Jaku ti sama rata ke rayat di serata Nusantara

Sasterawan Indonesia ke tebilang enggau novel iya dalam tahun 70-an ke dijadika bup teks di Malaysia, Pramoedya Ananta Toer kala ditanya kebuah iya nulis dalam jaku Melayu lalu ukai  Jawa.

Pekara tu dibantaika laban lebuh iya berengkah nulis, maya nya jaku Melayu empai tegap nyadika jaku Indonesia.

Agi mega Pramoedya nya orang bansa Jawa, bansa  ke mayuh sereta  orang ke mayuh agi ngena jaku nya ari  pengguna jaku Melayu. Endang aruh iya nulis dalam jaku iya empu. Tambah mega jaku Jawa ngembuan tradisyen litericha ti tinggi sereta kompleks, nya alai enti jaku Jawa nyadika jaku surat pekara ti deka dikenataika iya deka mudah agi diperetika orang mayuh. Kelimpah ari nya, enti Pramoedya deka nulis ngagai mayuh pemacha sereta milih jaku Jawa nyadika jaku surat nya ukai sesebengkah pekara ti ngalitka ati.

Taja pia iya milih jaku Melayu nyadika jaku surat ketegalka prinsip iya ke bepegai ba ideologi ti sama rata antara mensia.

Kenu ku iya jaku Jawa ngembuan mayuh ringkat lapis sereta engkeman agi dikena ba komuniti ti bisi mayuh kelas enggau kasta. Jaku ti dikena sida ke ba kelas baruh nya bebida ari sida ba ringkat di atas. Baka nya mega lebuh orang ba ringkat baruh bejaku enggau orang ke bepangkat tinggi agi. Baka nya mega enggau orang ke bepangkat tinggi bejaku ngagai sida ke baruh. Semua nya begunaka jaku ti bebida.

Ketegal nya, Pramoedya milih deka nulis dalam jaku Melayu. Kebuah pia laban jaku Melayu ngembuan tukuh ti sama rata tauka egalitarian. Semua orang ke bejaku jaku Melayu nya sama tikas taja pan lebuh ngena jaku nya tentu bisi chara enggau adat basa ti meruan.

Jaku Melayu endang ngembuan mayuh pemanah ke ngujungka orang mayuh milih jaku nya nyadika jaku ti dikena sida bekomunikasyen entara pangan diri. Tukuh iya ti mudah, sama rata sereta ngembuan pengelentur nyadika jaku Melayu ulih diterima nyadika jaku ti dikena ba wilayah pulau-pulau Asia Tenggara berengkah ari jeman Sri Wijaya. Nitihka fakta sejarah asal jaku tu berengkah ari sebuah perintah mit Hindu-Buddha ti benama Malayu ba ulu Sungai Batanghari, Jambi, Sumatera.

Maya jeman Kesultanan Melaka, jaku Melayu berengkah ngena tulis jawi. Lebuh Belanda megai Sumatera enggau Jawa, sida milih Melayu nyadika jaku perintah ketegal orang asal ke gawa enggau perintah enda nemu jaku Belanda enggau manah.

Berengkah ari taun 1896, tulis rumi jaku Melayu berengkah dikena ba Hindia Timur. Dalam  taun 1901, jaku Melayu Hindia Timur ngena atur sepil Van Ophuijsen tang ba Tanah Melayu, atur sepil rumi ti dikena nya ditempa Wilkinson dalam taun 1904. British mega ngena jaku Melayu nyadika jaku ba opis perintah ba menua ke dipega sida iya.

Penjajah

Tang utai ke nyadika ironis nya, pengawa penjajah ke ngerembaika jaku Melayu di Hindia Belanda ngujungka iya nyadika jaku dikena ngelepaska diri ari dipegai penjajah.

Belanda maya nya udah bejadika progran Taman Pustaka; iya nya numbuhka 700 buah librari dalam timpuh dua taun ba sereta menua ke dipegai iya. Semua tu nyaup ngerembaika jaku Melayu.

Nya alai nadai ngalitka ati lebuh 28 Oktober 1928, Muhammad Yamin mantaika tuduh penemu minta jaku Melayu nyadi Jaku Indonesia (Bahasa Indonesia). Kongres besetuju milih jaku Melayu lalu ukai Jawa taja pan bisi sebagi ari raban kongres nya enda nemu jaku Melayu. Raban elit enggau raban tepelajar maya nya ngena jaku Belanda.

Kenyau ari nya, jaku Melayu nyadi Jaku Indonesia (Bahasa Indonesia) . Iya ukai semina jaku ke dikena sereta jaku penyerakup kaul tang jaku ke ngembuan tikas ti sama rata. Ngena Jaku Indonesia, semua rayat iya dipeda sama tikas sama kelas. Enda baka maya jeman dipegai menua bukai raban elit ngena jaku Belanda, lalu raban feudal di Jawa ngena jaku bangsawan.

Lebuh menua Indonesia madahka diri merdeka dalam taun 1945, Tanah Melayu agi dipegai British.

Tang angin merdeka datai mega ke Singapore enggau Tanah Melayu. Bup-bup litericha Indonesia nyengkaum iya ke ditulis Pramoedya sampai mega ke kedai-kedai bup enggau ba librari di Singapura enggau Tanah Melayu.

Maya nya mih tumbuh mayuh penulis-penulis Melayu. Di Singapura, sida lalu numbuhka  gerempung ti dikumbai Angkatan Sasterawan 50 (ASAS 50). Sida ngaturka Kongres Bahasa lalu nyediaka memorandum resolusyen. Memorandum tu digaga nyadi bup lalu dikeluarka Oxford Universiti Press Singapura.

Antara isi memorandum nya minta jaku Melayu ngena tulis rumi nyadi jaku bansa.

Ketegal nya mih lebuhTanah Melayu bulih merdeka, jaku Melayu dipilih nyadi jaku bansa.

Reti nya dalam taun 1957, dua buah menua di dunya ngambi jaku Melayu nyadika jaku bansa.

Tang di Indonesia, iya udah enda dikumbai jaku Melayu tang diberi nama Jaku Indonesia. Nama Bahasa Indonesia dikena ngambika semua peranak menua Indonesia ke mayuh agi jaku sida ke ukai asal jaku Melayu ulih ngasaika sama-sama beempuka jaku nya.

Tang ba Tanah Melayu, jaku bansa nya agi dikumbai jaku Melayu. Dalam jaku English, Tanah Melayu dikumbai Malaya lalu jaku Melayu disebut Malay.

Lebuh Serakup Malaysia ditumbuhka dalam taun 1963 mayuh rayat iya ukai ari pupu bansa Melayu kelebih agi sida ke diau di Singapore. Tanah Melayu enggau Malaya digantika enggau leka jaku Malaysia Barat tang udah nya nyadi Semenanjung Malaysia. Besenutuk enggau nya mega jaku Melayu ditukar nyadi Jaku Malaysia (Bahasa Malaysia).

Baka Jaku Indonesia, Jaku Malaysia mega ngembuan mesej ke sama rata. Ari Aceh ke Papua Barat, Jaku Indonesia diguna nengah chara ti sama rata. Baka nya mega ari Perlis datai ngagai Sabah Bahasa Malaysia dikena ba semua tikas pendiau. 

Kedua-dua nya endang meruan jaku Melayu. Tang nengah nama Bahasa Indonesia enggau Bahasa Malaysia, iya ngembuan misyen  ke sama rata ba mata rayat.

Nya alai penyadi sereta pemansang kedua-dua jaku tu jemah ila endang diganding sereta digabung sama.

Artikel Penuh diambi sereta dibali ari: http://www.utusan.com.my/utusan/Rencana/20121111/re_10/Bahasa-untuk-kesaksamaan-rakyat-di-seluruh-Nusantara#  
© Utusan Melayu (M) Bhd