10 pekara ti dipelabaka enda tentu nyadi ba taun 2013

Baru dua hari kitai udah nyingkang ngagai taun baru 2013. Ngena peluang tu meri selamat taun baru ngagai semua raban pemacha blog tu ke udah angkun macha ari suba nyentuk ke diatu sereta meri sukung moral ngambika aku terus nulis ke kitai sebuat. Nyadi sekali tu nadai tentu utai ke deka dikerichau ditu semina rindu nulis deka nguji pengelandik maya dudi melaba utai ti enda tentu nyadi dalam taun 2013. Tu ukai utai ke tau dikeamatka tang semina dikena aku merindang kitai sebuat tau disempamaka semina nyagam bungkung dalam kayu, nyagam panyun dalam ulu. Nyadi pekara ti deka dikenang aku ditu nadai tentu ditulis meruan nitihka ni ti beguna agi:

1. Nadai hari kiamat dalam taun 2013 

Nyau puas bala mensia serata dunya tu begauka hari deka kiamat. Kenu ku kalinda Mayan madahka 21 hb Dec, 2012. Mayuh amat berita madahka orang begau bebelika dian enggau lampu pichit (bisi orang nyebut lampu selaid) ari kedai, begau enda nemu kebuah. Tang berita nya enda amat nyadi taja pan orang ke bepengarap Islam enggau Kristian bela arapka dunya endang deka kiamat jemah ila semina bedau temu maya. Anti aja mih. Diatu berita hari kiamat tu datai ba tikas anti-climactic. Nya kiraka enda mih nyadi taun tu. Taja pia, utai ke disangka bala sida Mayan nya enda bangat jauh limpang ari peragam kalinda. Orang ke mekuh pengawa pengarap tauka agama endang madah mayuh amat tanda-tanda tauka kelai ke ngumbai dunya tu udah semak deka kiamat. Ngagai orang Malaysia ke bepolitik, hari kiamat sida nadai bukai endang maya pengawa bepilih besai parlimen ke 13 (PRU) dalam taun 2013 tu mega.

2. Nadai haribulan ke nyelai ke betandu dalam taun 2013

Nyau puas nganti baru kitai tetemuka sechara pusin kronologi hari bulan ke baka tu: 01-01-01 tauka 02-02-02 datai ngagai 12-12-12 tiga minggu ti udah. Hari bulan ti nyelai baka nya nadai agi jemah ila. Semadi bala kitai sebuat besetuju enggau aku madahka 11-12-13 nya hari bulan ke nyelai. Nyadi hari sehari nya ila Hari Tiga.

3. Mengkang nadai entuka murah dalam taun 2013

Taun 2013, chukai duti semina enda diletak ba kerita hybrids ti digaga di menua tu empu. Reti nya orang Malaysia agi bekerepas, bebuai bulu gundai enti deka meli entuka baru.

4. Nadai pengujung ngagai hak ngembuan senapang di US

Taja pan pekara bebunuh udah nyadi ba Connecticut apin lama ti udah tang agi mayuh rayat Amerika ke agi besetuju ngetanka hak individu ngembuan senyata api. Bisi siku orang ke kala gawa nyadi editor surat berita ba US ke peranak English Piers Morgan balat bendar mejah isu tu dalam program talk show iya ba CNN tang penemu iya dikelanyaika raban rayat Amerika. Bisi nya meri sadang penemu ngasuh iya dibuai ari menua sida.

5. Nadai Rolling Stones ba Malaysia dalam taun 2013

Band rock ‘n roll ke pengabis lama udah bemain band di dunya tu bedau lama udah ngintu pengerami ulang taun ke 50 sida, iya nya ngena chara ngaturka konsert ba London, New Jersey enggau New York. Konsert nya mega mandangka pemerindang ti ngerinduka ati ngujungka rambai jaku “move like Jagger” nya nyau balat agi tebilang. Mick Jagger, ke diatu beumur 70, nguluka band iya matau dunya dikena sida ngeramika ulang taun emas band sida nya.

Tang ngagai kitai di Malaysia tau enda ibuh mih bemimpi deka meda konsert Rolling Stones nya. Siti ari kebuah nya laban tikit masuk meda konsert nya bangat mar, ukai aku ngemaruhka kitai rayat Malaysia, sigi amat. Tau tanya mih kita Mick Jagger empu.

Lalu kebuah kedua nya, laban bisi aja orang ke ngembuan batu api enggau dengki nekiska batu ngapika orang ngambika sida mantaika protest enda ngasuh konsert nya diatur di Malaysia. Tu ngujungka orang Malaysia semina ulih meda artist ayun lundai baka Michael Learns To Rock tauka Air Supply ninting taun tauka meda Kenny G nyepu saksafon iya aja.

6. Nadai pemansang ngagai servis teksi dalam taun 2013

Ngagai kitai ke diau ba Nanga Lutak tauka Paya Rebuh (Kuala Lumpur ku aku) sereta ke ba Lempa Klang tentu nemu pasal servis teksi kelebih agi ke nadai entuka. Menua bukai enda ga aku tentu nemu, enggai ga aku nyangkung. Di KL tu mih tau dikumbai servis teksi ke pengabis jai di dunya. Uji bacha kita surat berita ngelama tu, nadai bukai serebana raban penumpang endang pasal pengurang servis ke disediaka teksi.

Atur ke dipejalaika sida ke bisi authoriti dipeda nadai semitan lalu enda teputarka penanggul tu. Baka ni kitai deka mutar penanggul sekeda deriba teksi tu ke balat ngeshowka diri baka orang ke tinggi ari orang bukai. Enti kitai serebana ngeripot, sida lalu komplin ngagai orang politik madahka bisi orang deka nepu pasir ba dalam periuk asi sida. Kati sida enda kala sedarka pengawa sida ke selalu ngecajka tambang sereta ngakal penumpang ngelama tu? Katika baka periuk asi penumpang teksi dih jamah sida ke baka nya?

 

7. Team main bol Malaysi nadai kini kini dalam taun 2013.

Menua kitai agi ba lumur enchit dalam ranking dunya main bol FIFA. Taun tu – 2013 –  taun SEA Games lalu iya deka diatur ba Myanmar. Malaysia pan enggau masuk main tu tang sekali tu sida ukai pemenang Mangkuk AFF Suzuki.

Enti nyema team tu majak bemain baka maya sida ke bemain maya berebutka Mangkuk Suzuki Cup – dipelabaka aku tentu mayuh raban pemacha besetuju enggau madahka sida tu nadai jalai menang. Kelimpah ari pemain raban tuai ke nguluka team tu mimit nadai mih dipeda berunding deka mutarka pekara tu. Nyau puas kitai ke bejaku. Baka nya mega enggau team sepak takraw Malaysia. Bedau lama tu tadi bisi ninga berita sekeda ari pemain nya enggai ngarika Malaysia. Semua tu mandangka pengelemi orang ke megai gerempung nya.

8. Queen Park Rangers (QPR) nadai agi ba penerebai ke tinggi

Agi bekenangka main bol, QPR nyangka nadai agi bemain ba premier division dalam liga main bol English dalam taun 2013. Baka ni enda jaku orang Malaysia ke ngempu team nya ke ngelama tu renjan amat bejaku pasal pemanah team QPR ke dibeli iya suba.

9. Nadai agi spekulasyen sentang maya PRU laban nadai agi ruang maya agi

Dalam minggu-minggu ke deka datai tu ila begau mih raban politik bepolitik melitik rayat kiba kanan ke ulu enggau ke ili bekimpin bejaku kuchah madahka diri manah lalu bejaika munsuh sida. Pengawa melitik rayat tu udah berengkah kenyau ari taun 2010. Macham –macham utai ke nyadi ke enda kala nyadi suba nyadi kemaya hari tu. Bisi nya madah empat taun udah raban parti tu ngakal rayat. Katika parti bukai ke udah 56 taun ngakal bala rayat ke bukai dih? Pengawa sida tu nyau baka volleybal dipalu kin kitu.

10. Politik volleyball tu nadai pengujung taja pan udah tembu PRU ke 13 ila.

Pengawa bejaika pangan diri, besangkaka pangan diri, beserahka penyalah pangan diri deka terus nyadi jemah ila. 

Uji kitai sama berundingka pengujung baris ayat tu : “Ba pengujung iya, pengerindu ke diterima nuan sebaka enggau pengerindu ke diberi nuan ke orang…”