Media siber tau mega disebut media baru nya media ti pengabis pegari kemaya hari tu. Pemansang media siber nya setipak enggau pemansang internet.
Utai ti dikumbai media siber nya mayuh bengkah media ti bisi ba internet, baik nya media rasmi tauka ukai, baka laman web, portal enggau blog sereta mega laman sosial baka Facebook, Myspace, Twetter enggau Friendster. Nengah media tu, mayuh macham penerang ulih ditabur ngagai genap endur di dunya lalu nengah media tu mega pengguna iya ulih berinteraksyen enggau pangan diri.
Dalam media tu, mayuh bansa jaku bisi dikena lalu entara jaku ti bisi dikena nya jaku Iban. Tikas tauka kualiti mega mayuh leman baka jaku standard, jaku sebut tau mega dikumbai jaku pinang sirih, dialek enggau jaku rujak. Jaku standard suah agi dikena dalam media rasmi kelebih agi dalam web rasmi gerempung tauka institusyen, baik nya perintah tauka prebet baka opis pemadah, opis pelajar sereta majalah Pegari.
Jaku sebut, dialek enggau jaku rujak nya jaku ti betukuh enda standard. Jaku bansa tu seruran agi dikena dalam blog personal enggau laman sosial. Chara jaku tu dikena dalam media enda tentu ulih dijaga laban nadai atur jaku ke ngikat jaku tu dikena enggau menyana dalam media tu. Kualiti ngena jaku dalam media tu mayuh agi bepanggai ba tikas penyedar enggau penemu orang ke ngena jaku tu dalam media nya.
Nya alai, jalai ngena jaku dalam media siber patut bendar diperatika ari pun baka kitai ke meratika gaya jaku sereta isi ke dikenataika dalam media nya. Enti sema nadai diperati sereta nadai diberi jaku lalau penanggul ngena jaku ti nadai standard dalam media deka nyadi sebengkah penyakit ke enda ulih diubat jemah ila.
Empas ari penanggul ti baka tu, jaku Iban nyangka enda dikemuning sereta dipeda tinggi ba mata mensia mayuh lalu ngujungka iya enda ulih nyadika sebengkah jaku ke bisi standard ba dunya. Tu ngujungka mega meri empas ngagai orang ke ngena jaku tu. Nya alai sama-sama mih kitai ngarapka jaku Iban bepunchak baka jala, betuchung baka Lingga ulih ngerembai nengah media baru, media siber.
Tiada ulasan:
Catat Ulasan