Sindrom Liat Berubah dalam Pemansang Jaku Iban

Jaku Iban munyi ke udah disebut ngelama tu udah jauh bendar mansang enti dibandingka enggau menya. Diatu jaku tu udah dipelajar ba dua buah universiti iya nya Univerisiti Pendidikan Sultan Idris (UPSI) enggau Universiti Malaysia Sarawak (UNIMAS) lalu dua buah institut pematih pengajar iya nya IPG Sarawak, Miri enggau IPG Rajang kelimpah ari ke endang dipelajar ba sekula primari enggau sekondari. Taja pia pemansang ti baka tu enda tentu mujur enti nadai sukung ari semua raban bansa Iban ke angkun ke jaku tu.

Pemansang jaku Iban ba bidang pelajar ukai semina dipeda ari turai pelajar enggau tisih aja tang dipeda ari penegap Sistem Jaku Iban ti dikena ba endur tu. Nitihka penemu sekeda sida ke endang suah diambi ngaturka turai tauka sistem jaku Iban tu madahka sekeda bansa Iban taja pan nadai data ti nyentuk madahka agi ditemu agi lembau amat nerima sebarang ubah baru dalam sistem jaku Iban. Tu diperatika lebuh begempuru bejuraika penemban sistem tu suba sebedau iya mujur dipejalaika di sekula kemaya hari tu.

Agi tubah bala Iban kelebih agi orang bukai ke ari luar sistem pelajar sekula ke enda setuju enggau sekeda atur ti udah diputuska komiti ti nangkup pengawa ngaga sistem tu. Berindik ari nya, sekeda pemutus asal enda dikena tang lalu diubah nitihka bantah sida tu. Taja pia, bantah ti dikenataika sida nya nadai tak nyenggala bepanggai ba prinsip sistem sepil. Tebal agi bantah nya bepanggai ba pengasai ati diri.

Nitihka jurai penemu Profesor Dato’Asmah Haji Omar (1995) dalam keretas iya “Pandangan Terhadap Sistem Ejaan Bahasa Iban Yang Disediakan Oleh Dayak Cultural Foundation: Atur Sepil Jaku Iban” ti nyadika pelasar lebuh ngaga sistem sepil tu bisi menatika kriteria tu:

i       Prinsip Linguistik

ii      Penulin

iii     Penyedang

iv     Pengelentur

v      Praktikal    

          

Prinsip linguistik tu pelasar ti pemadu beguna lebuh merambu siti-siti pengawa ti deka ngasuh jaku nya standard baikka ari aspek sistem enggau struktur fonologi tauka ari aspek struktur jalai jaku (grammar). Taja pia, pengentap sistem sepil jaku Iban enda ulih beduduk penuh ari prinsip tu ketegal ti bisi ngembuan pengaya jaku enggau penyelai enti dibandingka  enggau  jaku  bansa  bukai.  Berindik  ari  nya,  kriteria  ti  bukai  mega  bisi dikenatika dikena napi pekara tu.

Sistem Sepil Jaku Iban di Sekula tu ngembuan tukuh penulin kediri empu ti mandangka jaku Iban endang ngembuan chuan diri lalu ukai beduduk ari chuan jaku bukai. Taja pia, chuan sistem sepil jaku Iban enggau jaku Melayu bisi bekabih ketegal kedua-dua jaku tu ti sebilik dalam jaku seperugan.

Jaku Iban sekalika jaku asal tauka jaku injau endang ditulis ngena urup Roman. Berindik ari tu, sistem sepil tu digaga lalu ditaga ngena lambang ti enda kelalu lebih ngambika mudah dipereti lalu dikarapka chukup dikena napi pelajar jaku Iban ti disadang deka dipelajar sereta dikerembaika ngagai bansa bukai.

Dalam sistem pelajar sekula, jaku Iban agi ba tikas ti benung ngerembai mansang ari semua aspek. Berindik ari nya, sistem sepil jaku Iban digaga enggau naka ulih ngambika setipak enggau pemansang jaku Iban kemaya hari tu ngena chara berinjauka jaku bansa bukai dikena napi segang pemansang dunya sains enggau teknologi.

Sistem sepil ti standard, tegap sereta entap mesti praktikal dikena ba sebarang alai enggau maya lalu diterima semua ke belajar enggau ngajar jaku Iban enggau nadai penekul. Sistem Sepil Jaku Iban di sekula tu ngembuan taga kediri empu. Nya alai sistem sepil tu mesti bepelasarka jaku Iban ti dikena dalam kurikulum sekula ti ulih ngayanka siti bansa enggau siti jaku ke jemah ila.

Munyi ku Pengajar Harold Unsie (Utusan Borneo, 18 Sept. 2012); “Enti dekaka 1 sistem, 1 jaku, 1 bansa tu nyadi, semua mesti sanggup nerima ubah lalu ngelengkaka sekeda penemu lama, pikir kelia ti nyadi penekul, ti nyadi penanggul”.

Nya alai raban bansa Iban ti angkunka jaku Iban sereta rindu meda jaku tu mansang dudi hari patut bendar muai ati kepapas bejaika sereta ngelemika jaku ba mua bansa diri empu lalu lebuh begulai enggau orang bukai. Raban bansa Iban enda milih pangkat dalam tikas sosial enda milih nya kaya tauka mesena, tuai tauka biak patut sama-sama bebai baka bumai, betemuku baka nubai ngambika jaku Iban ulih mansang ngerembai ukai semina dikena Iban aja tang mega orang bansa bukai.