Manding Adat Belaki Bebini Raban Bansa Dayak Enggau Orang Ribai

Panyun Jaku

Mayuh amat bida adat raban bansa Dayak kelebih agi bansa Iban enggau adat Ribai ke udah diperatika (indukayan. Blogspot). Enti ditulis ditu magang sigi enda chukup hari endur raban  pemacha macha. Cherita peneleba tu diambi ari blog Indu Kayan ke maya artikel tu ditulis iya mega benung ngaturka hal ti bekaul enggau melah pinang iya tauka kawin munyi ku iya empu.

Nya alai pekara tu manah bendar dikenataika iya empu tubuh ke endang bisi peneleba napi pekara nya. Kebuah iya mantaika bida adat Dayak enggau adat Ribai dalam ngaturka hal kawin aja, awakka kitai sama merati enggau bekunsi penemu lalu sama belajar utai ni ke manah ditunda, lalu utai ni ke tau dilengka. Nyadi aku beterima kasih ngagai blog Indu Kayan tu laban ari ke macha artikel ti ditulis iya aku bisi penerang silik senentang pekara ti mida adat belaki bini raban bansa Dayak enggau orang Ribai. Aku ditu bekunsi baru penerang tu enggau bala pemacha nengah tulis ke udah diseruri ngena chara aku empu enggau mega nitihka sistem jaku Iban ke dikena ba sekula kemaya hari tu. Peratika bisi tujuh pekara ti midaka adat melah pinang raban bansa Dayak enggau bansa Ribai.

1. Adat kitai: Laki nanggung belanja melah pinang
Adat Ribai: Apai indu nanggung belanja melah pinang

Kemaya hari tu laban ke indu enggau lelaki nya selalu sama bela udah bisi pengawa, endang bebagi belanja melah pinang. 50-50 ku orang nyebut, awakka rentang, reti nya enda bechiping, nadai orang niki nibung nadai mega orang niki pinang. Tang selalu nyau lebih mimit ga belanja sida ke lelaki kena mantaika ngagai apai indai indu, madahka diri ulih nupi anak sida iya udah jadi ila.

Nyadi adat Ribai lain mimit. Enti sida melah pinang, apai indu ke nanggung belanja (dalam kira-kira 80%), lalu sida ke lelaki mayar utai baka pekayan sida empu enggau utai mit ke bukai. Endang tebalit amat enti kitai nyau manding enggau adat Dayak. Kati laki nya dekaka kitai, lalu nyau apai kitai ke mayar belanja melah pinang? Endaka sut nya. Nyadi nitih adat Ribai, tuju apai indu nya mayar kira madahka diri, nya mih ke pengujung sida mayar belanja anak indu sida iya laban udah jadi ila, laki iya nanggung idup indu nya. Bah katika enti indu Dayak jadi enggau laki Ribai, adat ni dikena dih? Pulai ke pun 50-50 nya tadi ga nih!

2. Adat Dayak: Semua orang dikangau
Adat Ribai: Bala sebilik enggau kaban sempil aja dikangau

Laban stail raban bansa Dayak kelia ngintu pengerami melah pinang ba rumah panjai beratus pintu, enti rami sigi secara automatik semua orang dikangau. 'Bai magang kita sebilik', ku kitai nyebut. Iya ga semua kaban, semua bala ipar, bala petunggal... mali enda ngangau. Enda cukup ruai alai duduk, baruh rumah bisi bah. Jeman moden tu, kitai nyau selalu agi ngintu pengerami melah pinang ba hotel, nyau enda tentu ulih ngagau bala sebilik agi laban enda chukup endur (enda chukup katan sekeda nya tang malu nyebut). Enti ulih pan nya mih sampai beratus iku datai orang ngagai pengerami nya. Sema jaku enda chukup 100 mija. Nyadi, udah dikangau 1000 iku lagi, enti bisi tinggal terus ngambi ati mih bala sekeda nya lalu bisi bejaku ba belakang.  Akai dai... enti endang rapat tang enda dikangau lain ga cherita. Tu betanya sekali dua aja, lalu ngarapka dikangau.  Nya mih ulah kitai mensia.

Nyadi stail Ribai tu lain. Iya ke balat agi deka dikangau dulu endang tawing rapat bala pengantin, udah nya petunggal, udah nya baru kaban apai indai (tu pan biasa ditekatka ngagai 2-3 pasang aja!)

3. Adat Dayak: Iya ke dikangau enda datai, iya ke enda dikangau datai!
Adat Ribai: RSVP

RSVP nya datai ari leka jaku Peranchis (répondez s'il vous plaît) reti nya, Please respond tauka dalam jaku Iban 'anang enda madah datai tauka enda'! Nyadi orang Ribai sendang madah enti sida ulih datai tauka enda sebedau hari bulan ke ditulis dalam kad panggil. Reti iya enti jaku tesau nya madah 'RSVP by 31st May', endang sebedau 31hb Lima udah madah sida iya ngagai pengantin ulih datai tauka enda.

Pemanah ngaga tu bisi dua iti. Keterubah iya, bebasaka pengantin. Enti kitai udah dikangau ngabang, udah nya enda nemu madah datai tauka enda, nyau baka ke enda pedulika tesau nya kitai. Kurang lebih baka aku nanya nuan betunga mua, 'ulih datai nuan?', nuan enda nyaut lalu mansa aja! Indah enda baka sempama jaku tuai; baka nanya Laut ke bira. Kedua, enda nusahka pengantin. Bala pengantin selalu mesti deka booking mija tumu, mayar tumu lalu sida mesti deka nemu berapa iku ulih datai. Enti siku dua nadai meri respon, ulih diatur ga nya. Tang enti 50 iku orang nadai nemu madah datai tauka enda, kati kitai deka ngatur booking mija? Nya aku selalu ninga pengantin muchau laban booking mayar mija 30 iti, 25 iti aja ke penuh. 5 iti ke puang nya sapa mayar?

4. Adat Dayak: Enti enda meri duit, meli pemeri baka perengka rumah tang iya ke gerinti... sigi bisi orang datai gendai-gendai!
Adat Ribai: Pengantin nulis pemeri ti dikedekaka, lalu pengabang meli. Nadai kala pengabang datai gegendai, biar mimit, asal meri.

Ke manah adat raban bansa Dayak nya , duit diberi ke tanda pemeri ngagai pengantin kena 'nulung' seduai mimit laban udah bebelanja mayuh nupi orang makai maya pengerami melah pinang. Bala ibu enggau aya selalu meri duit lebih mimit awakka bisi kena seduai ngepunka  pengidup diri. Ba aku chukup manah stail tu taja pan pengantin bisi duit kediri empu, iya ke beguna agi nya niat bala sebilik tauka kaban ke deka 'nulung' taja pan mimit. Enti enda ulih nyau beratus ringgit, RM10 pan chukup kena meli bawang! Ha ha ha. Bisi sekeda ke bukai meri pemeri perengka rumah baka pinggai mangkuk, nya pun kena 'nulung' pengantin awakka seduai enda bepungkal bebelika utai udah nyadi.

Tang bisi sekeda ke dikangau nya datai deka makai aja. Nadai ga minta kenu, tang nyau enda bebasa ga kitai udah dikangau ditupi makai enggau sama bekunsi rami, nyua lalu nadai.

Adat Ribai tu lain agi ga. Pengantin nulis pemeri ke kedekaka seduai iya ba kedai (ambika chunto baka Parkson), dikangau orang 'gift registry'. Udah nya bala pengabang ke dikangau nya ngagai kedai lalu melika seduai iya. Pemeri nya enda ibuh dibai pulai dibalut apa indah tang ditinggal ba kedai aja awakka pengantin nya empu ngambi maya seduai udah lantang ila. Manah ga stail tu peda aku laban ari bulih 10 igi set pinggai mangkuk, nyamai agi ga diagihka bala bansa pemeri: sekeda meli kain tilam, sekeda meli lampu, sekeda meli kitil, sekeda meli periuk asi enti deka! Lalu duit jarang diberi orang semina ari apai indai diri empu. Enti pengabang ti dikangau nya enda ulih datai, sida tetap deka meri pemeri ke tanda terima kasih laban udah dibai enggau ngeramika pengawa melah pinang nya. Selalu dianjungka sida kad 'thank you' enggau pemeri mit tauka kad voucher kena meli perengka ba kedai.

5. Adat Dayak: Bisi hantaran tauka derian
Adat Ribai: Derian? Nama utai derian nya?

Kelia menya pengantin laki beberika tawak, ilang, kain, tajau lalu macham-macham agi ngagai apai indai indu kena madahka diri ulih nupi anak indu seduai udah jadi ila. Jeman  moden tu utai baka nya tusah digiga, duit selalu diberi tauka emas dikena nganti, laban agi deka bebasaka adat. Sekeda apai indai, ngengkah 'rega' lalu enti laki nya enda ulih meri 'rega' nya, enda tau jadi. Selalu aku ninga kes baka nya. Aku enda berapa setuju enti apai indai mutuska enda tau jadi laban 'rega' nya agi ulih dirunding. Pengawa bejadi berumah tangga tu ukai bisnes bejual anak tang hal nyerahka anak ngagai jari orang bukai ke ulih nulung ngibun.

Orang Ribai nadai ibuhka derian laban belanja melah pinang nya selalu ditanggung bala indu. Tang enti laki bansa bukai  baka Ribai, Melayu, China, India enggau ke bukai jadi enggau indu Dayak, endang selalu beberika utai baka duit, mas, barang ganti kena bebasaka adat indu, nya ke ditemu aku mih! Nadai ibuh beribu ringgit, asal mih chukup kena menuhka adat aja.

6. Adat Dayak: Biar papa, asal begaya
Adat Ribai: Semadi nadai

Aku udah mayuh meda orang ngerami melah pinang ba Malaysia enggau ba menua Eropah. Tu sigi utai ke pengabis besai bida peda aku.  Enti bansa Dayak ngerami pengawa melah pinang MESTI besai. Dewan tauka balai alai rami nya mesti besai. Hotel mesti besai kena nampung mija 50 iti. Enti sema nadai chukup duit kena mayar pan sanggup ngagai bank nginjau duit bepuluh ribu. Udah jadi, pedis pala mayar utang (enti duit pemeri enda chukup kena nulung!). Enti sigi amat enda chukup belanja kena jadi, nadai salah begagaka mit aja baka ni ke ulih. Tang adat bansa Dayak tu kelalu deka bejagaka 'ai mua'. Enda tau madah enda chukup duit, mesti chukup belama. Enti nitihka semua pengarap madah, rua nya dosa.

Nyadi enti jadi enggau Ribai, mit aja tauka intimate wedding. Mayuh pengerami melah pinang  ba Scotland, France enggau Venezuela dipeda aku, pengabang ke dikangau nya 80-100 iku aja  (diri sebilik enggau kaban sempil aja), digaga ba restoran standard, bisi DJ tauka band muzik... semua pengabang gaga rami. Pemanah ngangau diri sebilik enggau kaban belayan aja ngambika pengantin bisi peluang bekenaka duit booking endur manah agi alai ngeramika melah pinang nya lalu ulih makai pemakai ti manah agi. Enti sida ngangau 500 iku, endang nadai duit chukup kena mayar endur manah ke kedeka seduai empu. Nya aku meda stail sida Ribai tu sigi jelan aja, enti duit ba bank bisi Ringgit Malaysia 40 ribu aja, 40 ribu nya aja mih dikena. Nadai nginjau-nginjau ari bank.

7. Adat Dayak: Kaban apai indai ke mayuh datai
Adat Ribai: Pangan pengantin ke mauoh datai

Tu bisi nyelai mimit laban dini-dini endur pan baik nya ba timur tauka barat, apai indai ke kiruh agi deka ngangau orang datai. Bida iya ba menua Ribai, seduai ke jadi tu diberi peluang besai agi ngangau bala pangan rapat enggau petunggal sida iya dulu, udah nya baru apai indai tau ngangau orang bukai baka kaban apai indai, bala sida ke berimbai pendiau, bala menyadi, bala petunggal.

Nyadi enti raban bansa Dayak kawin, dikenuluka kaban apai indai sampai 30 mija, udah nya pangan diri empu 2-3 mija aja. Enda pia? He... he. Endaka ngasuk ketawa amat baka tu. Enggi kitai pengantin laki ke mayar, tang apai indai ngagau kaban sida datai makai aja.

Nyadi ba adat Ribai, apai indu ke mayar belanja pengerami melah pinang nya, tang pengantin ngangau bala pangan sida iya empu ke mayuh agi. Ni ke patut agi peda kita?

Naka tu aja mih iya ka ulih dikusai aku dulu. Sama-sama mih kitai meratika adat raban bansa Dayak kelebih agi bansa Iban ke enda sebaka enggau bansa Ribai, awakka kitai enda  jampat latah tauka nimbak guyap enti sema runding enda sebaka. Kati deka enda sebaka enti adat kitai udah lain-lain enda pia? Arapka nadai orang nyima ati enti bisi utai disebutka aku ditu sensitif, ukai sengaja... semina deka nyebut utai ke diperatika kitai aja. He he.

Ukai ga niat aku tu deka ngutuk adat raban bansa Dayak tauka adat Ribai ke jai tang sama-sama mih kitai mikir kediri ni ke manah, ni ke enda manah. Baka ku sempama Melayu: yang baik jadikan teladan, yang buruk jadikan sempadan;  enda piaaaaaa?

(Dibali ari indukayan.blogspot)