Pandai-pandai tupai bejelangkit, bisi maya labuh ke tanah

Bansa Iban endang kaya bendar dalam leman jaku. Nya alai lebuh ke berandau tauka betunga enggau pangan diri di rumah tauka di tanah, suah kitai ke nembiak tak bengap-bengap ngapa enda nemu reti jaku ti dikena sida berandau enggau pangan diri. Tang enti lebuh kitai udah betanya ngagai sida ke tuai, dia dih jaku ti dikena sida nya tadi ditemu alus sereta lunak didinga.

            Nyadi jaku ti mayuh agi dikena sida maya berandau nya jaku sempama tauka jaku silup ti alus sereta manah didinga. Siti ari sempama ti selalu dikena Iban mandingka pengawa ti dikereja orang siku-siku iya nya,”pandai-pandai tupai bejelangkit, bisi maya iya labuh ke tanah,”.

Sida bulih sempama tu endang ari ti beratika ulah jelu tupai lebuh sida ke engkechit tauka bejelangkit kin kitu ba sebelah puchuk kayu din. Nya alai endang amat bendar mega, taja pan tupai tu landik bendar bejelangkit, tang bisi maya iya tebeleka pegai lalu labuh ke tanah.

            Nyadi ba pengidup Iban, suah mega kitai ninga sida ke tuai mandingka reti sempama tu ngagai ulah enggau perangai sida ke diau di rumah panjai. Reti sempama tu endang engkeman bendar ba pendiau siku mensia ke landik bendar ngereja penyalah lalu enda kala ditemu orang. Nya alai kitai suah bendar mandingka reti sempama tu ngagai siku mensia ke selalu deka bendar enchuri tauka ngachau utai orang laban bisi ngembuan ati kepapas ke orang ke bisi utai. Agi dua tiga kali iya ke ngereja pengawa enchuri tauka ngachau utai orang, tentu empai orang bisi nemu bagi orang ke ngereja pengawa nya. Tang nyau kepuas-puas ke ngereja penyalah nya, dia dih iya lalu ditemu orang laban nyau tulah ngereja penyalah nya. Nya alai iya nya mih ke tau disemaka ngagai sempama nya tadi. Endang amat landik bendar iya ngelalaika penyalah nya tang nyau kelama-lama ditemu orang mega iya.

Pengalus leka jaku tauka rambai jaku ti dikena sida ke tuai dulu kelia endang bisi bendar pemanis iya didinga. Tang enti iya enda dipelajarka enggau dalam, kitai ke rebak baru deka suntuk bendar penemu dikena berandau enggau sida ke tuai. Pengalus jaku tu endang selalu nunjukka pemanah basa.