Sebut enggau Rentak Sebut dalam jaku Iban

Jalai nyebut Jaku Iban ti dipelajarka dalam sekula patut nitihka jalai nyebut Jaku Iban standard ( perintah) reti nya enda patut nunda sebut nitihka pelilih menua. Kebuah pia enti sema jaku tu udah mansang maju jemah ila raban bansa Iban patut bendar temegahka jaku nya udah setipak enggau jaku bansa bukai ke udah maju ti meruan ngembuan standard sebut kediri empu enti dikena lebuh maya pengawa rasmi. Tu sekeda chunto jaku sebut nitihka pelilih menua baka leka jaku ohang, oriang, humah, gaham , adai,(adai si), ruah, nebah, keranggah, ural, urar, gulaa, gulo sereta mayuh chunto ti bukai.

Bala Iban ke ulih bejaku ngena jaku Iban standard lebuh ke ngena nya maya pengawa rasmi patut bendar dipuji laban iya ulih meransang bala bukai kelebih agi nembiak ke ngambi mata pelajar Bahasa  Iban bejaku ngena jaku Iban ti standard. 

Taja pia naka ke diatu, laban ke agi ba renggat meransang nembiak ngambi sereta belajarka jaku Iban, umbas mih naka nembiak enggau orang bukai ulih nyepil nitihka atur sepil ke betul lalu ukai nyepil nitihka sebut ai siti siti. Kebuah pia laban jaku ke udah dikena Iban ba ai siti siti nya ukai nyamai diubah. Iya endang ari ada sida iya udah ninga sereta ngena jaku ke munyi nya. 

Tang taja pia, lebas utai tu bisi iya nya maya pengawa besai baka ngintu pengerami makai lemai gawai etb, enggau naka ulih kitai ngena rentak sebut standard. Baka nya mega sida ke gawa ba radio, enti nyema ulih ngena rentak sebut ke standard nya pekara ti manah amat. Semua utai tu begunaka latih iya nya latih chara nyebut enggau betul. 

Kelimpah ari nya mega enti ulih, anang kelalu nginjau jaku bansa bukai baka jaku English, Melayu tauka ngena dialect ai siti siti. Ukai madah dialek siti siti nya salah tang lebuh ke formal nya kitai nguji ngena jaku standard Iban baka ke endang dikena nembiak ba sekula kemaya hari tu.

Bejaku ngena sebut enggau rentak sebut menua siti-siti endang nadai penyalah laban nya endang pemaiada sereta pesaka semua ke ngena jaku nya ba genturung menua sida. Taja pia, dalam kitai nulis ba pengawa rasmi, standard sepil endang udah bisi, nya alai tu ukai isu baru. Enti nulis dalam novel, dalam ensera, dalam cherita, nadai orang ulih nagang laban orang ke macha tauka ngena nemu milih ni bagi ti patut, ni bagi ti engkeman.

Ambika chunto, enti ditaga nyadi kereban sanding ke pelajar jaku Iban di sekula, kereban nya mesti nitihka sistem sepil ti udah ditetapka ba sekula.

Taja pan baka nya, sebut pelilih menua tauka sebut ari ai siti ngagai ai siti mega patut dipasukka dalam dictionary Iban awakka sama-sama tau dipelajarka semua raban bansa Iban. Menua ke ngena leka jaku nya mega enda tau enda dipadahka dalam dictionary, ngambika bala pelajar nyamai nemu. Kebuah pia, laban leka jaku Iban pelilih menua patut “disimpan" kitai, ngambika enda lenyau mabun laya dibai aki ini lesi nyenggai hari jemah ila.

Semua nya patut disimpan ngambika bisi ditemu, dipeda rebak ke dudi. Taja pia, nyema iya nya udah dipasukka ba dictionary, ukai reti nya tau dikena ba sekula laban ba sekula endang udah bisi atur chara nyebut bemalinka atur sepil. Kebuah pia enggaika kitai meda iya udah disimpan ba dictionary, lalu nyadika malin dikena mantah sistem atur ke udah ditagaka ba sekula.