Idup Besandar Baka Aur Enggau Tebing

Sempama tu selalu bendar didinga kitai. Iya manah bendar laban ulih meri ajar sereta tau nyadi lalau sereta tenggau kitai ke diau di dunya tu ti deka idup segulai sejalai enggau pangan diri dalam pengelikun enggau pengelantang.

Reti sempama tu iya nya kitai ke idup di dunya tu endang seruran begunaka bantu, tulung enggau sukung ari pangan diri lebuh ke ngereja pengawa, baik iya pengawa lantang tauka pengawa tusah. Sempama tu endang bepun ari sida ke tuai ke selalu beratika pendiau, pengidup enggau gaya penumbuh aur ti galak bendar tumbuh ba tebing sungai ke selalu diteruju ai ti rarat nengah sungai ti endur iya tumbuh.

Nya alai enti diperatika enggau manah, dia kitai meda urat aur tu nyau tusut ngerasuk tanah ti endur iya tumbuh. Nya ti ngasuh tebing ba endur nya kukuh bendar ari ti kena telusur ai ti rarat mansa tebing nya. Beduduk ari nya, dia sida ke tuai tulihka banding pengerapat kaul aur enggau tebing nya ke enda mudah tusur tauka tumpur diteruju ai lalu ngenyemaka iya ngagai pengidup mensia ke diau di dunya tu ke selalu begunaka kerejasama entara diri sama diri.

            Mayuh bendar chunto ti ulih ambi kitai dikena nunjukka pemendar enggau pengamat sempama tu. Ambika banding, dalam hal diri menyadi enggau diri sebilik. Enti sida beserakup sereta bekerejasama, sida tentu ulih ngereja pengawa enggau mujur. Tang enti sida charut, belaya lalu bepechah, dia sida deka tusah mutarka sebarang pengawa tauka penanggul ti nekul sida ngemansangka diri. Baka nya mega di menua kitai di Malaysia tu ti diuan chukup mayuh pupu raban bansa. Semua rayat di menua tu mesti diau belalauka sempama tu. Kitai mesti serakup lalu begempung ati niri negika menua tu nitihka ubah pemansang dunya kemaya hari tu. Ba penemu aku, enti kitai ulih seati sereta berakup ngereja pengawa, dia menua tu ulih dikemansangka enggau mujur.

            Semengat idup baka aur enggau tebing tu patut dikemeranka semua kitai di menua tu. Ngena semengat nya, menua tu deka betambah maju, likun sereta tebilang lalu penyamai enggau pemansang ulih diasaika kitai semua. Kelimpah ari nya mega, munsuh menua tu tusah deka ngalahka kitai enti kitai begempung sereta berakup enggau pangan diri.

            Rayat mesti idup dalam pengelikun sereta selalu belalauka sempama tu. Ari  pengelikun, nya baru kitai sama-sama ulih ngasaika pemansang enggau penyenang ti dikedeka ati. Penyerakup mai pengukuh, lalu penyerekang mai pengeruntuh. Tu mih sulu jaku ke patut dipegai semua kitai.