Tips Belajar Di Rumah

Mayuh nembiak sekula takut belajar di rumah kelebih agi enti sida udah muai mayuh awak maya pagi enggau setengah hari di sekula. Di rumah sida napi diri enggau mayuh penanggul bukai baka kelalu mayuh pengachau, kelalu inggar. Nya alai, semina sekeda nembiak aja ke bisi disiplin tinggi ulih belajar di rumah.

Tang raban pengajar enggau psikologist madahka enti di rumah nya sunyi, nembiak ulih besediaka kereban kena ngaga kereja rumah tauka belajar nyediaka diri napi peresa ti deka datai.

‘ Tutup radio, tv enggau telefon besell lalu kemaska mija,’ pia ku tutor Andrea Heiliger lebuh ke diasuh ngerintaika pekara ti ngasuhka pengawa belajar di rumah nya mujur.

‘Semua utai ke tau nekulka pengawa belajar patut dikemas ke tisi lalu jauh ari perati nembiak.’

Heiliger mega madahka bilik ke berangin, chukup jam tinduk sereta makai utai ti ngasuh tubuh bepengerai ulih mantu nembiak meri perati ngagai pengawa belajar.

Ngetu entara maya belajar mega patut diperatika mega. Taja pia lebuh ngetu belelak nya, awak ke dikena nya patut dikira enggaika nembiak lalu ngambika peluang badu belajar.

Nembiak mega dilalau enda tau belajar terus sepengudah sida datai ari sekula. Orang ke pandai madahka nembiak patut ngetu belelak kurang lebih setengah jam udah ke pulai ari sekula sebedau sida ngaga pengawa bukai.

‘Nuan patut ngaga pengawa ke ngelantangka ati, pengawa ti nadai begunaka runding sepengudah nuan pulai ari sekula,’ pia ku Marion Mueller-Staske ari Gerempung Psikologist Profesional Jerman. Mueller mega besetuju enggau penemu Heiliger ke madahka bilik alai nembiak nya belajar nya patut sunyi.

‘Bala menyadi nembiak nya enda patut bemain ba bilik ke sama,’ ku iya. Enti enda ulih ngasuh sida pansut tauka bemain ba bilik bukai, nyangka indai iya patut enggau sida lebuh nembiak nya ngaga kereja rumah.

Mueller-Staske madahka endur ke manah alai belajar endang ba mija. Kebuah pia ku iya laban tusah nembiak ulih betatika pelajar iya enti iya belajar sambil duduk ba sofa tauka gali ba tilam.

Enti apai indai nadai hari, pangan, kaban belayan tauka orang ke berimbai pendiau tau mega diasuh meratika nembiak nya lebuh iya belajar di rumah. Taja pia tu ukai reti iya sida tu nyau nganti pengajar tang iya semina nyadika idea ngambika bisi orang enggau nembiak nya lebuh iya belajar.

Sibylle Kroll, psikologist ba sekula vokasional di Munich ke mega penulis bup pasal belajar, madahka nembiak patut ngembuan pengelandik ngatur pengawa lebuh maya belajar.

Nembiak patut nemu ngerintaika pengawa nitihka pemerat pengawa nya sereta ngaga taga jam belajar kelebih agi lebuh sida nerima mayuh kereja rumah enggau peresa.

Nambahka nya mega nembiak enda patut ngelanjarka pengawa ti patut digaga kemaya nya. – The Sun