Nama Udah Nyadi

‘ Lima orang murid tahun tiga sebuah sekolah di Petaling Jaya bertindak samseng dengan membelit leher rakan sekelas dengan tali pinggang, selain membelasah mangsa. Mereka juga mengugut untuk membunuh dan mencampak mangsa ke dalam hutan, semata-mata kerana tidak menyukai rakan mereka itu.’ – Harian Metro 3 Oktober 2012

Nama penyadi enggau raban nembiak sekula kitai kemaya hari tu? Kini ke penunga adat basa enggau ukur pemanah pendiau tauka nilai-nilai murni ti patut diterenak ba dalam diri sida tu? Enda chukup kini ajar ke udah diberi apa indai di rumah tauka raban pengajar di sekula? Sapa ti patut disalahka dalam pekara tu? Aku ukai deka ngepunka taun baru 2013 tu nulis sentang pekara ti negatif tang udah ti baka tu suah nyadi enda ngira maya, baik nya pun taun, tengan taun tauka ujung taun.

Kelalu mayuh utai tau nyadi bekau ari kes ti baka tu. Ukai tak sekali, tang kes juvana ti baka tu mandangka penyampau kes nya majak nyadi bisi niki lalu tau bendar ngenangika kitai. Utai tu nyadi bepun ari penanggul dalam diri sebilik.

Kitai enda ulih semina betunjukka jari kitai ngagai sapa-sapa. Di sekula, raban pengajar mih ke patut sensitif enggau utai ti bansa tu. Jaku ajar, jaku lalau enggau jaku tangkan patut diberi lalu enti ukum enda dikemanaka, nembiak ti baka tu patut diserahka ngagai Pakar Psikologi.

Enti di rumah, apai indai mesti patut meratika ulah anak sida lalu sensitif sereta begaut mutarka sebarang penanggul ti nyadi ke anak sida. Besenutuk enggau nya mega raban komuniti enda ulih tak diau diri sereta takut dikumbai orang nyaga tisi kain orang. Ke bendar tiap-tiap ari kitai patut ngembuan tanggung pengawa nitihka kapasiti kitai empu.

Penanggul pengawa enda beradat sereta enda bebasaka orang bukai nya udah datai ba tikas ke serius amat nyadi ba raban komuniti Malaysia ke maya balat bendar tebilang enggau budaya timur ke alus, ngembuan adat basa ti tinggi. Nya alai sebedau asi nyadi bubur, aram kitai sama-sama meresa diri empu sereta mega enggau orang ke semak enggau kitai.  Kemetulka raban diri sebilik kitai dulu laban semua utai tu nyadi bepun ari rumah. Ingat mih pesan, ulah nembiak nya nyereminka apai indai sida. Enti deka ngelentika buluh bepun mih ari iya nyadi tubu laban udah nadai guna agi enti iya udah nyadi buluh.

Bekenangka adat basa endang nadai pengujung baka sungai nadai ulu. Taja pia ukai reti iya kitai enda ulih bejuraika pekara tu. Ngagai raban nembiak sekula selamat pulai belajar lalu ngagai raban pengajar selamat ngajar sereta bejalaika pengawa narak nembiak nyadi rayat ti beguna jemah ila.