Pengarap Facebook

Aku udah lama ngeregister diri nyadi raban facebook iya nya kenyau ari taun 2007. Maya nya bedau mayuh orang Malaysia nyadi raban facebook. Nya alai maya nya kitai bekelala enggau sapa ke bisi sama-sama ngeregister diri taja pan sida tu nadai dikelala. Kemaya hari tu mayuh amai orang udah nyadi kaban facebook baik nya pangan diatu, pangan lama, pangan maya sekula enggau kaban belayan. Diatu aku udah jarang amai nampil orang berandau dalam facebook laban udah datai ba tikas lembau semadi sekali dua, suah agi ke ngelawa gerempung tauka kedai online.

Nyadi buah kenang aku sekali tu nya becherita pasal facebook ke diatu balat amai dikemeran kitai enda milih bansa, penempa enggau umur. Facebook kemaya hari tu udah nyadi siti ari pengarap tauka agama baru. Nama kebuah aku ngumbai nya pengarap tauka agama baru?

Enti nuan enda tentu rindu macha entri post tu nuan dilalau enda ibuh kiruh majak macha artikel tu laban enti pia nuan deka dikumbai "murtad" ari sukut pengarap asal nuan baka sekeda gerempung ukai kuasa perintah tauka "NGO" ke boikot lagu Jacklyn Victor ketegal iya ke belagu dalam jaku Melayu lagu rohani Kristian.

Baka pengarap bukai mega, Pengarap Facebook ngembuan raban penitih ke universal ti ngerekai ngagai serata endur di dunya sereta nyengkaum menua asia baka Malaysia. Kebuah aku ngumbai sida tu raban pengarap Facebook  laban entara sedar enggau enda kitai balat agi ngemeratka facebook  dalam semua pekara 'nyata' ba dalam facebook. Pengarap Facebook mega ngembuan 5 Rukun pengarap. Uji peratika 5 Rukun Pengarap Facebook baka ke dirintai ditu;

5 Rukun Pengarap Facebook:
1. Suah nukar Gambar Profile
2. Nulis tauka ngaga Wallpost ninting hari
3. Mesti klik Like ba Wallpost pangan
4. Mesti Share sesebengkah pekara sekurang iya 1 kali sehari
5. Ngemasukka Gambar baru tiap sebulan sekali .

Rintai  5 Rukun di atas nya pekara ti mesti dikereja tiap-tiap orang bepengarap Facebook , enda ibuh madah ngagai bala pangan ngasuh sida ingat laban orang ke bepengarap Facebook chukup angkun sereta tau dikira 98%  sida tu enda mudah enda ingatka 5 Rukun Pengarap tu .

Baka ni chara besampi ninting hari dih?

Sempama baka Nabi

Ngagai orang ke bepengarap Facebook sida enda ibuh pansut ari rumah  tang semina tama ke rumah sembiang Facebook nengah chara "Log In" aja lalu ninting pagi nuan ulih ngenataika mayuh macham utai ba ati nuan di "wallpost" iya nya "Dinding Ajih" ti ngembuan Pengajih ari Nabi Facebook iya nya Mark Zuckerberg. Enti sema Sampi peminta nuan diterima nyangka bisi sekeda "malaikat" facebook deka ngelalau nuan ngasuh nuan ingat mega ngagai "sitan" laban sida tu seruran ngachau mensia ngasuh sida terus taluk ke facebook. 

Nuan nyangka enda arapka diri empu ke udah nyadi sebagi ari penitih Pengarap Facebook nengah Nabi Iya ( Mark Zuckerberg ) iya nya ari Rumah Sembiang dunya siber.  Artikel tu ke bendar nadai ngembuan tuju deka nyima ati individu tauka pemacha tang semina nyadika buah kenang dikena ngisika ruang ba laman Tempalai Kenang.