Peminta Sedekah kaya ukai cherita tempa

KITAI seruran ninga tauka macha cherita peminta sedekah ke kaya, ke diau di hotel tauka diambi ngena kerita sepengudah sida minta sedekah ba kaki lima.

Tu bisi cherita ke amat nyadi ba sebuah rumah pengandai tuai di Marang, Terengganu, ke patut  muka mata semua orang.

Siku orang tuai ke diau ba rumah pengandai tuai nya (nama dipelalaika) ke suah enchuri pansut laban deka minta sedekah bisi ditemu nyimpan duit tunai kurang lebih RM15,000 ba baruh katil iya kelimpah ari ke ngembuan tiga akaun bank ari tiga bengkah bank ti ngembuan nilai mata duit ke disimpan nya RM60,000.

Pekara tu ditemu sepengudah iya parai kira-kira sebulan ke udah.

Nyadi, cherita peminta sedekah ke kaya di menua kitai tu ukai cherita tempa tauka cherita ti ditabur ari mulut ke mulut, tang siti realiti ti minta kitai sama-sama berunding, nama kebuah pekara ti baka tu tau nyadi?

Ukai kitai deka nagang orang ari ngaga pemanah meri pemeri, tang taja pia pengawa ke beambi ulih dalam pekara minta sedekah tu ukai cherita baru.

Dipelabaka, enti nyau bisi peminta sedekah ke kaya, enggai mih kitai nganggap menua ke benasit tu menua ti kaya enggau peminta sedekah.

Uji peratika dini-dini endur, peminta sedekah diatu ukai semina orang empu menua aja tang nyau bisi mega peminta sedekah ke 'diimport'.

Hal tu nyadi taja pan kitai ditabur enggau mayuh macham cherita pasal peminta sedekah tang agi mayuh bala ke agi ngembuan ati ti manah enggau dalih ke madah "aku rurus ati deka meri pemeri ngagai orang umang. Hal sida deka nipu, nya entara sida enggau Petara."

Ya, endang amat jaku nya baik kitai nya sedar tauka enda, ulah ke mudah pechaya lalu enda meresa dulu meransang mayuh agi orang nyadi peminta sedekah. Tu ngujungka mayuh penanggul nyadi dalam komuniti kitai.

Kitai ukai enda kala ninga sentang sindiket ti ngulihka pengaya nengah jalai mudah, iya nya ngena tulang urat orang ke timpang pendiau minta sedekah ngarika sida.

Lebuh kitai meri pemeri ngagai raban tu, kitai ukai nyaup sida tang meransang balat agi pekara ke enda manah nyadi ba tubuh sida laban asil nya ukai diambi sida tang diambi raban sindiket. Bisi ripot madahka sindiket nya nadai pengasih mimit. Sida sanggup makal sereta ngemediska tubuh peminta sedekah ngambika mudah agi sida nya teulihka simpati.

Tu  bedau nyengkaum raban ke nguna nembiak mit, belalai nengah pengawa ke bejualka produk, iya ke enchelak kenu ku mantu iya ke buta nyual tisu tauka penanda bup, tang tuju iya ke bendar nya deka bekungsi asil.

Kelimpah ari nya bisi mega peminta sedekah nya nya ngujungka diri ngereja pengawa salah ti berat baka ngerutun beg tauka nyamun duit orang.

Iya ti bendar, kitai ukai deka nagang orang ngaga pemanah tauka mantu sida ke amat begunaka tulung tang ba menua kitai tu, raban kurang benasit manah tu udah dijaga enggau naka pemanah lalu perintah bisi nyediaka undang-undang ke kediri dikena nyaga hak sereta pekara ti bekaul enggau sida tu ba baruh Akta Orang Papa 1997 (Akta 183).

Kelimpah ari nya, bisi mega agensi ke endang ditaga mantu sida baka Opis Pengintu Pengelantang Mensia Mayuh tauka Jabatan Kebajikan Masyarakat (JKM) ke ukai semina nyediaka ke tempat tang mega meri kus pengelandik dikena mantu raban timpang pendiau ngulihka belanja diri empu. Rumah pengandai tuai mega disedia ke orang tuai dikena nyeliahka sida ari ke nadai pengawa dayau-dayau sebelah pasar.

Ba negeri-negeri, agih belanja di baruh kuasa agensi ngumpul zakat mega bisi dikena mantu raban ti baka tu.

Nya alai kitai patut bendar bejimat lebuh ti betempuh enggau raban peminta sedekah tu enda ngira nama modus operandi dikena sida.

Enti enda, meri pemeri ke sida ti dikumbai kitai nya pemeri laban deka nulung nya ke bendar nyadi pemeri ke dikena nambah penanggul dalam komuniti kitai.