Politik Orang Iban

Nyau bangai nganti pengawa bepilih besai Parlimen. Udah berapa iti artikel ditulis aku ngenang pasal pengawa politik. Ukai nama laban deka enggau orang ngeruh ai bejaku pasal pengawa politik. Taja pan pengawa bepilih besai nyentuk ke sehari tu lalu bedau temu tang nya ukai reti iya kitai enda ulih bejaku pasal politik. Nyadi ke sekali tu aku deka ngenangka pasal politik ari sukut pengidup raban bansa Iban. Nyadi sebedau aku ngemanjaika keranjai tulis aku dalam buah kenang aku sekali tu dulu aku minta ampun ari punjung pala nyentuk ke ujung kaki ngagai semua pemacha kelebih agi ke bebansa Iban nyangka karang aku tu tak tau nyima ati kitai sereta ngasuh kita muras. Tang aku nemu mayuh ari kitai pemacha endang orang ke profesional reti nya udah ulih nerima jaku baik nya jaku pejah tauka jaku bantah, jaku puji tauka jaku peransang ukai enggau ati ti emosional tang enggau ati ti rasional. 

Penemu politik Iban ti deka dikenang aku nya senentang gaya politik ti kelalu jauh tinggal ari bansa bukai.Ba penemu sekeda orang Iban kelebih agi ke diau dalam kandang menua pesisir, politik tu ukai utai ke berat.Nya alai sida semina datai ngundi maya bepilih. Bepolitik semina maya deka bepilih aja. Kadang-kadang sekeda bala Iban tu nadai nemu berundingka politik nya bisi besangkut-paut enggau pengidup sida ninting hari. Sekeda ari sida mega enda berundingka politik tu tau meri pemanah tauka penyai dudi hari ila ngagai bansa Iban dalam menua Sarawak. Sekeda ari Iban tu mega nadai ngembuan penemu ke panjai ba senentang utai ke dikumbai orang politik. Nya alai sida semina kiruhka hal politik semina maya orang bepilih aja.

Iban endang ngira politik tu ukai perkara ti berat. Tang sapa sapa  ke ngambi berat pekara pasal politik tu nadai mega salah madah ke bala kaban belayan ti diau di menua petisir din. Padah ke sida, guna ti bendar politik tu ba pendiau sida. Laban sekeda sida agi arap ke TV enggau radio. Kekadang  berita ke pansut ba TV enggau radio nya ukai berita ke amat laban iya kadang-kadang semina nyadika kereban propaganda sekeda orang dikena iya ngangkatka diri empu tauka raban parti iya empu.

Kelimpah ari nya, raban bansa Iban kelebih ke ba menua pesisir agi kurang meretika konsep demokrasi sereta pengawa bepilih. Nama kebuah pengawa bepilih dipejalaika ninting lima taun sekali? Sida suah digap orang ke madah sida semina ulih milih sekeda orang laban enti sida milih orang bukai nyangka penyarut tau nyadi lalu pemansang enda datai ba menua sida jemah ila.  Enti baka nya manah agi duit agih dikena bejalaika pengawa bepilih nya dikena ngemansangka menua enti kitai enda ulih milih tauka enda tau milih orang bukai. Nya mih kebuah kitai diasuh muai undi milih pengari ke dikira kitai ulih ngarika kitai ukai orang ke madah enda tau ngundi orang bukai.

Kitai milih orang nyadika pengari ba sitak menua kitai ukai ketegal parti nya tebilang sereta udah lama ditumbuhka tang ketegal orang ke deka bediri minta pilih nya dikira orang ke tau dikearapka kitai ulih mai pemansang tauka mai serebana kitai ngagai perintah. Sapa-sapa ke ngantung nama sereta bediri dalam pengawa bepilih ba penemu aku udah ngirai diri sereta besedia napi diri nyadi pengari rayat semadi iya nya dibeli orang diasuh bediri laban deka mechahka undi ba endur nya. Tang nya isu bukai. Isu ke nyadi buah kenang nya senentang pemerati ati raban bansa Iban pasal konsep demokrasi, reti pengawa bepilih sereta utai ti bekaul enggau nya.

Nya alai kitai ke nemu agi tau madah ke sida. Kitai ukai semina bulih berita ari TV enggau radio aja kemaya hari tu, tang agi mayuh media massa ke bukai, ambika chunto, nengah internet baka ke dibacha kitai diatu. 

Nembiak rebak baru tu mih ke ditagaka kitai laban sida iya udah ngelala internet; ukai rebak orang ke  udah lunggar umur baka sida ke beumur 60 taun ke atas. Orang ke 40 - 50 taun mega nitihka pansik udah mega ngelala sereta nemu ngena internet. Semina kadang-kadang sida nadai perengka dikena macha berita ari internet. Kebuah pia laban internet apin datai ba sida di menua pesisir. Tang kitai ke lanchat agi sereta ngembuan pengulih ulih ngena media chelak enggau cd nganjung ke sida berita ari internet. Sekali dua apin mih sida arap, tang enti suah, mesti sida balat agi ngarapka berita ti disadung baka munyi ku leka lagu – mar mudah mesti diuji.