Fokus Blueprint Pelajar Bansa

Apin lama ti udah bala tawing aku ba Opis Menteri Pelajar serebana laban dikangau bala tuai pemesai sida, diasuh nembuka pengawa pasal bup blueprint pelajar bansa dideka dipejadika Menteri Besai kena 11 hari bulan September tu ba Kuala Lumpur Convention Centre. Sida ke dikangau tu gawa enda milih siang enggau malam kelimpah ari hari kemisi ujung minggu enggau Hari Merdeka. Pengawa sida nya ngalihka blueprint ke jaku Melayu. Utai ke nyelai nya, blueprint nya udah dulu ditengkebang sereta ditulis dalam jaku English.  Pekara ti deka dikenang aku ditu nya senentang isi pekara ti bisi dalam blueprint nya.

Fokus Blueprint Pelajar Bansa 2013-2025  bisi dua iti; iya nya deka nempa pengajar ti semitan sereta ngasilka nembiak ke ngembuan runding ti kritikal. Dua elemen tu deka dikemerat dalam pengawa ngubah tauka transformasyen sistem pelajar.

Pengawa ti udah diperambu nya nyengkaum iya ke lama enggau iya ke baru sereta ngembuan tuju ngambika pekara ti diajar ba kelas nya semitan agi sereta ngasilka nembiak ke ukai semina ulih ngapalka pelajar aja.

Bepelasarka pengelemah ti udah diakuka perintah baka pengelemah dalam sistem enggau penuduk nembiak enti dibanding enggau tisih antarabansa dia perintah udah beratika baru sereta ngemanahka agi kurikulum sekula primari enggau sekondari ngambika ulih ngasilka nembiak ke ngembuan runding ti kreatif enggau kritis agi.

Mensia mayuh bisi bendar ngembuan pengirau ati senentang prestasi nembiak ke majak nurun ba tikas luar taja pan agi bisi ga sekeda ke menang mayuh perais ba tikas antarabansa kelimpah ari ke ngembuan sekula lati nyengkaum 66 buah Sekula Beprestasi Tinggi.

Dikena ngangkatka tikas pengajar, profesyen pengajar patut ulih narit mayuh agi orang ke pandai sereta landik enti ditambah enggau peluang niki pangkat sereta pemansang ari tikas karier.

Blueprint nya endang disadangka ngembuan pemujur enggau pengelemah dalam sistem pelajar, lalu ari nya charta ke ngembuan langgur pengawa deka  digaga ngambika ulih mai sistem pelajar nya nuju pelajar kelas dunya.

Malaysia tu di entara sekeda menua ke ngagihka ungkus ti besai ba bajet bansa dalam pengawa pelajar (16% dalam taun 2011). Nya alai mensia mayuh endang ngembuan pengarap ti besai ke pemujur duit ke udah nyadi anak puku dalam pekara tu.

Nya alai Opis Menteri tu dipinta ngaga review isi pekara dalam blueprint tu sereta ngiga chara ti semitan agi ngasilka nembiak ti mujur bepelasarka duit ti udah diagih nya tadi.

Ngelama tu ubah ke udah digaga balat agi ngemeratka perengkaguna enggau sistem pelajar tang dalam blueprint 2013 - 2025 tu deka balat agi ngemeratka pengajar ke ngemujurka sistem pelajar. Nya alai pekara ke bekaul enggau pengawa matihka pengajar, matihka baru (retraining) sida sereta pengawa “up-skilling” deka balat agi diatur jemah ila.

Ambika banding, 70,000 iku pengajar  English udah diasuh ngambi peresa ‘the Cambridge Placement Test’ lalu sida ke bulih mark ti baruh tauka enda tentu berapa nya deka diberi kus “up-skilling”.

Langkah rapat tu endang udah dipejalaika diatu taja pan blueprint bedau rasmi dipejalaika  ke di baruh kuasa Sapit Mentri Besai sereta Menteri Pelajar Tan Sri Muhyiddin Yassin.

Sepengudah dokumen dibantai ngagai orang mayuh, Opis Mentri deka ngumpul semua jaku timbal senentang pekara nya ari stakeholders tauka sida ke bisi kaul enggau pengawa pelajar.

Udah nya asil iya deka diperatika baru lalu digumpul nyadi blueprint ke penudi sebedau diserah ngagai Kabinet dalam bulan December.

Opis Menteri Pelajar berasai temegah ati laban ulih ngelumu asil pekara tu nyadi siti blueprint ti keterubah iya asil ari ngulihka tuduh penemu ari gerempung antarabansa baka Bank Dunya enggau Unesco, universiti enggau gerempung ba menua tu empu sereta mega mai raban mensia mayuh berunding ba mija segala dalam timpuh beberapa taun ti udah.

Endangka gaya iya, stakeholders ari sida apai indai enggau komuniti lalu mega sektor swasta enggau opis pelajar nengeri patut bisi diberi peluang ngenataika tuduh penemu diri senentang sistem pelajar menua tu.

Taja pia pekara ke tau ngirauka ati nya diatu nyau mayuh mega sekula prebet enggau international schools nambah penyampau sekula vernakular enggau sekula agama. Ketegal nya, program ti mai penyerakup bansa patut bendar diperatika seraya penumbuh sekula ti baka tu.

Kelimpah ari nya, pekara ti tau mega diperatika nya senentang penyarai entara penempa nembiak ke belajar  ba institut pelajar tinggi. Nitihka data kemaya hari tu, 70%  ari sida ke belajar ba institut pelajar tinggi nya sida ke indu. Utai ke selalu nyadika tanya nya kinika penunga bala nembiak lelaki ba sekula. Isu tu udah lama amat nguyum baka pisa ba opis menteri tu lalu iya dikearapka ulih diputarka munyi ke disebutka dalam blueprint tu.

Nyerumba enggau nya mega, mayuh orang beperagam nembiak kitai deka balat agi diterima gawa sechara global enti sida ngembuan pengelandik bejaku dua bansa jaku tauka bilingual, enti enda trilingual. Nya alai pengawa ke ngenegapka pengelandik sida bejaku English patut balat agi dipejalaika.

Najib pan udah madahka pengasai ati diri ke deka meda mata pelajar English Literature dipasuk ke dalam kurikulum sekula lalu pekara tu udah diterima manah ari raban apai indai enggau bala pengajar.

Tu mih sekeda isi pekara ti deka dikenataika Menteri Besai Datuk Seri Najib Tun Razak lebuh ke bejadika blueprint nya ila. Kenu ku berita, program tu deka dibantaika terus ari televisyen ba bagi RTM, TV3 enggau Astro jam 10 pagi.