Tebilang sereta semampai dikeingatka

Pelaba aku raban pemacha ke beumur sereta besai ba era 60an,70an tentu ingatka mayuh macham pekara. Dipelabaka aku mega bisi sekeda raban pemacha ke ingatka utai ti dikumbai Tonik Chap Gajah.

Nembiak rebak baru pelabaka aku tentu enda nemu nama utai ke dikumbai Tonik Chap Gajah. Iya tu entara ai tonik ti pegari nama dalam taun 60an ngagai 70an. Sapa ke bisi ingat tiap-tiap kali meli tonik nya deka diberi perais sebatang sudu ti dilekatka ba botol nya.

Tonik ti dikeluarka syarikat A.S Mohamed Kassim & Co nya tebilang ketegal suah diiklanka produk nya ba surat berita enggau radio. Ukai semina chara nya aja, syarikat nya mega kala sponsor rekod EP band The Sangam Boys ngambika mantu ngelakuka produk sida.

Ngagai sapa ke kala ngirup tonik nya tentu agi teingatka asai tonik ti payau nya. Taja pan produk kala tebilang dulu suba tang ketegal kurang promosyen ngujungka iya majak tenggelam ari pengingat.

Kelimpah ari nya dipelabaka aku tentu sekeda pemacha mega agi ingatka sekeda jenama ti udah lama nadai ditem agi baka minyak angin Chap Lang, Chap Kaki Tiga, Minyak Geliga, minyak buk Warda, pupur AAA, sabun basu Sunlight, Swastika, Drive sereta ubat pedis pala Aspro, Vinac enggau  Dusil.

Enti kitai nguji ngiga ba laman web tentu kitai agi tetemuka jenama-jenama tu. Nyau deka semua jenama ke disebut tadi nya agi bisi. Minyak angin Chap Lang, Minyak Geliga enggau pupur AAA agi bisi dijual ba pasar. Semina sabun basu Sunlight, Swastika enggau Drive aja nadai ditemu. Aspro, Vinac enggau Dusil engka enda diimport agi ke menua tu.

Baka nya mega kitai ke nyadi pengguna. Pengangkun kitai ke sesebengkah jenama nya engka berubah enti sida enda bagas ngelakuka barang sida. Ukai nama laban kemaya hari tu nyau beribu produk baru bisi ngemenuhka rak-rak ba pasar raya.

Enti sesebengkah produk nya enda nguji ngelakuka barang nitihka timpuh ti udah ditetapka nyau kelama produk nya nyangka enda dikeingatka agi. Lebuh iya udah enda diingat, raban pengguna deka ngiga produk jenama ti bukai. Tentu iya jenama bukai ke digiga nya jenama ti suah pansut ba dalam iklan.

Nya mih kebuah aku temegah ga enggau jenama Milo. Tu mih siti-siti iya jenama ti udah lama bisi dijual ba menua kitai. Kenyau ari taun 1950, Milo agi majak tegap enggau strategi ngemasarka produk iya. Aku agi ingat maya agi mit kelia gaga amat bebaris laban deka ngulihka Milo pechuma lebuh van Milo datai ke sekula. Nya mih peneleba ti unik maya agi mit lalu agi dikeingatka dalam runding nyentuk ke sehari tu.

Kemaya hari tu, mayuh macham iklan bisi dipandang ba mayuh bengkah endur. Ba surat berita, radio, televisyen, majalah, internet, billboard, banner ti disponsor, papan tanda enggau mayuh agi ti bukai terus ngelakuka jenama tu. Munyi ku aku tadi iya meri jamin madahka Milo nya ai irup ke pengerai tubuh lalu ayat nya ke nyerap masuk ba dalam minda kitai.

Iya ti agi dikeingatka aku, semina restoran pemakai jampat francais entarabansa di Malaysia ti bisi ngenahka ai irup tu. Tu bedau nyengkaum ba restoran bukai sereta kedai ke mit-mit enggau ba rumah.

Mensia mega disempamaka baka produk. Sida nyadi tebilang ketegal suah pansut ba televisyen, radio, surat berita enggau majalah ba tikas nasional.

Raban politik, orang ke bejalaika pengarap, aktivis sosial tauka artis bisi peluang magang dikeingatka ba raban komuniti ketegal ke suah pansut ba mayuh bengkah media nya. Kitai ke individu tu baka nuan enggau aku mega bisi peluang nyadi orang ke tebilang enti kitai ngembuan pengulih ti unik datai ke kitai diperatika mensia mayuh.

Pelaba aku tentu raban pemacha bisi teingatka penyanyi Korea, PSY ti tebilang serata dunya ketegal tanda Gangnam Style iya. Baka nya mega ngagai siku indu Ukraine, Anastasiya Shpagina ti ngantaka diri lalu nyadi baka kartun anime Jepun ti idup. 

Mayuh bengkah chara mensia nguji narit ati ngujungka iya nyadika buah kenang mensia mayuh. Utai ke nyadika tanya nya, nama ke ngasuh siku-siku orang nya ulih terus tebilang sereta mengkang dikeingatka nyentuk ke sehari tu? Enti orang nya enda bagas pansut ba mata enggau ati mensia mayuh, baka ni kati pan manah enggau popular iya, pengujung iya jemah ila jampat enda dikeingatka orang mih iya.

Aku enggau nuan baka ni dih? Ni badas agi? Dikeingat  ketegal manah tauka enda dikeingat taja pan manah? Kati munyi ku orang politik dih? Munyi ku jaku dalam orang Melayu; rimau parai ninggalka belang, mensia parai ninggalka nama.