Elemen Ngerenchah Kurikulum jaku Iban Sekula primari

Dalam abad ke-21 tu, pengelandik jaku endang agi relevan kelebih agi dikena bekomunikasyen sechara interpersonal. Nitihka tuju nya, penerang enggau komunikasyen endang pekara ke dikemeratka dikena nempa minda rayat ngambika ulih besemekih ba tikas tinggi (Levy, 1997). Nya alai dalam kurikulum perdana ke dikena ngajar enggau belajar di sekula bisi dipasukka beberapa elemen ngerenchah kurikulum dikena nangkup segang pemansang ba abad baru tu.

Elemen ngerenchah kurikulum ke dikemeratka ba sekula kemaya hari tu, iya nya baka ba rintai dibaruh tu:

i.              Kreativiti enggau Inovasyen

ii.            Teknologi Pemadah enggau Komunikasyen (TPK)

iii.           Pengelandik Dagang (Entrepreneurship)

Kreativiti enggau Inovasyen

Kreativiti nya akal chara dikena ngasilka kereban baru tauka ba tikas ke tinggi ngembuan pengelandik nengkebang. Asil ke baru nya ulih dikena enggau mujur nitihka konteks. Inovasyen tau dipeda ari sukut ubah pemai ulah ke nyadi endur nembiak ngena, ngubah, ngaga peluang sereta bepikir nitihka peneleba ke dikembuan ngambika ulih mutarka penanggul tauka mali sesebengkah kereban ngambika iya ulih mansutka asil ke baru. Ba peringkat baruh nembiak dikelala udah ngembuan kreativiti enggau inovasyen enti sida ngayanka pengerindu, berani ngena teknologi baru sereta penuh pengarap ba diri empu.  Tuju ke nyementang bendar diguna ba pengujung belajar ba sekula primari iya nya nembiak berani nguji sereta ulih ngasilkan inovasyen baru ti pulaika pemanah diri empu, orang bukai sereta meri pengelantang ngagai semua orang. 

Ba peringkat baruh, kelebih agi ba sekula primari nembiak patut diiring sereta diseridi ngambika sida ngembuan pemai ulah nyadi orang ti betukuh positif sereta ngembuan ubah perangai ti berani nguji, tan besemekih sereta landik ngiga sereta ngena peluang.

Teknologi Pemadah enggau Komunikasyen

Teknologi Pemadah enggau Komunikasyen (TPK) nya siti pengelandik ti mesti dikembuan dalam abad tu. Bisi tiga lebas ke besai bendar reti dalam TPK iya nya baka di baruh tu:

i.              Belajar TPK

ii.            Belajar Ngena TPK

iii.           Belajar Dibantu TPK

Pengajar mesti terang ba tiga bengkah lebas ke udah disebut. Sechara serap, belajar enggau ngajar endang balat besukung enggau TPK kenyau ari peringkat baruh datai ngagai peringkat tinggi ngambika nembiak ulih betarak ngena kereban multimedia, komputer sereta softwear ti disediaka, ngirum enggau nerima e-mel sereta akses ngagai penerang neresa jalur lebar.

Pengelandik Dagang (Entrepreneurship)

Pengelandik dagang (Entreprenuership) nya pengelandik ti beguna ukai semina dikena nukuh nembiak nyadi orang ti mujur dalam pengawa dagang tang nyadi orang ti ngembuan daya idup tinggi sereta bedaya maju. Tu endang siti ari akal chara nerenakka pengeregas enggau penyikar nembiak besemekih ba pengawa dagang enggau pengawa bukai berengkah ari umur sida agi biak.

Elemen positif ti ditekankan dalam pengelandik tu iya nya kreativiti, inovasyen enggau inisiatif dikena nyungkak peninggi tikas pemansang ba batang tubuh individu nya empu. Sechara fizikal nembiak dilatih berani, nemu magi jam, cheremat sereta seruran ngereja pengawa ti meri penguntung ngagai diri empu enggau orang bukai ti diau dalam rampa menua nembiak nya empu. Ari segi spiritual nembiak dilatih bebasa, rurus ati, sereta bepegai ba ukur enggau etika enggau ajar agama diri empu laban orang ti mujur nya endang orang ti ngembuan pengerurus.

Dalam kelas sekula primari nembiak diberi latih ukur pengawa dagang munyi ti udah disebut dalam aktiviti pengelandik jaku. Ambika chunto, dalam aktiviti macha, nembiak tau diberi teks pasal aktiviti bejual beli lebuh “Hari Kantin Sekula”. Ari nya nembiak ngaga aktiviti praktikal nyendiaka diri bejaul bebeli. Urung tu, pengajar ngemujurka nembiak ari segi proses baka nyendiaka barang ke deka dijual, ngiga endur bejual ke strategik enggau mayuh ke bukai. Ukur bekereja sama, ngembuan pengerurus ati, bekomunikasyen enggau mayuh ke bukai ulih diserap dalam aktiviti ti dipejalaika.

Simpul Penemu

Kemaya hari tu sereta jemah ila, pengelandik bejaku enda ulih dikenda ketegal segang pemansang dunya. Nya alai dikena narak nembiak enggau pengelandik jaku elemen ngerenchah kurikulum ti mungkur kreativiti enggau inovasyen, teknologi pemadah enggau Komunikasyen sereta enggau pengelandik dagang  bisi diperambu dipejalaika di sekula ngambika nembiak ulih napi segang pemansang ba abad ke baru.