Pemutus peresa - ubah chara

PEMUTUS peresa Penilaian Menengah Rendah (PMR) bedau lama udah dipansutka sebedau Hari Krismas tu tadi. Ari  481,424 nembiak ke ngambi peresa nya, 30,474 teulihka pemutus peresa ti lati.

Udah PMR, sida tu deka masuk pom empat tang enda kurang mega bala nembiak ke bisi minta masuk ngagai sekula berasrama penuh.

Iya ti suah nyadi nya, nembiak ti lati tentu ngembuan pengingin ati deka masuk aliran sains ketegal bisi jamin masuk institut pelajar tinggi kelimpah ari ti bulih pengawa ke manah agi.

Taja pia, pemutus pengulih subjek Sains enggau Matematik ti majak nurun dalam tiap-tiap peresa perintah ninting taun tau bendar ngeruga runding.

Katika pemutus peresa ti nurun nya baka kelai ke madahka dua subjek berprestij nyau majak  kurang dikerinduka nembiak datai ke sida nyau mantaika asai ati diri dalam peresa tauka laban ke enda nemu nyaut tanya ngujungka sida enda bulih pemutus peresa ke manah?

Nitihka penemu Dekan Pusat Pengajian Ilmu Pendidikan Universiti Sains Malaysia (USM), Prof Dr Abdul Rashid Mohamed,  peratus penyampau nembiak ke nurun tauka niki dalam peresa nya dikira pekara normal.

Taja pia, tiap-tiap pemutus nya endang mengkang patut dipansik, dianalisa sereta digigaka jalai mutarka iya enggau jampat ngambika risiko iya enda panjai sereta enda ngenataika empas bukai ke enda manah.

Dalam sistem peresa, turun niki statistik pengulih nembiak nya endang normal tang agi beguna jalai ngigaka kebuah pekara nya nyadi.

Pemutus peresa ti niki tauka nurun nya tanda iya madahka bisi pengelemi ti patut diputarka.

Nama agi dih enti tiap-tiap taga nya dilempaika ba bau mensia iya nya nembiak. Endang mayuh macham pekara mih dijangka tau nyadi.

Taja pan pemutus subjek Sains enggau Matematik terus mandangka penurun, nitihka Dekan Profesor tu sida ke ngembuan tanggung pengawa enda patut bangat latah, tang ku iya patut berundingka faktor enggau jalai mutarka pekara tu.

Ba penemu iya, kebuah iya nurun nya engka bepun ari faktor mit lalu semua ke ngembuan tanggung pengawa baik nya sekula, pengajar tauka opis menteri pelajar enda tentu ibuh ngujungka iya ngeruga prestasi peresa.

Faktor ti dikumbai mit nya balat agi tau nganu. Nya alai semua ke ngembuan tanggung pengawa nya patut sensitif laban empas iya lagi tau ngasuh pekara ti enda disangka tau nyadi.

Agi mayuh bala ke saru sereta ngumbai sains enggau matematik nya semina bekaul enggau numbur tauka  formula.

Enda tentu mayuh orang meda sereta mereti nama ke bendar tuju kedua-dua subjek nya. Nitihka profesor tu enti iya  diajar ngena chara betul, iya tau meri pengerindu ngagai raban nembiak.

Pengerindu tu ukai semina ba akademik aja laban konsep meretika sains enggau matematik tu besai bendar.

Raban nembiak enda teulihka pengerindu belajar laban sida ditekan lebuh belajar iya nya diasuh  belajar enggau ngapal.

Sains enggau matematik ngembuan kaul ti rapit enggau pengidup. Chara belajar ke penuh enggau chara nekanka nembiak sereta konsep belajar salah tau ngujung akademik enggau aspek bukai nya jelungan.

Pengirau tu endang bisi pengamat lebuh nembiak ke tama nitihka aliran sains majak nurun ngagai 29 peratus taun tu enti dibanding enggau taga 60 peratus.

Tang besenutuk enggau nya, penyampau nembiak ke tama ngagai aliran sastera majak mayuh ketegal ti disukung faktor penarit iya nya nyengkaum tuduh penemu ke ngumbai aliran sastera nya mudah agi, ulih meri penuduk ke tinggi agi di institut pelajar tinggi sereta peluang bekereja ti mayuh agi.

Aliran sains dikumbai mar ukai semina ari sukut akademik tang mega peluang gawa ke nyau majak mimit kelimpah ari ke nadai rintai pengawa baru.

Nembiak aliran sains endang tentu dekaka respons ti ulih meri sida mayuh pengelebih setipak enggau penusah ti ditapi maya belajar.

Tang utai ke semina ulih disediaka  ba bidang pengawa ba menua kitai ke sida ari aliran tu semina ba bidang berubat (ti pengabis besai), pegawai pemansik enggau pensyarah.

Skop pengawa ti mimit nya ngujungka enda mayuh orang minta.

Enti dibandingka enggau menua bukai, mayuh pengawa baru disediaka dalam sekeda bidang ti meri fokus ngagai sains ngujungka sains enggau matematik mesti dipelajar.

Chara belajar mega nyadika kebuah sains enggau matematik mar dipelajar.

Nembiak ba menua kitai ngembuan chara belajar ti enda berapa manah iya nya rindu ngapal. Ba menua bukai, chara meretika utai dipejalaika nengah mayuh bengkah teknik baka ngena chara pengasai sereta enggau bantu utai ke ngelingi nya.

Ngena chara ngapal dikena meretika sains enggau matematik ukai proses belajar ti manah. Sida ngapal semina dikena ngulihka sida nyaut tanya.

Enti tanya nya ditukar, sida enda ulih nyaut tanya laban konsep sains enggau matematik nya  bediri ba pugu pemereti ukai ngapal.

Kelimpah ari nya pengawa milih pengajar sekula primari mega patut ari raban ke pengabis manah laban sida mih ngepunka asas belajar enggau pemereti nembiak.

Sekula primari nya indu ngagai semua pugu pelajar enggau pengawa meretika pelajarlaban ditu mih nembiak diajar proses macha, ngira, nulis enggau meretika pekara.

Ba sekula sekondari nya alai proses ngentapka pemereti enggau pelajar. Nembiak ba tikas tu semina diiring nengah mayuh rapat langkah ti bebida sereta mungkur mayuh pekara ngambika nyediaka sida ngagai palan pelajar tinggi.

Enti pugu pemereti enggau pelajar nya tegap, proses nangkanka nya tau nyadi mudah. Tang kitai agi kurang pengajar ke bekualiti ngujungka mayuh penanggul nyadi.

Nya alai kitai sama ngarapka sistem pelajar ulih diangkatka ngambika ulih nyamin tikas menua maju maya 2020. Pengawa ngangkatka pemanah sistem tu begunaka pengeliat sereta pengeransing ati.

Antara iya modul enggau sistem patut disemakaka nitihka pemansang kemaya hari tu, baka nya mega proses ngambi pengajar ke bekualiti, rapat langkah pedagogi ti betul enggau ti bukai.

Kitai patut meretika definisyen menua maju baru kitai ulih ngemansangka sains enggau matematik nyadi siti mekanisme ti begunaka ti enda ulih disakalka orang sengapa.