Nyadi Rayat Malaysia ke amat Malaysia sereta ngembuan ulah patriotisma

Sebulan tu raban pengarap Isam benung ngeramika Hari Raya Aidil Fitri. Lebuh ke kiruh ngerami enggau sida kitai ke rayat Malaysia mega anang enda ingat bisi agi pengerami tauka pengawa ke besai iya nya Hari Merdeka. Hari Raya dirami ketegal ke udah menang napi pejalai spiritual maya bulan Ramadan tang Hari Merdeka minta semua peranak menua Malaysia ngembuan pengerindu ke menua sereta beterima kasih ketegal ke udah merdeka ari perintah koloni.

Nama kebuah hari merdeka nya besai bendar reti ngagai semua peranak Malaysia? Enti kitai meratika semua utai ke nyadi ngelingi kitai kemaya hari tu dia kitai ulih meda pemansang fizikal enggau sosial regas amat nyadi. Nya alai kitai patut nemu pemesai reti merdeka ke udah diasaika kitai  kelebih agi lebih ke nentuka pejalai pemansang menua kitai jemah ila.

Uji bandingka enggau maya kitai enda ulih meri pemutus penemu senentang menua diri empu ketegal kitai dipegai perintah kolonial. Enti kitai berunding ke pekara tu tentu kitai bisi ngembuan ati ti siru, taluk sereta angkun ke menua kitai empu. Nya alai mayuh amai chara dikena kitai mandangka pengerindu kitai ke menua. Kitai patut bendar ngembuan semengat patriotisma.

Patriotisma mai reti rindu, angkun sereta taluk ke menua. Enti kitai patriotik, nama pekara ke patut dikerejaka kitai dih?

Ulah patriotik ukai semina ngitang, ngantung tambai tauka bediri dedegi lebuh ninga lagu Negaraku. Semengat patriotik nya lebih ari pekara ke udah disebut nya. Enti kitai ngembuan semengat patritik kitai ngarapka pemanah ke menua kitai lalu ngereja pengawa ti manah nya mai temegah ati ke menua.

Nya alai, lebuh ke bulih midul mas ba pekit lumba enggau main Olympik tauka menang pekit main bol tikas antarabansa, kitai nya mandangka temegah ati ke menua kitai empu. Ngembuan temegah ati sereta pengarap nya sebengkah ari tukuh patriotik laban iya ngembuan kualiti ti manah ke menua.

Patriotisma mega ngembuan pengasai ati ti dekaka penyerakup sereta ngembuan tanggung pengawa ke sama entara pupu raban bansa enggau bebida pengarap. Menua ke ngembuan pupu raban bansa sereta pengarap ke bebida baka Malaysia patut bendar ngembuan pekara ke nyemakaka sida laban pekara ke bebida endang meruan bisi dalam tiap-tiap raban nya.

Nya alai, semengat patritisma sereta pengerindu ke menua patut bendar ngelui  ari pekara bukai lalu nyadika pugu bekaul enggau pangan diri.

Malaysia kemaya hari tu benung datai ba seraka pemansang, globalisation tau bendar ngeruga semengat patriotisma peranak menua Malaysia. Pekara tu ukai semina nanggulka menua Malaysia tang mega menua bukai.

Lebuh kitai majak ngeramika hari kitai merdeka ari kolonial barat dia kitai majak mega ngembuan penusah deka ngajar sereta ngiri semengat patriotisma ngagai nembiak rebak baru. Nya mih entara penguji ke ditapi ke kitai kemaya hari tu. Orang ke serak dulu baka sida ke udah tuai nadai tentu penanggul laban sida ngasaika pemedis ngulihka merdeka ari perintah koloni.

Pengawa ke ngelepaska diri ari ke dipegai orang bukai ukai semina bepun ari berunding di London dalam taun 1956 tang jauh dulu ari nya. Nya alai kitai seruran dipadah sereta diasuh ngasai sereta beterima kasih ke pengawa bala ke tuai dulu suba.

Semengat patriotik enda tau enda diiri ngagai ati sereta runding peranak menua Malaysia. Pengawa ti serius patut bendar dikerejaka dikena narak semengat patritotik tu kelebih agi ngagai nembiak rebak baru kemaya hari tu.

Taja pan patriotisma tu pekara ke abstrak sereta utai ke diasai dalam ati, tang iya patut bendar nyadi tanggung pengawa semua dikena ngirika pengerindu ngagai menua diri empu. Sistem pelajar menua patut ditempa enggau pengawa ti narakka nembiak enggau pekara ti ngasuh sida ngembuan temegah ati ke menua diri empu.

Dipelabaka enda chukup enti semina meri fokus ngagai mata pelaja Sejarah tauka Nationhood Studies. Pengajar ngembuan tanggung pengawa ke berat narak nembiak senentang pemesai reti semengat patriotisma.

NGO mega tanggung pengawa madahka mensia mayuh pemesai guna ngembuan semengat patriotisma. NGO tu mih nyadika andau entara perintah enggau mensia mayuh. Semua aktiviti ti dipejalaika sida patut iya ke non-partisan sereta nadai nyukung ni-ni ideologi politik. Peranak menua enda patut dipejal enggau pekara politik lebuh ke narak sida enggau semengat patriotisma.

Endang juluk ati semua rayat Malaysia ke dekaka menua ke likun, bisi pemaik sereta harmoni. Rayat Malaysia ke amat rindu ke kaul entara peranak menua iya selalu manah sereta meruan dijaga. Pengerindu ke menua nya mih ke ngerapitka semua peranak menua tu. Nya alai ketegal ke nyadi peranak menua Malaysia, kitai patut bendar temegah ati laban udah mujur ngintu pengerami Hari Merdeka ninting taun. Rayat Malaysia mega patut ngembuan runding tanggung pengawa narak semengat patriotisma ukai semina dilempai ba bau perintah aja tang semua kitai ke ngaku diri peranak Malaysia ke chulin ketegal kitai ngembuan pengerindu ke Malaysia.