekonomi, pekara pelajar, tikas pengidup enggau utai bukai seninjik enggau pemansang dunya.

“Nya meh juluk kitai, ngambika bansa Dayak ulih besemekih sereta enda tinggal ari bansa bukai,” ku iya.