Agu oh agu

Sebedau tu blog tu kala ngeluarka artikel senentang pengamah agu sereta ulah ke enda ibuh ke pemeresi (21.Feb. 2011). Sekali tu pengarang nguji ngenang pekara ti sama beserimbai enggau Hari Agu Sedunya ti diintu ninting taun kena 19 November.  

Taja pia agi bisi ga sekeda bala ke enda nemu nama utai ti dikumbai agu. Nitihka bup Sereba Reti Jaku Iban, agu nya bilik ti endangdisediaka di rumah,opis, sekula, etb. Alai kemi enggau bira lalu disikap enggau mangkuk tai, ai enggau endur bebasu. Reti kedua dalam bup nya madahka agu nya jelatung pemandi di pendai ke bagas alai mensia bira sebedau mensia belabuh begagaka alai pemira ti menyana kelia. Ba sekeda menua agu nya dikumbai ngena nama jamban. Tu nyangka sida ke udah lama berimbai pendiau enggau bansa Laut.

World Toilet Organization (WTO) nya sebuah gerempung ti enda ngira untung, ke ditumbuhka dikena ngerak mensia tentang pemesai nguna agu enggau chara betul , teratur sereta beresi.

Dianggarka 2.6 billion orang ba serata dunya tu nadai disediaka agu ti meruan lalu kira-kira 1 billion ke bukai endang nadai agu. 

Kitai ke bisi sereta meruan agu nya patut berasai beterima kasih laban ulih duduk dalam agu ti lantang seraya ke macha majalah tauka surat berita di dalam nya. Uji kitai berunding dalam ati diri, agi mayuh orang bukai di luar din ke lalu empai bisi agu. Nya mih enggau peluang tu sekali agi aku nguji mai kitai sebuat pemacha ngenangka pekara ti bisi bekaul enggau agu.

Nitihka ripot siti pansik ti digaga WTO madahka  agu  di Indonesia dikategorika agu ti pengabis kamah di Asia.  Gerempung tu nudukka Indonesia ba tangga ke-12 di entara 18 menua Asia ti bisi diakim sida.

Nitihka orang ke dulu numbuhka gerempung agu Indonesia tauka Persatuan Tandas Indonesia (ATI), Naning Adiwoso madahka taja penuduk tauka ranking sida manah agi ari menua  Vietnam tang iya jauh jai ari menua bukai baka Filipina, Malaysia, Singapura enggau Thailand.

Naning madahka penuduk nya ditentuka WTO bepelasarka penyampau kuman tauka igi penyakit ti bisi ditemu ba agu ti diperesa nengah chara rawak ba  tiap-tiap menua.

Nya berita ke bisi nyadi di Indonesia. Kitai enda tentu gagau ke berita nya laban iya nyadi ba menua bukai. Kati enti sema iya nyadi ba menua kitai dih? Pelaba aku nadai ibuh dirintaika kriteria agu ti kamah; semua pemacha bela nemu baka ni agu ti dikategorika agu kamah.

Enti sema bela udah nemu aram kitai meratika berita senentang agu di menua kitai empu.

Siti pansik ti dipejalaika Dewan Bandaraya Kuching Utara (DBKU) madahka ari 95 sekula dalam kandang pegai kuasa sida semina tiga persin aja ti dikategorika  lima bintang lalu 52% ke bukai enda ulih dikategori ketegal kelalu kamah nyau nadai dalam lis ke ulih disebut!

Iya ti balat ngasuh ati tekenyit nya nitihka director DBKU, Dr Saadiah Abdul Samat madahka fakta nya mega mandangka sekeda ari sekula ke empai lama udah dibuka tauka baru dikena. Suah amat ba runding  kitai agu ba sekula baru aruh iya manah agi tang tu nyau enda ulih dipasukka dalam pansik laban jauh ngelui ari kategori. Tu patut bendar ngasuh kitai irau laban sekula patut endur matih sereta narak nembiak ukai semina dalam penemu akademik tang mega senentang pemeresi.

Kelimpah ari sekula,  DBKU mega ngaga pansik ngagai 342 buah agu orang mayuh nyengkaum iya ke ba premis pemakai, palan bebelika barang enggau stesyen minyak. Ari 342 buah nya, 16 buah nya diberi tikas lima bintang lalu 173 buah ke bukai nya enda ulih diakimka laban enda nitihka kriteria pengukur ti nyengkaum pemeresi, pengerangkai, pemau, pengulih agu nya dikena sereta enggau nilai estetik.

Pemeresi agu rama tauka agu orang mayuh nya ba penemu sekeda orang baka pekara ti mit tang iya mega tau mai empas ti besai ngagai imej menua enggau bandaraya kitai. Enti kitai enda tejagaka pemeresi agu tentu imej menua kitai mega nurun sereta dikumbai orang komuniti tauka raban bansa ti kamah.

Nya alai munyi ku Saadiah,  agu ba sekula patut beresi laban nembiak belajar lebuh sida agi biak. Ketegal agu ti kamah bisi orang ke sanggup ngetatka diri enda bira ba agu ke kamah. Tu nyengkaum aku empu. Enti agu nya kamah aku sanggup ngetat nganti pulai ke rumah. Saadiah mega ngarapka sekula  ulih sekurang-kurang iya ngenataika diri ba tikas tiga bintang. Iya mega madahka siti komiti pemeresa deka ditumbuhka ti nyengkaum raban pengajar enggau pemesai ari opis pelajar. Kelimpah ari nya, iya mega beterima kasih ngagai Hotel Riverside Majestic ti udah ngambu empat buah sekula iya nya SJK Chung Hua No. 4, Jalan Nanas, Sk Gita, SMK Semerah Padi enggau SMK Green Road di baruh progrem ‘Projek Perintis Tandas Sekolah Sejahtera’. Sekula tu deka disediaka hotel nya enggau malin senentang pemeresi (The Star, 23.11.12).

Nya alai, kitai enda ulih rari ari proses belajar enggau ngajar baka senentang pemesai reti ngembuan agu ti beresi. Pelajar tu patut bepun ari rumah sereta dikerembaika ngagai sekula laban naka ke diatu mensia mayuh agi ngumbai agu nya ukai pekara ti berat. Nya mih kebuah agi bisi orang bira tauka kemi sengapa endur tauka ba sungai.  Ingat kemi anang sebarang panching, bira anang sebarang tunga.