Bepadah

Siti ari budaya raban bansa Iban nyangka enda tentu ditemu nembiak rebak baru kemaya hari tu iya nya bekaul enggau pengawa bepadah. Kemaya hari tu laban ke udah datai jalai sereta bisi telefon enggau radio, pengawa bepadah sereta chara bepadah nya udah betukar. Nyadi menya kebuah pengawa bepadah tu agi dikemeran nengah chara konvensional laban majoriti raban bansa Iban diau ba rumah panjai. Orang ke diau ba rumah panjai sebuah enggau rumah panjai ke bukai nya jauh amat entara diri sama diri. Nya alai menya sida bisi sistem dikena bepadah enggau pangan diri ke diau ba rumah panjai bukai kelebih agi lebuh dituntung penusah tauka lebuh bisi pengerami.

Padah rumah nya siti jaku ke dikena madahka pengawa ngambi orang sekayu rumah nya ngabang gawai tauka nguluka penusah rabat. 

Lebuh maya bisi penusah baka penusah rumah angus tauka lebuh bisi orang tesat ba kampung tauka mega bisi orang lemas ba sungai selebuan ketawak dipalu enggau jampat lalu munyi ketawak nya dikumbai ketawak begau. Lebuh orang ke ngelingi rumah panjai tauka sida ke berimbai pendiau ninga ketawa begau sida lalu nguji mending enggau silik penatai bunyi ketawak nya. sida lelaki ke tegap sereta kering lalu nurun ngesahka penusah nya enda milih nya malam tauka siang. Enti munyi ketawak nya panjai nya ngelaika penusah besai bisi nyadi lalu orang ari rumah panjai bukai deka mega malu ketawak ngambika mantu madah ngagai orang ke ba rumah panjai ti bukai.

Enti bisi penusah bebadi ngenyit tauka bisi orang raya bendar sakit ba rumah panjai nya dia sida mega bepaluka ketawa tang munyi iya bisi bebida ari ketawak begau. Bunyi palu ke dikena madahka penusah ngenyit bisi nyadi tauka bisi orang raya sakit nya dikumbai ketawak kumbai. Kebuah pengawa bepadah ti baka tu dikerejaka laban maya nya bisi bala Iban ke diau jauh ba umai tauka palan alai bekebun nya jauh ari rumah panjai sida.

Kelimpah ari bepadah ngena chara bepaluka ketawak, bisi mega chara bukai dikena bala Iban bepadah.  Enti sema orang nya raya amat sakit tauka nyau jejengap deka parai lalu bisi ati deka madahka kaban belayan, suku juru ke diau jauh ari sida nya datai kia, dia sida sebilik nya lalu ngajung tauka ngirumka kain sarung nengah orang diasuh sida besereta enggau pesan. 

Enti pesan nya berat, dia sida ke empu penusah nya deka nunu ujung kayu ke dikumbai sida enggau nama papung unggat lalu dibai orang ke diasuh mai pesan nya datai ke iya ngenataika diri ba rumah ti dituju iya enggau naka pengelengkas. Enti iya disempulangka enggau bulu manuk reti nya pesan nya enda tau enda dipadah enggau naka pengelengkas. 

Bulu manuk nya ka tanda tauka nyadi lambang iya mesti lempung sereta laju dipejalaika. Bakanya mega rangkang tauka kayu mit ti udah setengah angus ditunu nya ngayuka baka reti sempun ulih ambika tenggau lebuh bejalai malam. Reti nya semua perengka nya enda tau enda mindah dipejalaika ari rumah siti ngagai rumah siti siang malam petang.

Siti agi chara madah pengabang ari rumah panjai bukai datai ngabang gawai iya nya ngena tali ke dikumbai temuku tali.  Tali tu disimpul sekalika digagaka temuku dikena ngitung hari dalam siti timpuh pasal sebengkah pengawa besai ti deka dikereja Iban dulu menya. Siti sintal temuku nunjukka sehari. Dalam sehari siti sintal nya mesti diketas. Nya penyampau sintal ti bedau diketas, nya mega penyampau hari ti agi tinggal sebedau pengawa nyadi. Reti nya enti sehari ti Hari Lima lalu sintal ti kepenudi bendar diketas sehari tu, pengawa ti ditimpuhka nya mesti nyadi pagi ila, iya nya Hari Enam. Sekeda ari temuku nya temuku nyabung, temuku nubai enggau temuku napang. 

Ari taun 1900 ngagai taun 1922 enti pengulu deka manggil orang bechara, iya ngirumka labung pengulu iya ngagai orang ke diasuh datai bechara. Labung nya ke tanda kuasa pengulu ngatur pechara. Udah nya pengulu manggil orang datai bechara ngena jalai bekirumka tungkat rutan ke bisi ngundan gambar makota Rajah ba ujung ari pala tungkat nya. Tungkat tu dianjung ari rumah panjai sebuah ngagai rumah sebuah nyentukka iya datai ba orang ke dituju iya.

Awakka orang nemu pesan tauka panggil nya beguai, iya dikelapung enggau bulu manuk sereta rangkang tauka kayu mit ti udah setengah angus kena tunu. Reti nya semua utai nya enda tau enda dipejalaika siang malam petang. Semua utai nya nadai tau diketu ngapa, enti iya apin nuntung ba orang ke dituju iya. 

Pengawa bepadah ti baka tu bisi dikemeranka maya perintah Raja Brooke iya nya dalam taun 1960. Pengawa bepadah tu diketuka lebuh udah bisi stesyen radio. Raban bansa Iban endang enda bekira enti datai ba pengawa bepadahka tu laban iya endang ari budaya sereta pengawa ti enda dikereja ari aki ini kelia.

Nya ku gaya Iban bepadah enggau pangan diri lebuh bedau datai ubah pemansang.