Kimpin Ngenakutka Rayat

Hari maya deka bepilih besai parlimen makin lama semak sesemak. Ati bala pengari ke deka digantung nama maya pengawa bepilih tu ila nyau sengit-sengit, ngeli nyau begerit-gerit nganti nama diri disebut tuai parti. Tang endang udah adat maya deka bepilih, semua orang ngasaika diri ulih ngarika rayat sereta besemaya deka bekereja bebendar ke rayat, ke bansa, ke menua sereta sekeda nya ke pengarap mega. Udah badu bepilih, pulai ga baka selama, back to status quo ku jaku ribai. Utai tu betandu ninting bisi pengawa bepilih. Semua orang besamaya, bedanji  nama milih semaya nya ulih dikamat tauka enda tang semaya tetap semaya, danji tetap danji.

Nadai ngawa mih iya deka besamaya enggau kitai, barang ku iya mih. Diatu nyau deka semua orang bejaku pasal politik baik nya ba kedai kupi tauka sebarang endur. Nya mih aku mega enggai enda enggau orang ngeruhka ai bejaku mimit senentang pengawa politik.

Siti pekara ti enda tentu rindu didinga aku siku; enda nemu kita pemacha ke bukai bisi ninga tauka enda, iya nya jaku ti dipansutka orang politik lebuh betemu enggau kitai rayat. Ninting hari kitai ninga ba radio, meda televesyen sereta macha ba surat berita tauka internet pasal sekeda tuai politik ke bejaku ngenakutka rayat. Pekara tu udah baka siti kimpin; kimpin ngenakutka rayat. Nya ukai jaku tangkan, jaku padah tauka jaku lalau tang jaku ngerau, jaku ngeruga runding rayat ngambika takut.

Kitai kemaya hari tu nyau deka semua udah besekula semina pemandai kitai ke bebida entara siku enggau siku tang runding kitai udah jauh berubah ari jeman orang ke besai tuai dalam era taun 60an, 70an, 80an. Diatu udah udah masuk 2000. Kitai enda tentu ulih dipadah baka sida ke menya ke nadai besekula taja pan pemandai sereta peneleba idup sida endang bisi.

Utai ke ku aku nya senentang pemutus pengawa bepilih tu ila. Kenu ku sida orang politik, enti sema parti penyakal alah bisi orang deka ngeruga pengelikun menua kitai. Bedau bepilih udah bejaku munyi nya, ngembuan peragam ti balat amat negatif. Berapa kali udah sida parti penyakal alah dalam pengawa bepilih? Kati kala sida menang? Nama ngelama sida ke udah alah ngelama tu bisi kitai ninga penyarut bisi nyadi? Engka amat bisi.

Uji peratika sejarah. Baka buah rian baka ni kati pan enda ulih dipelam laban iya tetap bebau, lalu baka nya mega abus baka ni kati kitai deka mungkus tekebus mih abu. Pengawa ngeruga pengelikun maya 13 Mei 1969 suba nya diatu mayuh orang udah nemu nya pengawa sapa. Baka nya mega enti kitai bisi lalu agi ingatka sejarah maya taun 1980an pengawa bepilih nengeri di Sabah lebuh parti perintah parti Berjaya alah lalu bisi penyarut nyadi. Orang ke ngeruga nya orang menua luar ke dibayar ngasuh ngachau pengelikun madahka rayat enda setuju enggau parti PBS nya menang. 

Diatu bala pengari politik ngena chara, taktik, rapat langkah enggau jalai ti sama madahka penyarut deka nyadi enti parti penyakal alah ila. Agensi ti patut ngembuan penemu tengah hari mega meri komen ti sama, iya nya agensi ti bekait rapat enggau pengawa bepilih, sida ke endang ngatur pengawa bepilih tu ila. Sida mega nyukung penemu madahka penyarut deka nyadi. Indah tuai polis ke udah pinchin mega madah munyi nya. Enti nunda iya enda ngeluarka jaku munyi nya.

Sapa ke deka ngeruga pengelikun menua? Rayat? Enti rayat enda diparit sida politik tentu utai tu enda nyadi. Nama kebuah mansutka jaku munyi nya? Nama kebuah ngenakutka rayat enggau jaku nya? Mayuh rayat ke udah sekula sereta ngembuan runding diri empu tentu nemu laban sida enda mapap, enda mudah nerima jaku ti baka. 

Uji peratika jaku nangkanka tu. Enti kita enda ngundi aku kita enda masuk serega. Enti kitai enda ngundi aku kita enda bulih duit, enda bulih BR1M. Enti kita enda ngundi aku kitai bulih pemansang. Mayuh agi jaku bukai enda alah disebut ditu. Semua tu ukai jaku orang ke udah tuai penemu ukai mega jaku orang ke tinggi tikas penemu enggau runding.

Nya alai enti kitai deka nyadi pengari deka enggau orang masuk politik sekurang-kurang ngembuan anak penemu ti tuai ti ulih nyadika teladan rayat. Munyi ku sempama jaku tuai anang kitai  baka ikan tunggal tak sebarang separ.