Nempa ulah nembiak ukai pengawa pengajar aja

SADANG PENEMU ti minta digaga sebuah sekula budi basa nya endang sadang penemu ti manah. Taja pia chara iya dipejalaika nya patut diperundingka enggau manah ngambika semua nembiak ari sekula tu ila amat ngembuan budi basa.

Budi basa nyengkaum jaku enggau ulah. Enti orang nya ngembuan budi basa iya ukai semina bejaku ngena jaku basa sereta alus tang mega ngembuan perangai ti mega dipuji. Ambika chunto,  enti deriba nya seruran nyumpah sereta ngeluarka jaku jai, tu mandangka ulah iya ti jai sereta jampat muras. Nya alai, chara bejaku enggau ulah seruran nguing runding sereta ulih nentuka tikas budi basa siku-siku orang.

Ngasilka mensia ti setimbang ari sukut  pengarap, emosyen sereta ngembuan ulah ti manah nya endang entara pugu prinsip Falsafah Pendidikan Kebangsaan ke sigi diberi perati berat ba sekula. Nembiak ditarak ngambika sida bedisiplin, bebasa ke pengajar, taluk ke apai indai, ngemeran ulah ti manah lalu bekomunikasyen nengah chara ti beradat baka meri terima kasih sereta lebuh nabi pangan diri tauka orang bukai.

Langkah rapat budi basa ngerenchah kurikulum endang dikemeran ba sekula. Nya alai, nyau deka dikiraka  semua sekula nya sekula budi basa.

Utai ti patut ditanya nya, ni naka ukur budi basa mujur diserap sereta dibelematika nembiak? Katika tanggung pengawa sekula nyau kurang semitan ketegal agi bisi nembiak ke kurang ngembuan budi basa?

Ari sukut realiti, sekula enda ulih kediri lebuh deka nempa ulah sereta budi pekerti nembiak. Sekula beguna amat kerejasama apai indai, diri sebilik, komuniti enggau tuai-tuai di luar sekula. 

Di sekula, nembiak ditarak ngambika sida ulih ngemeranka ukur pendiau ti mana tang ba luar sekula sida mega napi mayuh macham pekara ti negatif. Di sekula, nembiak diasuh bepekayan manah, bebuk kemas, enda nginsap, nyaga pemeresi lalu nyaga diri ari ngakses penerang ti enda bemoral ba internet. Bah kati enti udah di luar sekula? 

Bisi sekeda orang madahka ukur pemanah pendiau ti ditarak di sekula endang patut iya nyadi kubu dikena nyeliahka sida ari tepejuh enggau pengawa ti enda manah lebuh ba luar sekula. Patut dikeingatka mega nembiak nya semina mensia biasa ke ulih tepejuh runding taja pan udah diajar. 

Kitai mega ulih nyebut munyi tu; enti nunda komuniti ke di luar sekula ke patut ngemeran ukur pemanah pendiau ngambika ulih dititihka nembiak. Ti pengawa sosial ke negatif  dalam komuniti di luar sekula nyau majak kurang tentu pemujur sekula ngasilka nembiak ti ngembuan budi basa mega majak mayuh.