Baka Kumang Nginang Sawa

Pekara ti deka nyadika buah kenang aku sekali ukai utai ke baru nyadi dua tiga hari tang lama ga udah semina aku ke enggai tentu kiruhka berita tu. Ukai nama laban lembau deka meri buah runding ke semina betikas dua puluh sen ngagai bala pemacha. Agi mega mayuh amat orang bukai udah meri buah runding diri senentang pekara tu. Nyau ke puas ninga orang becherita betusika berita nya ba ba surat berita, di televisyen, ba dunya siber tauka ba kedai kupi nyau sesengit ga asai ati tu deka mantaika buah runding senentang pekara. 

Sebedau aku ngemanjaika tulis aku ditu, dulu aku minta ampun ngagai raban pemacha baik nya tuai tauka biak, baik nya nembiak sekula tauka orang ke gawa, baik nya ke gawa bumai, gawa perintah tauka kereja perintah enti sema buah kenang aku tu tak tau nyima ati kitai tau ngasuh ati kita nyida. Nyadi semua buah kenang ti dipansut aku ditu endang datai ari buah runding aku empu belalauka surat berita ke bisi dibacha lalu nadai kaul enggau orang politik baik nya ari parti perintah tauka parti penyakal, baik nya ari orang ke agi idup tauka mati sereta mega ari kaban belayan orang ke kena sebut dalam buah kenang aku ditu.

Nyadi utai ti deka dikenang aku tu iya nya senentang krisis orang ke ngeruga pengelikun sereta nyerang menua kitai iya ba Sabah.  Nitihka surat berita Utusan Malaysia (16 Feb 2013) bisi 100 iku orang Filipin ari bansa Suluk bisi tama enda beradat ngagai Kampung Taduo ba pelilih menua Lahad Datu, Sabah kena 11 hari bulan Februari 2013.    Enti raban pemacha agi bisi ingat sereta bisi macha surat berita tauka meda berita tv keterubah sida ke datai tu dikumbai perintah ‘penceroboh’ reti nya orang ke masuk nadai pemendar tauka nadai beradat. Uji peratika genteran berita ti diambi aku ari Utusan Malaysia 16 Feb 2013; Hasil perisikan mendapati kumpulan orang asing bersenjata api yang menceroboh Pantai Tanduo berdekatan Lahad Datu di Sabah bukan pengganas dan mereka tidak pernah terlibat dalam sebarang aktiviti keganasan.

Menteri Dalam Negeri, Datuk Seri Hishammuddin Tun Hussein madahka pengawa berunding maya nya dipejalaika begulai enggau raban penyukung sultanan Sulu ngambika sida diburu pulai ari menua ngena chara ti nadai mai insiden bebunuh.

"Mayuh amat spekulasyen enggau penerang pelesu senentang pekara tu. Sebarang  spekulasyen nyengkaum ari media luar nya pengawa ti betanggung pengawa. (http://www.utusan.com.my/utusan/Dalam_Negeri/20130217/ )

 

Puas ga aku ngiga berita tauka fakta maya keterubah perintah ngubah nama sida ke nyerang menua kitai ari ‘penceroboh’ nyadi ‘penganas’. Enti nitihka siti blog ke dibacha aku (http://manzaidiamn.blogspot.com/2013/03/kronologi-pencerobohan-pengganas-sulu.html) iya berengkah nguna nama pengganas lebuh iya bekunsi berita munyi tu; 6 Mac - Beberapa keping gambar Op Daulat yang dirakam pasukan keselamatan diedar kepada media, antaranya mayat pengganas di dalam sebuah lubang. 

Kenu ku orang (Wikipedia) insiden ba Lahad Datu nya bisi kaul enggau insiden diplomatik  ti nyadi entara menua Malaysia enggau Filipina laban raban ke nyerang Lahad Datu nya ngumbai diri Angkatan Keselamatan Diraja Kesultanan Sulu dan Borneo Utara, ti betuaika Jamalui Kiram III ke siku ari sida ti minta perintah Sultan Sulu.  Kiram madahka tuju sida nyerang laban deka minta pulai sebagi ari tanah ba timur Sabah (suba dikumbai North Borne) ti lalu bedau ulih diputarka.

 

Besenutuk enggau nya mega, Mandal Tuai Umno Semporna, Datuk Nasir Sakaran madahka mayuh komuniti Sulu ke diau di Tawau enggau Lahad Datu nya endang peranak menua Malaysia(http://www.freemalaysiatoday.com/). Pengari parlimen Kota Belud Datuk Abdul Rahman Dahlan madahka penyampau pengundi beregister di Sabah nya 926,638 orang (2012) lalu dianggarka 80,000, ari sida nya pengundi bansa Sulu.

Nya alai penusah ke nyadi ba Sabah tu ukai utai ke baru nyadi kemaya hari tu tang udah laban kenyau ari taun 1960an sereta balat agi maya taun 80an lebuh Parti Berjaya iya nya parti perintah alah bepilih. Nyadi nya mih lalu bisi isu meri kad pengelala ngagai sida tu ngambika ulih ngerejistaka diri nyadi pengundi. Nyadi pengawa nya ke disempamaka baka Kumang nginang sawa. Reti sempama nya jai enggau orang ke udah pemadu manah nulung kitai. Kumang nya dikelaika baka perintah lalu sawa nya diempamaka baka orang bansa Suluk ke udah dibai masuk kitu sereta diberi tikas rayat menua lebuh sida diberi kad pengelala. Orang ke gawa ba opis pengerijista bansa nya semina orang selama ke gawa ke perintah, makai gaji dibayar perintah sereta semina bekereja nitihka ari asuh sereta padah tuai perintah. Nyau pemuas sida diau ditu sida ba baka sawa ngeruga pengelikun Kumang. Nya mih munyi ku sempama Melayu ke nyebut ‘senyata makai tuan’ , senyata nya tadi ke munuh orang empu.

Baka ni kitai deka mutarka pekara tu? Kitai ke rayat selama tu semina enggau orang ngeruhka ai aja bejaku sengapa ba kedai kupi tauka ba dunya siber. Perintah mih ngembuan tanggung pengawa mutarka penusah tu laban iya ukai agi penanggul selama ti mudah diputarka. Iya udah baka pisa nguyum sereta deka pechah ngemansutka nanah. Sapa pedis enti bisi pisa? Tentu orang ke empu tubuh. Uji mensia ke pisa nya dianalogika kitai baka menua Sabah, Malaysia tentu iya ke napi penusah nya rayat Malaysia kelebih agi rayat Sabah. Kitai ke ukai rayat Sabah tentu bisi sereta tau bekunsi penyinu enggau rayat mendam sereta rayat asal menua Sabah. Sida tu udah nyadi orang minority lalu pengidup sereta pengelikun menua sida udah enda baka ngelama tu agi. Enti semak utai tu ulih diputarka nadai jamin iya enda nyadi pagila lusa. Kitai irauka penusah tu disempamaka baka jaku tuai  semampai tangga lulai tiki temuai pulai hari, seruran  tangga ruan tiki kaban bepurus jari.