Polisi Nginjau dalam Sistem Sepil Jaku Iban

Penerang tu deka ngenangka polisi nginjau dalam Sistem Sepil jaku Iban ke dikena di sekula kemaya hari tu. Tuju penerang tu awakka bala pemacha ke luar ari sistem sekula ke enda kala ngambi mata pelajar Bahasa Iban nengah chara formal bisi penemu senentang pekara tu.

  

Polisi nginjau

Jaku Iban tu siti ari jaku di Malaysia ti benung mansang sereta ngerembai  nyerumba singkang pemansang dunya kemaya hari tu. Dikena napi pemansang tu, atur ti ngumpul, nuru lalu ngemasukka jaku injau ari jaku bansa bukai ke pengaya jaku sigi chakah dipejalai ngambika jaku Iban ulih seraris enggau jaku bukai ti udah tegap.

Polisi nginjau dalam jaku Iban lebih berat agi menatika jaku English ti endang nyadi ke ‘lingua-franca’ ti entap agi dikena dalam komunikesyen entarabansa. Ari segi sejarah, jaku English mayuh udah berasuk enggau jaku Iban kenyau ari jeman Rajah ti megai menua Sarawak. Taja pia, jaku seperugan ti mungkur jaku etnik ti engkeman enggau daya idup Iban mega dikenatika lalu diinjau dalam jaku Iban ke pengaya jaku Iban.

Sistem sepil jaku injau

        Dalam proses ti nginjau jaku ari jaku orang bukai, bisi tiga chara nginjau jaku ti nyadika pelasar lebuh ti ngaga sistem tu. Chara nya nginjau ari jaku seperugan (nusantara), jaku English enggau nginjau ari jaku bansa bukai.

Jaku injau ari jaku seperugan (Nusantara)

         Jaku seperugan, kelebih agi jaku Melayu mayuh diserap ngagai jaku Iban. Sistem sepil tu netapka chara nginjau jaku ari jaku bansa bukai enda bepanggai penuh ba sistem sepil jaku asal ti alai nginjau tang nitihka sistem sepil jaku Iban ti nginjau jaku nya. Taja pia, bisi mega leka jaku ti diinjau nya agi mengkang sebaka. 

Injau terus

       Dalam proses nginjau ti baka tu, leka jaku ti diinjau, diambi sereta diterima enggau silik ari jaku asal. Reti nya iya nadai berubah ari segi sepil enggau reti  taja pan disebut nitihka kaul dilah Iban.

Chunto:

karya     vokal         bebas

Jaku injau ari jaku English

        Jaku English nya sebengkah jaku bansa bukai ti chakah diinjau ke dalam jaku Iban dalam semua bidang pelajar berindik ari jaku tu udah entap dikena sereta ngerembai serata dunya  ti  ngujungka  iya  diaku  nyadi  jaku  entarabansa.   Proses  nginjau jaku English endang diatur enggau cheremat ngambika iya entap lalu nadai menyati jaku Iban empu. Gaya  jaku  injau  ari  jaku  English  ti  dikemisika  dalam  jaku  Iban  tau  dibagi  ngagai beberapa kategori iya nya injau terus, injau salin, injau pengasai enggau injau serap.

(i)       Injau terus

        Sama baka atur ti nginjau jaku Melayu, leka jaku ti diinjau, diambi sereta diterima enggau silik ari jaku asal. Reti nya iya nadai berubah ari segi sepil enggau reti taja pan disebut nitihka kaul dilah Iban.

Chunto:

standard          bank                hotel                bonus              mark               term

chairman         speaker           meter              genre               pin                  fact

(ii)    Injau salin

       Dalam proses nginjau ti bansa tu, leka jaku ti diinjau disalin lalu dibali ngagai jaku Iban. Taja pia, reti enggau konsep leka jaku nya agi mengkang sama enggau jaku asal.

Chunto:

honey moon                -  bulan madu

night market               -  pasar malam

five foot way              -  kaki lima

(iii).    Injau pengasai

         Dalam kategori jaku injau ti baka tu, leka jaku ti diinjau lalu disepil nitihka pengentap sistem sepil jaku Iban ti udah ditetapka. Sekeda urup dalam leka jaku ti diinjau berubah nitihka penemban urup lebuh disebut tauka disepil dalam jaku Iban.

Chunto:

bomb              - bom              - tingkil konsonan sengian b

computer        - komputer     - c berubah nyadi k nitihka sebut (konsonan)

dobby             - dobi              - konsonan berimbai bb betukar nyadi siti b

system            - sistem           - y betukar nyadi i nitihka sebut (vokal)

telephone       - telefon          - phone nyadi fon nitihka patah sebut

prism              - prisma          - ism nyadi isma nitihka penemban sebut

(iv).    Injau serap

Dalam kategori ti baka tu, leka jaku ti diinjau endang udah entap sereta masai dikena dalam jaku Iban. Berindik ari nya, semua leka jaku ti diinjau serap enda nyengala menatika gaya tukuh visual leka jaku nya ditulis dalam jaku asal ti alai nginjau. Sepil iya ditulis ketebal agi nitihka munyi ti disebut ngena kaul dilah Iban.

Chunto:

Jaku English                                      Jaku Iban

apple                                                     ipul

appeal                                                   apil

ball                                                       bol

bicycle                                                 ensikal/ basikal                              

boarding (rumah)                                buding

bureau                                                  biro

bottle                                                    butul

cancel                                                   kinsil

driver                                                    deriba

doctor                                                   lutur/ doktor

free man                                               periman

foul                                                      pawal

go-astern                                              gustan

go-ahead                                              guhit

hospital                                                sepital/ hospital

motorcar                                              entuka/ entukar/ motokar

museum                                               mijum/ muzium

number                                                lumur/ nombor

plan                                                      pelin

slipper                                                 selipar /selipa

zinc                                                      jing/ sing/ zing

Jaku injau ari jaku bansa bukai

Bisi dua chara nyepil jaku injau ari jaku bansa bukai  kelimpah ari jaku English enggau jaku seperugan. Chara nyepil nya baka tu:

(i)       Injau terus

          Leka jaku ti diinjau ditulis chundung (italicise)

        Dalam proses nginjau ti bansa tu, sekeda jaku bansa bukai ti diinjau, diambi sereta diterima enggau silik ari segi sepil, konsep enggau reti tang ditulis chundung. Ketebal agi jaku injau ti baka tu dikena dalam laras jaku ti spesifik.

Chunto:

Penatai	Leka Jaku	Reti
Latin	ultra-vires	ngereja pengawa ngelui tikas kuasa ti patut
Jerman	Weltanschauung	tampai dunya
Peranchis	coup d’ etat	ngerampas   kuasa   sechara   kasar,   pejal sereta enda beradat
	espirit de corps	semengat begempung

(ii)      Injau serap

          Proses nginjau serap jaku bansa bukai sebaka enggau atur nyerapka jaku English . Leka jaku bansa bukai ti udah masai dikena dalam jaku Iban disepil enda nyengala menatika gaya tukuh visual leka jaku nya ditulis dalam jaku asal ti alai nginjau tang ditulis ketebal agi nitihka munyi ti disebut ngena kaul dilah Iban.

Chunto:

Jaku Asal                                        Jaku Iban

Sanskrit                                            serega, neraka

Tamil                                                kedai

Arab/Parsi                                        seleju, miskin

China                                                tauke, pangking

Portugis                                           mija, gerepu

Belanda                                            sepatu

Jipun                                                karaoke