Penguntung ti ulih ari macha surat berita

Di menua kitai tu mayuh macham bansa surat berita. Iya ditulis dalam mayuh macham jaku baka jaku Melayu, English, Tamil, Mandarin, Arab enggau ti bukai baka jaku Iban enggau jaku Kadazan. Iya mega diberi mayuh macham nama baka Utusan Sarawak, Borneo Post, Sarawak Tribune, Malaysia Today, The New Straits Time, The Star, Utusan Malaysia, Nanyang Siang Pao enggau iya ti buka. Dalam sesebengkah suratkabar tu mayuh macham berita ti dituliska. Nya alai ari nya kitai ulih nemu mayuh macham pekara.

           

Macha surat berita tu endang mayuh bendar ngenataika penguntung ngagai kitai. Siti ari penguntung ti tau diulihka ari macha suratkabar iya nya kitai ulih nguna awak puang enggau betul lalu ulih nyeliahka diri ari ngereja pengawa ti nadai ngenataika penguntung ngagai kitai. Nambahka nya mega, kitai ulih nambahka penemu kitai senentang pekara ti enda kala ditemu kitai.

            Ari macha surat berita mega kitai ulih nemu mayuh macham leman berita ti nyadi di menua tu enggau ba menua bukai laban suratkabar endang ngayanka mayuh macham berita. Nya alai ari nya, kitai ulih nemu berita ti nyadi ba manua tu enggau ba menua ti ari luar menua tu. Kadang-kadang berita nya tadi lalu disempulangka ngena gambar. Tu mih ti ngasuh berita nya nyata agi ditemu kitai ti macha surat berita nya.

Surat berita mega ngeluarka mayuh macham berita lumba enggau main. Ari nya tadi kitai ulih nemu pemansang main ti dikerinduka diri. Ambika banding, enti kitai rinduka main bul, dia kitai ulih nemu pemansang team tauka kelab ti dikerindu diri ari ti macha suratkabar nya tadi. Kelimpah ari nya tadi, kitai mega ulih nemu pasal atur pejalai bas, kapal, kerita api, bilun, bot ekspres enggau ti bukai. Ari nya kitai bisi bendar penguntung laban enda kiruh betanya tauka begigaka utai ti deka dikena kitai mindah ari endur siti ngagai endur siti.

 

Dalam surat berita mega bisi disediaka ruang endur mandangka sebengkah-sebengkah barang ti deka dikelakuka ngagai orang mayuh. Nya alai ari nya kitai ti rinduka utai nya tau ngelala sereta meli iya ari kedai ti nyual barang nya enggau jampat.

          Ari macha surat berita mega kitai ulih ngerembaika pengelandik kitai pasal jaku. Ambiae banding, enti kitai deka ngemansangka agi pengelandik diri senentang jaku Melayu, kitai ulih macha lalu mansik mayuh agi surat berita ti ditulis dalam jaku Melayu. Baka nya mega enti kitai deka ngerembaika pengelandik diri dalam jaku English enggau jaku ti bukai baka jaku Iban enggau Kadazan.

        Semua berita ti manah-manah ti dipansutka dalam surat berita ulih disimpan ke guna dudi hari. Nya alai ari nya setiap iku kitai diperansang suah agi macha surat berita ngambika bulih mayuh agi penemu lalu enda baka engkatak ke dirungkup tachu, lalu enda nemu pekara ti nyadi ba dunya luar ti ngelingi iya.

       Baka nya mih sekeda ari penguntung macha surat berita ti ulih dikenang aku ba karang tu. Nya alai semua kitai, kelebih agi kitai ke nembiak sekula mesti nanam pengerindu macha surat berita  laban ari surat berita nya mayuh macham berita ke manah-manah ulih ditemu kitai. Semua penemu nya tadi ulih dikena kitai ke guna besehari-sehari tauka ke guna dudi hari.