Orang indu ngemuaska ati diri bebelanja beribu-ribu ringgit kena nganta

Langkah rapat raban orang indu ke bebelanja beribu-ribu ringgit dikena meli barang kosmetik tau dikumbai kitai terapi baru dikena muai pengirau ati ketegal kena tekan pengidup sereta mega dikena ngemuaska  ati diri.

Besenutuk enggau nya, Pengerusi Majlis Lembaga Akademi Keusahawanan Islam Alfafa, Datin Reny Rahayu Mohd. Ishak nyakalka penemu ti madahka pengawa nganta nya ngembuan tuju deka narit ati orang.“

Kemayuh agi raban orang indu ngembuan ulah ti baka nya ketegal deka ngupah sereta ngemuaska diri sida kelimpah ari ke nyadika terapi dikena muaika penanggul kena tekan pengidup.

Kelimpah ari nya, pemajik nya mega mantu ngangkatka pengarap diri sida ketegal orang indu kemaya hari tu mayuh agi ke bisi karier sereta suah betunga mua enggau orang banyak.

Kenu ku ripot, orang indu Malaysia bisi disebutka sanggup betunggang lupung berabis sampai  RM2,000 sebulan laban ke deka bebelika produk kosmetik mayuh macham jenama ti bisi dijual ba pasar.

Pia mega nitihka, Tuai Konsultan Syarikat K&A Applied Psychology Consultancy, Khairol Anuar Masuan madahka, nitihka pansik, majoriti raban orang indu nganggap diri sida semina dipeda bajik enti sida ngena kereban penganta ti mar rega.

Raban ti obses enggau pemajik seruran iya enda berunding panjai lebuh bebelanja datai ke sida sanggup berutang laban ti deka meli kereban kosmetik ti bejenama antarabangsa.

Sida mega sanggup nguna chara ti enda likun baka bebuntas enggau betuchuk dikena ngubah pendiau diri taja pan pengawa nya tau ngeruga pengerai sereta tau ngujungka mai nyawa sida.

Besenutuk enggau nya mega, Yang Dipertua Persatuan Siswazah Wanita Malaysia, Fauziah Mohd. Ramly madahka raban orang indu patut pandai ngalihka reti pemajik enggau setimbang agi sereta mungkur mayuh aspek lalu enda ngembuan ulah ke tau ngeruga pendiau diri.

Iya balat amat sinu ngenang raban orang indu ke sanggup ngerua sereta ngeluarka belanja ti besai ketegal ke deka dipeda bajik taja pan duit ke bisi nya ulih diguna ke tuju bukai ti manah agi ari nya. Ambika banding, sida ulih nyimpan duit nya dikena merambuka pekara jemah ila laban kos ngidupka ba menua tu majak niki, pia  ku iya. 

Tambah mega ku iya, raban orang indu ba menua tu patut nyadika kes sida ke udah ngena produk pemajik nya kena akal ngujungka mai nyawa diri nya patut bendar nyadika teladan raban indu ke bukai.

Artikel Penuh Dibali Ari: 

© Utusan Melayu (M) Bhd