Hobi Aku

Siku-siku mensia ba menua tu semua bisi hobi magang. Baka nya mega aku. Aku bisi ngembuan mayuh macham hobi. Sekeda ari hobi aku iya nya macha bup cherita, bekebun sayur enggau ningaka radio.

            Keterubah iya tu kebuah aku rindu macha bup cherita laban mayuh agi bup cherita ti dibacha aku ngenataika penemu lalu enda kurang iya mega ngajar aku ngambi penemu ti manah. Semua bup cherita ti udah dibacha aku tau ngelalau aku ngena penemu ti manah magang.

            Maya aku selalu macha bup cherita tu iya nya maya aku nadai agi kereja sekula enggau maya ujung minggu, kelebih agi maya lemai hari. Ari macha tu aku bulih mayuh macham penemu ti bisi dituliska dalam bup cherita nya.

            Kelimpah ari ti rindu macha bup cherita aku mega rindu bekebun sayur. Kebuah aku rindu bekebun sayur laban lebuh aku gawa ba kebun sayur nya, aku lalu bisi pansut peluh. Aku enda tentu rindu enggau orang bemain. Kelimpah ari ngemansutka peluh, bekebun sayur mega ngenataika penguntung ngagai aku empu enggau kami sebilik. Kami tau enda ibuh meli sayur  ke pasar. Enti nyema kami deka makai sayur, kami tau ngambi ngagai kebun sayur. Pia mega enti nyema sayur kami mayuh, aku tau nyual sayur nya. Aku tau bulih duit enti nyema aku nyual sayur nya lalu tau dikena aku mulaika puku enggau pengelelak tulang ti dikena aku nanam iya. Nya meh penguntung iya.

            Aku rindu bekebun sayur lebuh lemai hari. Nya pan lebuh maya aku enda nulung indai aku di dapur. Enti bisi pengawa ba dapur, aku enda kereja ba kebun sayur. Maya bisi awak tauka peluang aja aku ulih gawa ba kebun sayur.

            Siti agi pengerindu aku iya nya ningaka radio. Kebuah aku rindu ningaka radio laban radio tu tau ngerindang tauka merindang ati aku ti tusah. Kelimpah ari nya mega, aku rindu mendingka berita ari radio. Aku selalu ningaka radio maya aku belajar tauka ngulang pelajar ti udah-udah enggau lebuh maya aku ngaga pengawa latih ti diberi pengajar. Kebuah pia, awakka aku enda ninga utai bukai. Nambahka nya mega ningaka radio lebuh belajar ulih ngasuh aku senang ati.

           Nya mih sekeda ari hobi ti ngerinduka ati aku. Nya alai ngagai bala kitai ke apin bisi hobi, sama-sama mih kitai ngiga hobi kediri empu ngambika kitai enda tak diau diri aja sekalika ngereja pengawa ti nadai ngenataika penguntung ngagai kitai empu.