Kaul enggau perintah besai dikemerat: Taib

KUCHING: Kepala Menteri Pehin Sri Abdul Taib Mah­mud enggai ngenang panjai senentang peminta ari sekeda raban menteri dalam Ba­risan Nasional (BN) enggau penyakal ngambika royalti petroleum ditiki.

“Baka ke suah, aku enggai ngenang panjai senentang pekara tauka isu ti patut dik­erandau dulu enggau Menteri Besai (MB).

“Nya mih chara ke suah di­titihka aku ba pengawa ngemer­atka pemanah sereta penegap kaul entara perintah besai enggau nengeri,” ku iya.

Bedau maya aku beratika pekara tu enggau silik agi,” tandu iya.

Taib mansutka penerang tu lebuh dikerandauka pemberita ba pengawa Ngelalu Penga­bang nyerumba pengerami ngintu Hari Raya ti diatur ba Palan Aum Besai Borneo Kuching ditu, Hari Minggu tu tadi.

Iya madahka diri nemu sekeda menteri dalam BN enggau penyakal udah bejaku pasal ungkup Sarawak eng­gau Sabah ngelui ari 5 persin baka ke diterima diatu.

“Aku nemu bisi orang bejakuka pekara tu, tang iya patut nemu ba tikas ni penuduk Sarawak sebedau tu,” ku Taib.

Ba pun bulan Lapan tu tadi, Menteri Besai Datuk Seri Najib Tun Razak bisi mansutka pemutus perintah ti deka numbuhka special komiti beratika royalti petor­leum ungkup nengeri pantai timur.

Najib madahka komiti nya diberi timpuh enam bulan bejalaika pansik senentang pekara nya sebedau dikena­taika ngagai perintah besai.

Bedau lama tu tadi, Menteri Kanan ke mega Menteri Pe­mansang Tanah Tan Sri James Masing madah komiti ke ditumbuhka nya patut mega beratika penyampau royalti petroleum ngagai Sarawak enggau Sabah.

Masing madah, Sarawak enggau Sabah mansutka asil petroleum ke pemadu mayuh enti dibandingka enggau nengeri bukai lalu ketegal nya royalti 5 persin ke diterima kedua-dua nengeri nya sepengelama 40 taun ke udah patut dipera­tika baru.

Iya mega madah, komiti nya patut matak peranak Sarawak ngambika tau sama bela mantaika penemu.

Chairman Parti Tindakan Demokratik (DAP) Nengeri Sarawak Wong Ho Leng mega nyukung penemu Mas­ing alai iya madahka royalti nya patut ditikika ngagai 20 persin diatu ketegal kedua-dua nengeri tu agi jauh tinggal ari atur pemansang.

Wong madah, duit ari royalti ke lebih ulih dikena ngemansangka infrastruktur di Sarawak

Dibali ari: http://www.theborneopost.com/