Endur diau orang Iban patut ngembuan tanda nama ke engkeman

Iban nya raban bansa ti pengabis mayuh diau nguan menua Sarawak. Ari penyampau semua orang ke diau ba Sarawak nitihka statistik 2010 (Jabatan Tenaga Kerja Sarawak), 33 persin iya nya 738,700  nya orang Iban. Kemaya hari tu raban bansa Iban ukai semina diau ba rumah panjai aja tang sekeda ari sida tu udah diau ba rumah nyembuah sereta ba siti genturung pendiau. Ketegal nya mayuh macham nama dikena raban bansa Iban ngelai tauka ngaga tanda nama ngagai endur sida diau baik nya ba rumah panjai tauka ba genturung pendiau. 

Pekara ti deka dikenangka aku sekali tu iya senentang pematut rumah panjai tauka genturung pendiau raban bansa Iban tu bisi kelai ke ulih mida iya ari rumah panjai tauka gen­turung pendiau raban bansa asal ke bukai di Sarawak. Kel­impah ari nya iya mega nyangka ulih dikena nyeliahka penyarut ti bekaul enggau atur megai rumah tauka megai sebuah genturung pendiau.

Nitihka penemu siku pemesai ari Opis Kunsil Penyimpan enggau Penusun Adat Menua Sarawak (MAIS), Jimbun Tawai (Utusan Borneo 11 Oktober 2010) madahka nama ti engkeman sereta nyemetak didinga tauka dis­ebut dikena ngelai sesebuah ru­mah panjai tauka genturung pendiau bansa Iban nya ngena nama Rumah Panjai Iban (RPI) tauka Genturung Pendiau Iban (GPI).

Baka ke diatu, enti kitai bejalai ngena kerita sepe­manjai jalai raya berengkah ari Sematan ngagai Limbang, tentu kitai tepedaka mayuh macham chara Iban ngaga nama rumah panjai tauka genturung pendiau sida.

Iya ke dipeda nya semina nebing jalai raya aja lalu bedau ny­erangkung rumah pan­jai tauka genturung pendiau Iban ke ngachir ba sepemanjai tebing sungai tauka di ulu en­tigis sekayu menua Sarawak.

Ambika banding sekeda ngaga nama rumah panjai bepun ari nyebut nama Tuai Rumah lalu ditangkanka enggau nama tempat ti endur sida diau. Chunto, Rumah Jit, Sungai Keruh, Stapang; Rumah Daniel Ringgit, Ibol, Sri Aman; Rumah Timothy Salang, KM 25, Jln. Miri-Bintulu.

Nambahka nya sekeda ngaga nama rumah panjai sida ngena chara semina nyebut nama tempat ti endur rumah panjai nya dientapka baka Munggu Beringin, Abuk Mawang, Ense­bang Pelai, Sedarat Mawang, Sebangki Panjai.

Sekeda ke diau nebing tauka ba nanga sungai ngaga nama menua sida nitihka nama sungai. Ambika chunto, Rantau Kemayau Manis; Nanga Setamang; Nanga Dap; Lepung Bilat enggau mayuh agi ke bukai.

Nya alai pekara ti baka tu enti enda diputarka tau ngasuh kitai balat agi charut runding. Bisi ga sekeda raban bansa Iban ke kreatif agi lalu madahka pendiau sida di ‘kampung’. Sida tu udah ngelaika nama alai sida diau bepun enggau leka jaku kampung, ambika banding baka Kampung Sepan; Kampung Semumuk Baruh, Kampung Batu Kudi sereta mayuh agi nama kampung ke bukai.

Salah munyi jaku seleka; reti leka jaku kampung dalam jaku Iban nya babas tauka utan dalam jaku Melayu. Enti semua raban bansa Iban nya nemu reti kampung dalam jaku Iban tentu bendar sida enggai ngumbai diri datai ari kampung. Nembiak Iban kemaya hari tu kelebih agi ke besekula ba nengeri ti enda tentu nemu jaku Iban ti dalam gaga bendar madah ngagai kitai lebuh ti ditanyaka penunga madahka diri deka pulai ke kampung.

“Reti ‘kampung’ tu, nitihka ba lambar 137 dalam Iban-English Dictionary ke ditulis Anthony Richards nya kan­dang babas tuai ti nadai kala diperimba tauka endur bumai. Di Sarawak tu semina sekeda ari raban bansa Penan ke agi diau ba dalam kampung.

Ketegal ari ubah pemansang dunya ke majak regas amat nyadi, raban bansa Iban kemaya hari tu ke udah ngasaika diri ba dunya siber, tentu berasai nyelai enti dikumbai orang diau di kampung laban diatu jarang rumah panjai Iban dientak tauka dikelingi kampung.

Siti agi chara raban bansa Iban tu ngelaika menua sida iya nya ngena nama rampa menua ke endur rumah panjai nya dien­tapka baka, Pakit A, Sutung Baru, Melugu Tembawai, Munggu Lalang, Gua Sukat sereta mayuh agi ke bukai. Chara meri nama ti baka nya chukup enda ngenyamaika ati laban iya ukai semina enda terang tang nadai sekali ngayanka identiti raban bansa Iban. 

Nya alai, penerang patut diatur dikena ngeluruska pekara tu ngambika ulih dikemanahka agi sereta disemaka ba semua endur di menua Sarawak. Enti utai tu udah dipeluruska tentu iya jemah ila ulih ngayanka iden­titi raban bansa Iban lalu ukai nyarutka identiti ke tau ngujungka  ambiguiti ngagai bansa Iban.

Menua kitai endang udah lama merintah diri tang pengelemi ke baka tu enda diperundingka raban orang ti bekuasa kelebih agi pengari ti ngarika raban bansa Iban empu. Enti nadai siku kiruh deka mutarka pekara tu nyangka iya semina nyadika buah kenang sekeda ari raban bansa Iban ti siru identiti sereta pengelala bansa.

Ngenang pasal jalai ngaga nama palan pendiau raban bansa Iban, Jimbun meri tuduh penemu ti madahka enti Iban diau ba rumah pan­jai, dia menua nya tau dikelai ngena rambai jaku, “Rumah Panjai Iban (RPI)”. Ambika banding, RPI Sungai Keruh, KM 18, Jalai Sri Aman-Eng­kilili; RPI Ibol, Sri Aman; RPI Po Ai, Melugu, Sri Aman; RPI Nanga Setamang, Engkari, Lubuk Antu sereta mayuh agi chunto ke bukai.

Baka nya mega ku iya, enti pendiau Iban ke enda berumah panjai tang diau begenturung numpuk kediri, dia palan nya tau dikumbai “Gentu­rung Pendiau Iban (GPI)” baka GPI Tanah Mawang, Balai Ringin, Serian; GPI Sepan, Balai Ringin, Se­rian; GPI KM 10, Lalai Miri-Bintulu; GPI KM 3, Jalai Lubuk Antu-Engkilili sereta mayuh agi kelai ke bukai.

Ngelama tu mayuh amat rumah panjai ti dikelaika enggau tanda nama ti bepun enggau tuai rumah. Penemu ti ngena nama Tuai Rumah nyadika kelai tanda nama diasaika udah tinggal maya. Ambika chunto, Ru­mah Ajul Anak Tegelam, Rantau Menggeris, Engkari, Lubuk Antu. Chara nyebut baka tu ba penemu Pengajar Jimbun mega nadai meri identiti ngagai orang ke diau ba rumah panjai nya. Nama agi enti tuai rumah nya udah nadai sereta diganti enggau tuai rumah baru. Dia pengawa ke nukarka nama rumah panjai nya tau pulai penusah ngagai orang bukai ti deka bekirumka surat tauka begigaka endur nya.

Di Sarawak kitai sama bela nemu ukai raban bansa Iban aja ke diau ba rumah panjai. Bansa Orang Ulu, Bidayuh sereta ke bukai pan bisi mih beru­mah panjai. Nambahka nya, tuai rumah kemaya hari tu suah betukar nitihka timpuh ti dikemendarka perintah megai sesebuah rumah panjai. Penanggul ke ditapi iya nya, tiap kali tuai rumah betukar, nyuah nya mega pal mandan­gka menua nya ditukar ti ngu­jungka pengiruh sereta muai belanja.

Tang ba penemu Menteri Pemansang Rama enggau Kandang Nengeri (KPSU), Tan Sri William Mawan Ikom (Utusan Borneo, 13 June 2011) madahka menua pelilih mit Pakan udah berengkah ngelai rumah panjai sida ngena nama menua. Ku  iya, mayuh rumah panjai ba kandang menua Pakan diatu enda agi ngena nama tuai rumah nyadika kelai tang ngangkatka nama menua tauka batang sungai. Ubah tu udah diepejalaika dikena ngenyenangka atur pengawa perintah sereta ngenyamaika orang ti datai ari menua bukai nemuai ngagai rumah panjai nya.

Ba penemu Tan Sri, sistem ngena nama tuai rumah balat bendar nyaru sereta nesatka orang ti datai kelebih agi pemesai perintah tauka temuai ti datai ngagai sesebengkah rumah panjai nya. Ari ti ngena nama menua baka ti dikena ba Pakan dia iya udah ngemuntangka atur perintah kelebih agi pekara ti bekaul enggau tanah. Ngelama tu rumah panjai ngangkatka nama tuai rumah lalu nyemaka tuai rumah nya nyau nadai dia iya deka diubah ngena nama tuai rumah ti baru. Nyadi ba orang ke agi ingatka rumah panjai nya ngena nama tuai rumah ke lama dia iya deka saru lalu tesat.

Taja pia, siti agi tuduh penemu bisi dipansutka siku Chairman Gerempung Tuai Rumah Sibu (PTRS) Penghulu James Semilan (Utusan Borneo 1 June 2011). Ba penemu iya Rumah panjai enda ulih dikelai enggau nama nitihka sungai, bukit enggau palan bukai tang nitihka nama Tuai Rumah (TR) ke megai rumah panjai nya. “Enti sema ngelai ngena nama bukai baka bukit tauka sungai, kitai nangi nama (identiti) rumah panjai tau lenyau,” pia ku iya. Iya ti megai semilan buah rumah panjai ba Bawang Assan madahka, pekara saru tauka penanggul ngagai sida ke bekaul enti Tuai Rumah ditukar enda kala nyadi ba menua pegai iya. “Ngena nama Tuai Rumah udah dikena ari aki ini kitai suba.

Nya alai ketegal ke deka minta kelala bansa bukai, baik nya ari dalam tauka luar menua tu, raban bansa Iban ke lebih agi sida ke megai tanggung pengawa, patut berunding ngemanahka pekara tu enda nyerangkung bansa bukai. Siti ari jalai ke tau ditengah ngambika penanggul tu tau diperund­ingka iya nya, maya aum Tuai-Tuai Rumah,Penghulu, Pemancha, Temenggung tauka lebuh seminar rumah panjai. Maya aum tu mih semua tuai rumah, penghulu, pemancha tauka temenggung dipinta mansutka penemu diri sentang nama ti engekeman dikena ngelaika endur raban bansa Iban diau. Siti pemutus penemu patut nyumbuk asil ari aum tu lalu semua rumah panjai tauka genturung pendiau raban bansa Iban patut ngena tanda kelai ti udah dipesetujuka semua kaban ti ngulu aum nya.

Pengawa ti meri nama tauka tanda kelai ti engkeman ngagai rumah panjai tauka genturung pendiau ukai pekara ti tusah dipejalaika; indah papan ke bedinjat ulih mega digaga rata enti diketam. Nya alai dikena nyimpulka kenang sentang pekara tu, siti ari bungai jaku ke engkeman nya enggau pekara tu iya nya ‘Dikelala bansa ari pendiau, dikelala rumah ari nama endur kitai diau’.