Dunya kemaya hari tu
nya dunya ti nadai garis entara menua. Pemansang enggau ubah teknologi pemadah
ngasuh mayuh macham info ngerekai enggau naka penyauh ngelimpas garis menua di
dunya. Baik nya info positif tauka negatif, semina sekali klik lalu semua nya
ulih tebantai ba mua mata kitai. Nya mih pemanah nabur penerang nengah
internet. Lebuh ti bejaku pasal internet, kitai enda ulih lari ari ngaitka
pekara tu enggau laman web.
Mayuh macham laman web
bisi ditengkebang dikena ngenataika penerang ti nyerangkum aspek politik,
ekonomi enggau sosial. Kemaya hari tu, semua penerang ulih dilawaka kitai
enggau mudah amat. Nyau beribu-ribu rayat ba serata dunya tu nyadika laman web
nya endur ngenataika pengasai ati diri nitihka sukut diri empu.
Iya ke pengabis
tebilang kemaya hari tu nya laman ti dikumbai blog ti tau dikumbai kitai bup chara
online. Iya nyadika sebuah diari alai kitai nulis tauka ngerikodka pekara ti
nyadi dalam pengidup kitai. Nengah blog mih alai orang ngenataika penemu terus
ke dunya siber.
Nengah chara tu, mayuh
orang udah mujur nempa sebuah komuniti ke meruan besilih idea, pengerindu
sereta ngeluarka jaku pejah. Lalu nengah komuniti tu mega sesetengah orang ke
ngasilka blog nya diperatika baka individu ke bisi kredibiliti. Iya bepanggai
ba kategori tauka bansa blog ke uji dikenataika iya. Blogger tu ngembuan idea
enggau fokus kediri empu dikena sida iya
ngenataika info ngagai raban ke nitihka pemansang blog sida nya. Bisi mega
nengah blog tu mega sida bulih asil penatai pemisi.
Enda kira mih
nama-nama penerang ti deka dikenataika nengah blog tauka kitai ke nyadi
pemacha lalu deka meri komen, tuduh penemu patut dikenataika enggau
beretika. Pesan ari Uchu Tedung, anang nabur sesebengkah pekara ti negatif ti tau ngasuh ati orang bukai nyima. Beri mih penerang ti
beguna sereta nemban ke pengelantang semua orang di dunya.
Ba pengawa nyadung penerang ngena blog, manah agi enti kitai ulih ngena servis web hosting ti bebayar, ngambika blog kitai nya (1)tampak agi dipeda lebuh bala pemacha ngiga blog kitai, tauka 'tesangkut ba leka jaku dalam "tag" kitai' dalam enjin Google, tauka Yahoo!; (2)ruang penyimpan dalam blog ulih ditambah besai agi. Siti pemanah ba web hosting nya, bayar servis sida nya murah (i.e. dalam sekeda kes, bisi servis/pakej web hosting ulih dibeli enggau rega belabuh ari RM50 ke setaun)lalu mayuh sida nya meri pilih ke bala penguna (bala bloogers) baka ni pakej ti dikedekaka sida.
BalasPadam