Taring Mengkang Tumpul

NAMA agi dalih tukang latih Harimau Malaya, Datuk K. Rajagobal?

Pemutus main seri 1-1 enggau Hong Kong lebuh bemain ba Stadium Shah Alam malam tadi (14.11.12)  ngelaika skuad Harimau Malaya lalu bedau ulih mandangka taring iya ke bendar.

Kurang dua minggu agi sebedau kimpin Piala AFF Suzuki 2012 berengkah, Rajagobal patut beguai nyeruri tiap-tiap pengelemah ke bisi dalam skuad ti dipegai iya nya.

Enti anak buah Rajagobal terus mandangka aksyen ke kurang manah baka ke dibantaika sida lebuh bemain ngelaban Hong Kong, dipelabaka sida tau enda ibuh ingatka misyen ke deka ngetanka Mangkuk AFF Suzuki sekali tu.

Sebedau tu, Harimau Malaya udah dua kali bejurut alah; iya nya alah 0-1 ngagai Vietnam di Hanoi sebedau alah 0-2 ba jari Thailand di Bangkok.

Dua kali alah nya terang amat ngasuh raban penyukung enggau pemerati bola sepak Malaysia nya  panik. Sida ngarapka anak buah Rajagobal sekali agi teulihka pemujur laban sida iya diatu endang team ke megai Mangkuk AFF Suzuki.

Lebuh ti belaban enggau team Hong Kong, Rajagobal mantaika raban ke dikira pengabis manah sambil Khairul Fahmi Che Mat diberi pengawa nyadi penyaga gol keterubah.

Kubu pengetan ba baruh dikemudika Mohd. Aidil Zafuan Abd. Radzak, Mohd. Bunyamin Umar, Mohd. Fadhli Shaas enggau Zubir Azmi.

Ba tengah team Harimau Malay nya diuluka kapten, Safiq Rahim sambil dibantu Amar Rohidan, S. Kunanlan enggau Azzamuddin Mohd. Akil lalu Safee Sali enggau Norshahrul Idlan Talaha diasuh ngerubuhka guli Hong Kong.

Taja pan nyabung ‘baris team ke diinginka’, Rajagobal tentu kesal ati meda gaya anak buah iya  ti mimit pan enda ngenakutka team ti dilabanka sida.

Dalam timpuh 45 minit keterubah, Harimau Malaya lalu enda tepasukka gol taja pan sida ngembuan beberapa peluang nengah Safee enggau Norshahrul.

Siti peluang ti pengabis manah ari Harimau Malaya maya minit ke-16 nengah bol ke dibai  Norshahrul, tang sepak guntin Safee tepawah ke sebelah kanan gol Hong Kong.

Nyau kebangai baru Harimau Malaya teulihka gol lebuh Safee mujur nanduk masuk bol ba minit ke-58.

Team pengabang dipejal bemain 10 iku udah pemain Lee Chi Ho dipandangka kad mirah laban ke bemain kasar enggau Safee ba minit ke-82. 

Laban ke kelalu layap deka nguji ngulihka gol, enda mukai-mukai team Harimau Malaya nerima ukum lebuh team Hong Kong mujur malas gol ba minit ke-88 ulih Lam Ka Wei ketegal penyilap Aidil enggau Khairul Fahmi.