Belajar ari pengawa bepilih presiden Amerika

Semadi ke nganti pengawa bepilih besai parlimen menua kitai manah ga enti kitai ngenangka pengawa bepilih presiden di menua Amerika. Pengawa bepilih Presiden Amerika 2012 balat amat bekempit entara Barrack Obama ari Parti Demokrat enggau orang ke dilaban iya ari Parti Republikan, Mitt Romney.

Dunya balat bendar meri perati ti berat ngagai pengawa bepilih di Amerika Syarikat (AS) nya. Semua orang bela merati enggau serius proses bekimpin sereta pengawa milih presiden ti dipejalaika nengah chara ti penuh demokratik.

Pemutus pengawa nya mandangka Barrack Obama agi ngetankan penuduk iya nyadi presiden Amerika ba renggat kedua bejurut-jurut.

Bala pemacha tentu semua nemu Amerika Syarikat endang pegari nama enggau chara iya ngemeranka polisi menua luar iya. Amerika Syarikat mega ngembuan kuasa ti ulih ngelabuh tauka ngangkatka tuai pemesai sekeda menua. Iya mega nentuka polisi menua ti ditaga iya ngambika menua-menua nya ulih nitihka utai ti ditunjukka iya.

Taja pan baka nya ulah sumbung Amerika Syarikat enda mega dikemeranka sida rayat iya dalam menua nya empu. Rayat iya agi ulih ngemeranka pengawa politik ti nadai besekat sereta demokrasi ti bendar.

Kelai pekara tu ulih dipeda ba pengawa bepilih besai presiden. Rayat Amerika Syarikat ngena kuasa ti bisi ba sida nentuka tuai pemegai menua nengah chara ti chukup demokratik.

Taja pan Obama nya presiden Amerika tang kedua-dua seduai ke bediri nya diberi peluang enggau ruang ti sama. Obama nadai ngena kuasa ke bisi ba iya lebuh bekimpin sereta nadai nutup hak orang ke dilabanka iya.

Panggau ke alai iya bejaku ba mua mayuh mega nyadika panggau alai Mitt Romney bepeluang bejaku. Mitt Romney nadai disekat mejah polisi perintah Obama, bedialog tauka bekelikuh dalam ruang ti tebuka nya. Semua rayat Amerika nyadi pemerati meda pengelandik seduai ngenataika jaku sereta betalat enggau pangan diri.

Media sida mega nadai nanah sapa-sapa lebuh ke ngeripotka pengawa bepilih nya sereta meri ripot ti rentang ke semua penyukung seduai. Nadai ditemuka pengawa media bejalaika propaganda ngenyaika ni-ni ari seduai iya. Untung iya Mitt Romney ti nadai mimit pan dipetenahka media enggau mayuh macham propaganda ti ditengkebang ngapa.

Indah suruhanjaya pengawa bepilih besai  AS nadai bisi didinga dipejaika rayat iya laban ngakal dalam rintai nama orang pemilih ti udah diregister tauka bejalaika sistem bepilih ti berat sepiak.

Kitai rayat Malaysia ti deka napi pengawa bepilih besai parlimen ke 13 mega patut belajar ari proses pengawa bepilih besai Amerika Syarikat. Belemati sereta bandingka tikas demokrasi menua tu enggau Amerika Syarikat.  Kelalu mayuh amat bida baka langit enggau tanah.

Isu iya, kati beranika kitai ditu nitih proses pengawa bepilih baka ti dipejalaika di AS nya? Sanggup kini enti kitai ke merintah ngelengkaka pengawa kitai sereta meri kuasa nya ngagai perintah sementara maya pengawa bepilih nya dipejalaika?

Kati sanggup kini kitai ke bisi kuasa bekimpin atas nama parti iya nya ukai ngena penuduk kitai ba dalam perintah nengah chara naburka danji, projek, duit tauka jaku ngegap rayat baka ke dikemeranka sida ngelama tu?

Kati sanggup kini kitai ngena raban parti kitai empu lebuh bekimpin lalu ukai ngasuh bala pengereja perintah nurun bekimpin? Kati kitai udah besedia nentuka SPR enda dikungkung tauka dikuasa sekeda orang nyentukka rayat berasai enda tentu arap ngagai SPR agi?

Kati kitai bisi pengingin ati ti kuat deka meresika register nama pemilih, pengawa muai undi pos, ngetanka rayat luar nyadi pengundi ngambika meri ruang pengawa bepilih ti amat-amat ulih dikearapaka rayat?

Kati beranika kitai meri pemendar ngagai media ngambika sida ulih meri ripot ti rentang ke semua parti enggau tuai-tuai ke enda berat sepiak? Ke penudi nya samggupka kitai nerima pemutus rayat dalam PRU ke 13 enggau ati ti tebuka sereta enda ngena jalai ti salah taja pan parti kitai nya alah? Pandam dada tanya runding diri.