Milih, Bepilih & Pilih

Milih nya datai ari urat jaku pilih. Pilih nya kuasa ti diberi ngagai kitai milih sesebengkah pekara baik nya pemakai, pengidup sereta enggau mayah utai bukai.

Ambika banding enti kitai deka makai manuk guring ba restoran kitai ulih milih mayuh bengkah restoran baka restoran KFC, MacDonald, Mary Brown, Sugar Bun enggau ke bukai. Pia mega enti kitai deka nguring dagin manuk, kitai ulih milih mayuh bansa minyak makai baka minyak jagung, minyak sawit, minyak lengga enggau ke bukai mega. Baka nya mega enti lebuh deka ngisi minyak kerita, kitai ulih milih minyak ari stesyen minyak Shell, Petronas, Petron, BP enggau Caltex.

Enti telefon pan kitai ulih milih. Enti menya kitai semina bisi telefon ba rumah tang diatu kitai ulih mai telefon kini-kini kitai deka. Bansa telefon pan nyau mayuh. Bisi telefon selama lalu bisi mega smartfon. 

Dalam pengarap kitai mega ulih milih pengarap lama tauka pengarap baru. Ambika banding baka pengarap Animisma, Buddha, Hindu, Kristian, Islam, Bahai’ullah tauka pengarap ti pengabis baru baka Scientology. Dalam pengarap Kristian mega kitai ulih milih Kristian Orthodox, Roman Catholic, Anglican, Methodist, Evangelist baka SIB, Church of Latter Rain, New Gospel Church, Seven Day Adventist enggau beratus-ratus pengarap kristian ke bukai. Baka nya mega ba Islam bisi ke ari mazhab Sunnah Al-Wal-Jemaah, Suni enggau ke bukai.

Lalu pulai ngagai parti politik mega mayuh bendar parti politik ti ulih dipilihka kitai.  Pelaba aku orang ke rindu macha berita senentang politik, nadai enda nemu parti politik ke bisi di dunya sereta di Malaysia enggau di Sarawak. Enti kitai Iban mayuh amat parti alai kitai milih baka parti PBB, SPDP, PRS, PKR, SWP. Enti deka alah enda, enti enggai iya ke bisi nya mih tau nyadi nadai. Bisi nya parti ti megai perintah lalu bisi nya mega parti penyakal. Bela tau dipilih. 

Aku alit ati laban agi bisi tuai-tuai parti politik bekimpin ke ulu ke ili enda ngasuh orang milih parti bukai semina parti iya empu aja laban parti iya aja ke manah, ke udah bisi peneleba merintah menua kitai dalam timpuh  55 taun. Agi mega, ku iya semina parti iya aja ulih ngamatka danji. Endang amat ga nya, enda ga bula laban iya benung megai perintah. Kati enti iya enda megai peritah dih??? 

Nagang mensia mayuh milih parti ti dikedeka sida nya ukai chara ti manah sereta profesional dikena ngelaku parti diri. Nadai kala kitai ninga tauka meda ba iklan tv, KFC madahka enda tau makai manuk ba restoran MacDonald laban manuk dia jai, udah but. Nadai mega kitai kala ninga tauke stesyen minyak Petronas nagang orang ngisi minyak ba stesyen Shell. Nyadi penemu aku tu ukai reti aku milih sapa-sapa laban kuasa milih nya ba jari kitai empu semina kitai aja nemu sapa ke deka dipilih kitai, ukai reti nya aku milih parti A tauka parti B.

Nama kebuah Suruhanjaya Pilihan Raya bebelanja bejuta-juta ringgit bejalaika pengawa bepilih besai tang bala raban politik enda ngasuh orang milih parti politik ti dikedeka ati sida??? Chara bekimpin baka nya chara lama. Enti taun 50an, 60an, 70an enggau 80an nyangka runding mensia mayuh maya nya agi pabu, agi enda ngelala parti politik agi enda nemu kebuah pengawa bepilih lalu agi pandak runding. Tang kemaya hari tu, mensia mayuh udah mayuh pandai, udah majak pandai runding sereta landik bepikir, landik ngaga analisis sereta nemu bida entara parti-parti ti bisi ditumbuhka deka napi pengawa bepilih besai. 

Lengka sesempa leka pinang kenang senentang pengawa bepilihka utai nya tadi nyau nyebut enda lama senentang pengawa bepilih besai parlimen ti deka datai tu. Nyau bangai sepi aku, kitai rayat Malaysia dipelabaka aku nganti pengawa bepilih besai Parlimen. Nyau puas mega kitai udah beentelahka hari bulan maya pengawa bepilih besai tu dipejalaika lalu nyentuk ke sehari tu lalu bedau bisi pemutus penemu ari orang empu tubuh. Semina iya aja nemu kebuah lalu bedau deka madahka maya patut alai pengawa bepilih besai nya. Semina iya aja nemu kebuah iya enda beguai madahka maya patut alai pengawa bepilih besai nya.

Makin lama kitai nganti makin mayuh ga utai ke nyelai nyadi ba menua kitai. Dipelabaka enda ibuh disebutka nama utai nyelai ke udah nyadi ba menua kitai kemaya hari tu. Awakka sama-sama berunding dalam ati diri utai nyelai ke udah nyadi ba menua kitai laban iya tau meri empas ngagai pengawa bepilih besai. Semua utai ke nyadi kemaya hari tu ulih dipolitikka orang ke endang gawa ba bidang politik. Nya tau ngeruga runding sereta jalai kitai napi pengidup besehari-sehari datai ke pengawa bepilih besai nya nyadi.