Hidroelektrik , Hidrokuasa, Tekat Ai, Danau Gaga

Sekali tu aku deka mai bala pemacha bekenangka pekara ti bisi kaul enggau pengidup kitai di Sarawak iya nya Hidroelektrik. Kebuah pia laban di Malaysia, menua Sarawak mih ngembuan mayuh tekat ai baka iya ke udah digaga enggau ke benung diperambuka perintah deka digaga jemah ila. Di baruh tu dirintaika tekat ai ti udah digaga, ti baru tembu digaga sereta iya ke benung diperambu deka digaga di Sarawak;

1.     Tekat Hidro Batang Ai

2.     Tekat Ai Bakun

3.     Tekat Ai Murum

4.     Tekat Ai Balleh

5.     Tekat Ai Limbang

6.     Tekat Ai Lawas

7.     Tekat Ai Baram

8.     Tekat Ai Belaga

9.     Tekat Ai Mejawa

10.  Tekat Ai Punan Bah

11.  Tekat Ai Pelagus

(State Planning Unit @ www.spu.sarawak.gov.my)

Hidroelektrik nya elektrik ti dipejalaika ngena hidrokuasa. Diatu kuasa hidroelektrik nyendiaka kira-kira 715,000 MWe tauka 19% ari kuasa elektrik serata dunya (16% ba taun 2003), lebih ari 63% penyampau kuasa elektrik ti dikeulihka ari kuasa ti dikena baru ba taun 2005.

Taja pan penjana hidroelektrik ti besai nyendiaka mayuh kuasa hidroelektrik di dunya, skema hidro mit mega popular kelebih agi di China, ti ngembuan lebih ari 50% ari kapasiti hidro mit di dunia.

STESYEN JANA KUASA HIDRO

Stesyen jana kuasa hidroelektrik begunaka tenaga kinetik ai dikena musinka tubin jana kuasa. Pugu komponen di stesyen jana kuasa hidroelektri nya tekat ai (dam), danau gaga (reservoir),pintu penyaga (control gate), salur tama (intake),  pintu ai (penstock), turbin (turbine), salur keluar (outflow), janakuasa (generator), pengubah (transformer), powerhouse enggau tali penganjung (power lines).

 TEKAT AI

Tekat ai digaga dikena nyimpan ai ngambika bulih tekanan graviti dikena musinka turbin. Struktur tekat ai ti digaga nya tebal ba baruh tauka dalam tekat nya ngambika ulih ngetanka daya tekanan ai ti besai ba baruh tekat nya.

DANAU GAGA

Danau dipenyadika ari penembu tekat ai. Ai ari danau tu dikumbai tenaga pengulih graviti. Ketegal penuduk tikas danau lebih tinggi, nya alai tenaga pengulih graviti tu ulih tepusinka  turbin jana kuasa ti diengkah ba dalam tekat ai nya.

Enda ulih disakalka ai nya nya utai ke pengabis beguna dalam pengidup kitai. Lebuh penyampau tubuh majak mayuh dia orang ke begunaka ai mega majak mayuh. Nya alai dikena nampung pengawa ti begunaka ai nya, perintah mupuk begagaka tekat ai. Ngaga tekat ai tu begunaka penyampau ai ti mayuh. Dalam taun 1949, kurang lebih 5000 buah tekat ai udah digaga di serata dunya. Ba pengujung abad ke 20, bisi lebih ari 45,000 buah tekat ai di serata dunya udah digaga dikena mantu komuniti enggau ekonomi dalam aspek mutarka penanggul bah, pemakai, peluang bekereja, pemansang bandar sereta pemansang industri enggau domestik. (World Commission on Dams, 2000).

Tekat Hidro Batang Ai

Di Penampang enggau Kota Kinabalu, Sabah, Tekat Ai Babagon ulih mantu genturung pendiau dia napi penanggul kemarau panjai baka ke bisi nyadi dalam taun 1997. Ketegal ke bisi tekat ai nya sida ba genturung pendiau diau nadai irau ai abis taja pan penyampau ai ti patut dikena sida disekat. Begagaka tekat ai ukai tuju iya dikena mutarka penanggul bah tauka nyendia ai tang mega digaga ngasilka sumber hidroelektrik (Ismail Sahid, 1985). Di Mesir, Tekat Ai Aswan digaga ngambika orang bumai dia ulih nanam utai tanam sida dua tauka tiga kali setaun lalu ulih mega nyendiaka kuasa hidroelektrik ke  komuniti Mesir (Mader, 1995). Kelimpah ari nya, mayuh aktiviti bukai ulih diaturka ba tekat ai nya baka nginti, ski ai enggau pengawa matau menua ngena  perau baka ti bisi diatur ba Danau Kenyir, Terengganu enggau Danau Pedu, Kedah.

Taja pan ari pemanah ke udah disebut tadi, tekat ai ti digaga nya mega bisi mai empas ti enda manah ngagai ekosistem nyengkaum pengidup siga, mayuh macham utai tumbuh, mensia enggau ekonomi ba endur tekat ai ti digaga nya. Begagaka tekat ai tau ngasuh endur ti suah nerima ai ujan majak kurang, pengidup siga di darat enggau organisma dalam ai mega majak pupus. Pejalai ai mega berubah enggau jampat. Tukuh kimia enggau fizikal sereta kualiti ai mega berubah. Habitat sungai berubah nyadi habitat danau, ikan sungai enggau organisma akuatik ke bukai bepindah endur, sereta mega ngembuan habitat  ekologi sistem ti baru. Ripot Suruhanjaya Tekat Ai Sedunya (World Commission on Dams) ti dikeluarka dalam November 2000 madahka enggau terang habitat ba ili sesebuah tekat ai nya seruran berubah ke ngujungka rampa menua nya ngadaka spesies-spesies luar. Tu ti mai penanggul ngagai penyampau spesies-spesies asal sesebuah sungai nya.

Nitihka ripot nya mega madahka ekosistem ti udah berubah tau nyadi enda stabil. Tu ngurangka penyampau ikan ti nyadi punjereki raban orang ke berikan. Kelimpah ari nya mega iya mega nyadi endur agen-agen penyakit ke raya ngerekai ngagai mensia enggau spesies bukai. Besenutuk enggau nya mega, sungai nya udah enda ulih nyukung komuniti sereta aktiviti budaya enggau ekonomi ti bisi ba ili din lalu tu lalu nyadi sebagi ari sejarah aja. Ubah habitat tu mai empas ke enda manah ngagai orang ke diau ba genturung pendiau nya kelebih ngagai sida ke bepanggai ba sungai ti udah ditekat ari pengidup sida besehari-sehari. Aktiviti nebang kayu sereta berimbaka kampung ketegal deka ngaga tekat ai udah ngujungka penyampau isipadu ai ba endur ke seruran nerima ai ujan nya mega majak kurang. Kelimpah ari nya, aktiviti nyempiangka kampung nya ngujungka tanah tusur lalu endur nya balat agi nerima panchar matahari. Tu mai empas ngagai tikas pengangat endur, tikas pengangat tanah enggau tikas pengangat ai ti majak nambah. Ambika banding, Sungai Orange-Vaal di Afrika Selatan, impak ari ngaga 24 buah tekat ai  sepemanjai sungai (2300km) ngujung tikas pengangat dia niki ngagai 63% (World Commission on Dams, 2000). Ubah tikas pengangat ba sesebengkah endur tu nyadika  faktor  ti ngasuh ekosistem ba endur nya berubah.

Lebuh ti ngaga projek tekat ai tu, jalai mega digaga dikena ngangkut kereban enggau ramu, komponen mesin enggau pekereja ke tapak projek. Tanah tusur enggau pengamah angin mega nyadi ketegal aktiviti keluar masuk kereban pengangkut enggau pemansang ti dipejalaika ba palan alai ngagai tekat ai nya. Taja pan menua tu bisi ngembuan Taman Negara enggau kampung dalam ke agi mayuh tang endur ke udah diperimba alai ngaga tekat ai nya ngujungka pengidup siga nya mindah ngagai kebun mensia laban begigaka pemakai. Kampung puang ti udah diperimba nya ngujungka endur diau pengidup siga tu majak sempit sereta pemakai sida pan majak kurang ngujungka mayuh jelu tauka pengidup sida tu mati ketegal lapar pungkang.

Penginggar enggau empas ari penanggul tu maya begagaka tekat ai, baka jalai raya sereta pengawa betebangka kampung udah ngachau pengidup siga. Tu mega ngujungka pengidup siga tu mindahka diri ngagai endur bukai. Mayuh ari habitat jelu siga baka gajah, seladang enggau ke bukai udah nadai agi baka ti udah diperatika maya ngaga Tekat Ai  Kenyir. Tekat Ai Kenyir mega udah nenggelamka  sekeda tempat ba Taman Negara. Tu mandangka ukai semina jelu siga ti nerima empas negatif ari pengawa tu tang mega ngagai utai tumbuh ti idup ba Taman Negara enggau ba endur ke bekelingi enggau taman nya. Anang enda ingat, dalam kitai ke nguji deka nyaga Taman Negara ari sebarang penganchau, pengawa tu udah nyadi pun pengerusak Taman Negara jemah ila.