Etika lebuh ngubah status FB

Sebedau tu aku udah ngenataika buah kenang aku senentang Facebook (FB) ke dikumbai aku nya sebengkah ari pengarap baru ti dikemeranka mensia mayuh kemaya hari tu. Aku sekali tu agi ituk bekenangka pekara ti bekaul enggau FB tu, tang kenang aku sekali tu lebih ngagai etika kitai lebuh ke ngubah tauka update status. Batang pekara tu diambi sereta dibali ari mayuh bengkah kereban bacha kelimpah ari peneleba aku empu lebuh ke enggau orang ngeruh ai dalam FB. Tuju aku ke ngenataika buah kenang tu nadai bukai semadi ke deka nambahka kereban bacha dalam jaku Iban sereta bekunsi penemu senentang etika ti engkeman lebuh kitai nampil diri ba FB. Enggau lebas jaku nya, kiraka nadai bisi ati mih deka ngenataika karang ti tau ngasuh ati raban pemacha nyima lebuh macha karang tu.

Kitai sama bela nemu orang ke ngena FB kemaya hari tu nyau majak mayuh, majak betambah baik nya raban nembiak ke agi besekula tauka orang ke udah bekereja. Nitihka statistik di Malaysia aja bisi 13,205,060 (http://www.socialbakers.com/facebook-statistics/malaysia) orang ke udah ngerejister diri nyadi kaban dalam Facebook.Tuju siku-siku enggau orang ba FB tentu nadai bukai tang laban deka ngerembaika network sosial enggau pengawa dagang. Taja pia, chara sereta etika lebuh ngena akaun tu tentu bisi ngambika enda salahguna ke tau ngujungka ngemediska diri empu tauka ngemalu orang bukai.

Nyadi leka jaku tauka terminologi ke dikena aku bekenangka pekara tu nya semua ke dikira aku bisi bekaul enggau Facebook baka leka jaku Facebook, update, tag, friend, unfriend, like, unlike, komen enggau status. Belalauka bacha sereta peneleba aku ditu aku ngerintaika lima etika ke asai aku patut diperati sereta dikemeranka kitai lebuh enggau orang nampil diri ba Facebook. 

1.    Anang update status maya ringat

Sekeda orang ngena Facebook nya endur ngenataika asai ati kelebih agi enti enda puas ati ngagai orang bukai. Iya tu deka mansutka semua pekara ke bisi ba dalam ati iya tadi. Maya ke mansutka pengasai tu iya nadai ngira asai ati orang bukai ke sama-sama enggau macha  status nya.

Nama agi, enti bisi pangan Facebook ke meri respons ke positif. Enti ulih gaga mih Facebook tu alai kitai beperindang ukai alai kitai mantaika pengasai ati ke enda puas ngambika serata dunya nemu. Bantaika mih ulah ke profesional mimit!

2.    Anang rindu ngetag mayuh orang

Bisi sekeda orang rindu amat ngetag pekara ti enda tentu menuku baka pekara ke semina mai pangan diri makai, meri pesan selamat pagi. Engka bisi mih pangan kitai ke enda tentu rindu enggau chara nya. Enti kitai bisi meda pangan kitai nya nadai respons baka nekan like, tauka meri komen manah kitai muai aja tag nya tadi.

Entara faktor ke ngasuh orang enda rindu ditagka kitai nya nyangka pekara ke dibantaika kitai nya enda dikerinduka sereta nadai kaul enggau pengidup sida. Nyangka nya mih ke ngasuh sida enda tentu lantang. Ku orang enti deka tag orang bukai, tag mih senentang pemujur kitai tauka pekara ke minta penemu ari sida.

3.    Mantaika status ninting minit

Nyau mabuk tudah pangan laban nadai pengawa bukai tak semina ngemaska baru status Facebook nyentukka bisi kena tangkap pangan lain laban nadai kereja laban tembu rindang update status Facebook ke dikeluarka iya tiap-tiap lima minit. Uji kitai berunding dalam ati diri, enti sehari 10 kali nuan update status bepun ari dani pagi, makai, bejalaika aktiviti datai ngagai tinduk malam hari.

Kenu ku orang enti naka madahka diri ngirup pagi belaukka manuk tauka madahka diri deka ngagai agu manah enda ibuh dibantaika ba Facebook laban iya tau ngasuh orang begedi tauka menyampah kenu jaku orang kemaya hari tu meda status nya tadi. Tentuka pekara ti deka diupdateka kitai nya pekara ti signifikan tauka penanda ti beguna dalam pengidup kitai.

Baka nya mega enti kitai gawa ke orang tentu maya gawa kitai enda tau rindang enggau Facebook enggaika tauke, boss tauka tuai alai kitai gawa nya nganu kitai. Kitai mega enda diperangsang update pengawa ti digaga kitai kelebih agi baka pengawa perintah tauka pengawa ke bisi empas ari suku akta rahsia rasmi. Kenuka ngeshow sereta madahka pengawa diri tang iya tau nyadika evidens dikena tuai nyalahka kitai. Kelimpah ari nya bisi orang rindu kega update madahka pendiau diri. Enti indu tauka kitai nya ditemu orang bisi duit pengelikun kitai enda tentu selamat laban orang nemu dini endur kitai sereta ulih ngipa kitai sebarang maya. Ukai ngajih rangkang ngachuk mata.

4.    Salah jalai ngena jaku perangsang

Nadai salah bekunsi jaku perangsang tauka motivasyen ba Facebook enggau bala pangan ba laman siber tu tang iya ke nyadika buah kenang nya kitai empu ti ngemansutka jaku nya enda tentu meretika reti rambai jaku perangsang nya, kelebih agi ayat ke panjai, ngembuan jaku silup sereta begunaka pemereti ati ke dalam senentang pekara nya. Enti penemu semina rapas penyuluk manah agi kenataika jaku ke pandak sereta mudah ditemu reti iya sereta iya ti ulih diterima semua orang.

5.    Ngelumuka naka pemayuh pangan

Ngembuan beribu-ribu pangan endang siti pekara ti ngerinduka ati kelebih agi ngagai orang ke endang rindu bepangan sereta iya ke rindu ngerapatka kaul sosial enggau orang bukai. Tang patut mega dikeingatka lebuh kitai ngembuan kelalu mayuh pangan dia pangan ke bekualiti nya majak mimit. Kitai balat agi ngemeratka kuantiti ari kualiti.

Uji perundingka dalam ati enti status kitai dibacha 700 iku orang lalu ari 700 nya bisi mih ke salah anggap jaku kitai nya tadi lalu dikenataika iya ngagai orang bukai. Tu tau meri empas ke enda manah. Kati enti jaku kitai nya jaku ke personal tentu iya tau mai empas negatif ngagai kitai empu. Enda pia?

Simpul runding

Nya mih sekeda ari etika ke dipekunsika aku enggau kitai sebuat pemacha. Sebedau aku nyangkaika kenang aku arapka pekara tu bisi beguna lalu tau nyadika tenggau sereta lalau kitai lebuh ke enggau orang nampil diri ba laman Facebook.  Selamat befacebook.