Petara, Tingki enggau Parti

Selamat betemu baru ba ruang siber. Berasai lama amat nadai mantaika buah kenang ba blog ditu. Enti ketegal nadai hari, tak bula amat ga munyi. Kitai sama-sama diberi tujuh hari seminggu sereta 24 jam sehari. Nya mih lembau ga deka madahka diri nadai hari. Ke bendar awak ke dikena ngerichauka buah kenang tu udah mayuh dikena ba endur bukai. Agi mega dua minggu tu tak kena rengga ketegal rampit igi penyakit ti terebai sebelah endur. Idung nyau sendat, iya mih udah deka gerai baik gawa ba bilik airkon nyau sendat baru ga idung. Ngelama ke udah kemisi ari nulis tu bisi tiga isu ke balat bendar ditusi orang ba media baik nya media chelak, internet tauka televisyen enggau radio.

Keterubah nya bekaul enggau pengarap. Orang mayuh ngumbai nya isu sensitif tang agi ga dipetalatka orang, iya nya isu ‘kalimah allah’. Kitai di Malaysia enda ngira bansa endang bisi diberi hak milih pengarap ke deka ati kitai empu, semina bansa Melayu aja ti mesti ngemeranka pengarap Islam. Nama kitai bisi hak tentu kitai mega bisi hak nyebut nama petara kitai nitihka deka ati diri empu. Tang nya mih penyelai iya di Malaysia aja ga ditagang nyebut nama allah taala laban irauka nyarut sereta nguing runding sida ke lemah pengarap tu. Undang-undang enggau adat ti baka tu semina adat digaga mensia ukai ari jaku allah taala. Dua tiga hari Presiden gerempung PERKASA bisi ngasuh bala sida nunu bup kudus ke kenu ku sida bisi disadun ngagai nembiak Laut.  Ba penemu aku ke muntat sereta palui tu patut agi digaga dua iku orang ke nyadung nya, tangkap lalu dawa ba court. Kitai ga bisi undang-undang. Enti orang ke jai ulih digiga polis enda patut dua iku tu ke gambar iya bisi pansut dalam berita televisyen enda ditemu endur. Dalam kes tu bala ari Malaya ke balat kerah-kerah bejaku madah enda tau. Tuai kitai ari Sarawak nadai engkeretik, nyangka tak besampi dalam ati diri pelabaka aku. Manah enti besampi, anang aja tak diau takutka dipeda orang ngelaban pangan diri.

Lengkaka sesempa leka pinang senentang isu tu. Ngalih ngagai isu ke kedua, iya nya senentang menteri besai ku suba bisi ngaku diri meri pemendar meri tingki tauka kad pengelala ngagai orang Filipin, Indonesia enggau Pakistan. Kebuah pia laban deka menang dalam pengawa bepilih.  Ngelama tu nadai siku ari tuai pemegai opis perintah ke bekaul enggau pengawa nya ngaku bisi ngereja utai baka nya. Nyau diatu lebuh orang nasat nengah RCI (Royal Commission of Inquiry) baru iya empu madahka bis. Tak mata-mata bala rayat di Sabah kelebih agi sida bansa Kadazan Dusun diakal baka tu. Reti nya nadai akun mih orang ke menang dalam pengawa pilih besai. Ngelama tu gaga amat kitai ninga orang Sabah tauka pengundi iya nya kiraka penyimpan tetap sesebengkah parti. Ukai semina meri tingki tang mega ngubah sitak endur bepilih nitihka pengeka sida ke bekuasa. Taja pia iya tua enggai tentu ngaku pengawa iya salah. Ku iya menteri besai keterubah mayuh agi orang diberi iya hak peranak menua. Iya enda ingat orang ke diberi nya ketegal sida udah lama ditu sama-sama mantu minta merdeka ari British sereta ngemansangka menua Malaya. Tu mega nyengkaum apai iya empu ke datai ari selatan India. Sigi amat ku iya empu ‘orang Melayu mudah lupa’, kitai tu suah enda ingat.

Ngalihka ngagai isu ketiga tu ke nyadi ba menua Sarawak. Berita pasal parti SNAP udah dikinsil ari register. Nya mih pengujung parti tu laban ke enda ulih mutarka penanggul dalam parti. Taja pan udah dikinsil, parti tu udah mujur nerenak parti bukai. Bisi dua buah parti ke nyumbuk ari parti SNAP enti iya tau disemaka baka pun kayu. Enti sema mensia tau udah dikumbai aki laban bisi uchu. Bisi siti agi parti ke nyumbuk asil anak parti SNAP nya tadi. Endangka baka raban bansa Iban laban kelalu mayuh ngembuan pengerindu deka nyadi tuai sereta mega mudah dikelikuhka orang bukai. Pemandai ukai reti kitai enda mudah ditipu orang. Uji deka mansik suah agi orang ke nadai pemandai ke tinggi ulih nipu siku-siku orang nama agi pekara ti bekaul enggau politik tu.

Nya naka kenang aku sekali tu. Nyadi semua runding dikenatai ditu ukai deka nyimaka ati sekeda orang tang semina deka bekunsi runding enggau bala pemacha.