Transformasyen teknik enggau vokasional

Pekara ti deka dikenangka aku sekali tu nya pasal ubah pemansang sekula teknik ke bisi ba menua kitai kemaya hari tu. Aku bisi ampit mimit enggau pemansang tu tang ari sukut tisih tikas pusat. Artikel tu dibali aku ari surat berita Utusan Malaysia.

Nyadi sekula teknik enggau vokasional di serata menua Malaysia deka digantika enggau kolej vokasional ukai semina ari sukut nama tang mega nyengkaum ubah ba kurikulum, penilaian sereta persijilan.

Pengarah Bahagian Pendidikan Teknik dan Vokasional (BPTV) Opis Menteri Pelajar, Ahmad Tajudin Jab madahka, transformasyen tu mungkur kurikulum teknik enggau vokasional, timpuh belajar, pengakun persijilan, raban pengajar, infrastruktur enggau ke pengabis dikemeratka nya ngenamaka baru sekula sekondari vokasional ngagai Kolej Vokasional.

"Opis Menteri Pelajar udah ngaga siti ubah besai dalam bidang pelajar teknik enggau vokasional nengah Transformasyen Vokasional enggau Teknik (VOCTEC).

"Ubah ti besai tu  endang ditaga ulih narit pengerindu semua komuniti di menua kitai kelebih agi ngagai bala apai indai enggau anak-anak sida ke agi ba bangku sekula," ku iya lebuh ke meri penerang bedau lama ke udah.

Kenu ku iya, raban apai indai enggau nembiak endang meruan deka nemu enggau lenak senentang ubah pemansang dalam bidang pelajar vokasional, kuing tuju sereta pemanah nya jemah ila enti ditimpai ari transformasyen tu.

Besenutuk enggau nya, BPTV bisi ngaturka program Matau Kolej Vokasional 1Malaysia dikena naburka berita, meri penerang, ngaga pameran,  sereta nama-nama pekara ti bekaul enggau outreach  ngagai mensia mayuh sereta raban ke endang ditagaka  dikena meri sida input ke baru, terang sereta nemban.

"Iya mega sebagi ari tanggung pengawa raban ke ba Pelajar Teknik enggau Vokasional ngenataika polisi menteri dalam bidang tu ngambika bulih pemujur," terang iya.

Pengawa ke matau menua nya sepengelama lima hari ke diuluka Sekolah Menengah Vokasional (SMV) Batu Pahat. Penyampau sida ke enggau dalam program tu nya 150 iku nyengkaum pemesai ari opis BPTV, kepala pengajar, mandal kepala pengajar, tuai bidang, guru, nembiak enggau alumni sekula.

Nitihka Ahmad Tajudin, sida ke enggau dalam program tu bejalaika pengawa nya nengah dua bengkah promosyen iya nya ngena kereban pengangkut enggau promosyen statik di lokasi ke udah dipilih.

"Langkah rapat ke diatur tu dikarapka teulihka pugu objektif program tu iya nya ngaga kolej vokasional nyadika pun sekula ke dipilh bala nembiak," ku iya. -UM