Nama Kebuah Kuda Belang Bisi Surik

Nama kebuah kuda belang bisi surik? Pekara tu udah suah bendar dipetalatka raban saintis kenyau ari dulu suba. Pansik kemaya hari tu madahka surik chelum enggau burak ba tubuh kuda belang nya dikena iya muru lalat.

Lalat kuda tauka nama sains iya dikumbai Tabanide sp. Diperatika enda tentu deka ngampir  kuda belang ti bisi surik chelum enggau burak nya enti dibandingka enggau bulu kuda ti bechura burak, pirang tauka chelum. Tuju surik tu beguna amat dikena nyaga diri ari dirampit penyakit.

Sussane Akesson, siku raban evolusyen ekologi ari Universiti Lund, Sweden, ngembuan penemu ke madahka indu utai endang bisi tuju dalam gaya pendiau jelu. Iya bisi udah nguji model kuda burak, chelum sereta ke bisi surik enggau lapis gam indu utai ke nadai bebau.

Ari asil uji iya nya pansut gelumbang penampak ke diperatika suah agi begetar nengah chara landai lebuh panchar mata panas mantul ba kuda ti bebulu pirang enti dibanding enggau semua tubuh kuda ti bechura burak. Getar landai tu dikumbai ‘penampak bekutub linear’ lalu bisi diasilka ba ai, iya nya endur lalat nyaru sereta betelu.

“Asil ke ditemu tu beguna amat laban kitai suah melabaka utai ke bebida nyadi entara bulu chelum enggau burak,” pia ku penerang Akesson. “Ba penemu kami, kuda belang tu asal iya bebulu chelum tang ngasilka surik burak dikena iya madamka tanda ari penampak bekutub linear ti mantul ari tubuh iya nya tadi.”

Penemu Akesson bisi ngeruga runding orang bukai laban enti iya baka nya, nama kebuah enda semua kuda bisi surik chelum burak enti tuju surik nya dikena nyaga iya ari ditutu lalat? Siti ari faktor nya ketegal kuda udah lama dijinakka mensia kenyau ari beratus-ratus taun ke udah. Faktor bukai nya ketegal ari endur kuda nya diau. “Kuda belang suah makai rumput ba padang tebuka maya panchar mata panas terit ba savana Afrika. Ba endur ti baka tu lalat endang mayuh. Nya alai iya dipejal ngiga chara nyaga diri ari ditutu lalat,” ku Akesson.

Pansik ke lenak agi senentang pekara tu patut bendar dipejalaika. Mensia patut ngena penemu tu enti sema amat bisi timbal ari penampak bekutub linear tu beguna dikena nyekat penyakit ti datai ari indu utai. Utai ke petang tauka chelum ulih dikena nyadika umpan dikena nangkap lalat tauka baju ti bebelang ulih nyaga diri ari indu utai ke mai igi penyakit. (Dibali ari majalah Knowledge, Malaysian Edition, Volume 1 Issue 4)